O lo o taumafai pea le Ofisa o Femalagaaiga e fofoina faafitauli o lo o tula’i mai i a latou masini komipiuta (Computer System) i le malae vaalele i Tafuna, lea e faafaigata ai ona maua tagata ua faasa ona toe ulufale mai i le teritori, ae emo ane le ata ua toe vaaia i laufanua o Amerika Samoa.

Mo se faataitaiga e pei ona taua e le Pulesili o le Ofisa o Femalagaaiga ia Peseta Dennis Fuimaono i se feiloaiga ma le Samoa News ananafi, o le mataupu faasaga i le alii o Tautiaga Uili po o Pelenato Misi, e toalima i ai alii na molia i le fasiga o le laufali mai Samoa, o POnifasio Vasa, ia Iulai 2011, lea na faasa e le Faamasinoga Maualuga ona toe ulufale mai i le teritori i le tausaga atoa, peitai na toe vaaia lea alii o malaga mai i le au a Vaiala i le ta’ito’a 7 a le TMO Marist Pago 7 lea na faia ia Aperila 2013.

Na taua e Peseta e faapea, e le’i mafai e le latou ‘computer system’ i le malae vaalele ona maua le igoa o lenei alii ina ua ulufale mai ae na faatoa iloa ina ua vaai i ai ni isi o le aufaigaluega.

“O le itu e pito sili ona matuia ai lenei mataupu, e le gata na sui le igoa na sau ai le alii lea ae na sau fo’i i se tusi folau fou mai Samoa, ma ua maea ona toe faafoi o ia i Samoa i le aso lava na maua ai ma le tuutuuga, e 5 tausaga e faasa ai ona toe ulufale mai i le atunuu,” o le saunoaga lea a Peseta.

E mafua tulaga faaletonu i le ‘computer system’ a le Ofisa o Femalagaaiga e pei ona saunoa Peseta, ona e le o i ai se vaega e mafai ai ona malu puipuia masini computer mai le alu i ai o soo se tagata faigaluega ma sui faamaumauga o lo o i ai.

Mo se faataitaiga afai o le lisi o tagata mai fafo ua faasa ona toe ulufale mai i le teritori o lo o i totonu o le ‘computer system’ a le Ofisa o Femalagaaiga, e mafai lava ona tatala e se tagata o le aufaigaluega le computer ma fai suiga i luga o le lisi lea ina ia kilia ai le igoa o le tagata o lo o faasa ona toe malaga mai i le teritori.

Na saunoa foi Peseta e faapea, e oo foi i le faafitauli i tagata ua ova aso talu ona aumau i le teritori, e mafai fo’i ona faia e tagata faigaluega ni suiga i faamaumauga a le Ofisa ina ia faailoa ai i faamaumauga ua maea ona faaleleia pepa nofomau a lea tagata, e ala i le sui o faamaumauga i totonu o masini ‘computer’.

Ma na saunoa Peseta, pau le auala e mafai ai ona foia le faafitauli lenei o le faa faigaluega o ni tagata fou e i ai lo latou agavaa i mea tau fesootaiga faaonaponei (Information Technology-IT) e galulue i le faaleleia o a latou polokalama i totonu o komipiuta.

“Ua maea ona tuuina atu la matou talosaga i le Kovana Sili ma le Loia Sili mo le faa faigaluegaina o ni isi tagata faigaluega e fesoasoani i le manaoga e pei ona tulai mai, ma ua taliaina e le loia sili le talosaga, pau le vaega o lo o faatali i ai o le sainia e le kovana ma faagasolo loa le aumaia o tagata faigaluega fou i totonu e koleni ma faamasani i le galuega,” o le saunoaga lea a Peseta.

O se vaega tupe mai le paketi faaopoopo a le kovana e $5miliona lea na pasia e le Fono Faitulafono i le amataga o le tausaga nei, o lo o maua mai ai se vaega tupe e totogi ai tagata faigaluega e pei ona saunoa Peseta ma faatau ai masini ‘computer’ fou e 15 atoa ai ma ‘scanner’ e 15, e fesoasoani i le faaleleia o le tautua a le Ofisa o Femalagaaiga.

A’o faatalitali ai tulaga e pei ona saunoa le alii pule, o lo o faia fo’i lana vaega i le fautuaina lea o tagata faigaluega ina ia taofia amioga ma gaioiga sa faia i tausaga ua mavae, ae faatino le galuega ma le faamaoni ina ia mafai ai ona foia faatauli i tagata mai fafo o lo o feagai ma le malo i le taimi nei.

“O le tele o taimi ou te lapataia ai tagata faigaluega ina ia fai a latou galuega ma le faamaoni, ae o isi fo’i taimi afai ou te maitauina se tagata faigaluega e le o faamaoni i le faatinoina o ona tiute e pei o le saini o ni pepa e aunoa ma le aumai ou te vaai ma pasia, ou te faia le faaiuga e tuli ai lea tagata i le latou aiga mo le aso e tasi pe tolu foi e le totogia, ma o iina na amata ai loa ona aoao e tagata faigaluega se lesona, ou te le taalo i le taimi e faatino ai a’u faaiuga ae ou te tu malosi ina ia faaleleia vaega o lo o faaletonu i le tautua a le ofisa,” o le saunoaga lea a Peseta.