Na fautuaina e le afioga i le ali’i senatoa ia Faletagoa’i Tuiolemotu le tofa a Taufete’e John Faumuina, afai ae pasia e le maota maualuga tofiga a le kovana e avea ai o ia ma totino o le Komiti Fa’afoe a le Falema’i o le LBJ i Fagaalu, ia taumafai e aua nei toe taumaia foma’i mai isi atunuu e pei o Fiti ma Filipino e galulue i le LBJ, ae ua lava foma’i mai Amerika e aumai e galulue i le tausiaina o le soifua maloloina o le atunuu.

E mafua lea tulaga e pei ona saunoa le ali’i senatoa, e le gata e le lelei tulaga o aoaoga fa’a foma’i mai atunuu ia, ae a o mai fo’i e fa’atino tiute fa’a foma’i, e na o le o mai e fa’ata’ita’i a latou tulaga fa’a foma’i i soifua ma ola o le atunuu, ma e ono avea lea ma itu e a’afia ai le soifua maloloina o tagata lautele.

O le fautuaga a Faletagoa’i sa tuuina atu ia Taufete’e, e tatau ona fa’aavanoa e le falema’i se vaega tupe tele e totogi ai foma’i mai Amerika, o i latou tonu ia ua i ai le agava’a ma le tomai e fa’atino ai galuega fa’a foma’i.

O le mataupu lenei na laga e le afioga i le ali’i senatoa, i le taimi o le iloiloga a le Komiti o le Soifua Malolo fa’asaga i tofiga a le kovana mo Taufete’e e avea ai ma totino o le Komiti Fa’afoe o le Falema’i a le LBJ.

Na taua e le ali’i senatoa e fa’apea, o se tasi o fa’afitauli fai fai pea o lo o maitauina i le falema’i i le tele o taimi, o le faaletonu lea o le auaunaga a le vaega o le ‘Emergency Room’ (ER) i le falema’i i Fagaalu, ae o le vaega pito sili lea ona taua aua o iina e muamua taunuu atu i ai le gasegase.

O le fa’afitauli e pei ona taua e le ali’i senatoa, e le o lelei le auaunaga a foma’i i le vaega o le ‘ER’, ma o se fa’afitauli o lo o tupu soo pea e oo mai i le taimi nei.

“O le fautuaga, aua le toe aumaia foma’i mai isi atunuu e pei o Fiti ma Filipaina, ae aumai na o foma’i mai Amerika, o i latou na e lelei i le faatinoina o le galuega ma silafia togafiti gasegase, aua o isi foma’i mai fafo, na o le o mai lava e fa’ata’ita’i a latou galuega i tatou tagata,” o le saunoaga lea a Faletagoa’i.

O le fa’afitauli o lo o feagai pea ma le falema’i i Fagaalu pe a oo i le mataupu o le tau sailiina lea o foma’i mai Amerika, e le gafatia e le falema’i ona totogi foma’i lelei ona o le taugata o latou totogi.

Na taua e le Foma’i Sili lagolago ia Dr. Annie J. Fuavai i luma o le senate i le vaiaso na te’a nei e fa’apea, o lo o taumafai e unaia fanau aoga e ave mataupu fa’a foma’i, ona ua leai lava ni isi e fiafia i lenei matata i le taimi nei.

O le agaga o le tama’ita’i foma’i, ia mafai ona a’oa’oina fanau a le atunuu ina ia tula’i mai e fa’atino lenei auaunaga taua.