Ads by Google Ads by Google

Le manuia taumafaiga Au Tenisi mo se pine

Ua le manuia taumafaiga a le tatou ‘au Tenisi mo Ta’aloga a le Pasefika i Papua Niu Kini mo se pine, ina ua faiaina le tele o a latou ‘au i le vaega muamua o le pau ma nofo (play-off) lea sa fa’agasolo i le aso Sa na te’a nei.

 

E na o le tama’ita’i lava o Kalani Pisi Soli na ausia le tulaga o le ‘quarterfinal’ i vaega ta’ito’atasi (single), peita’i na faiaina i le la ta’aloga ma le tama’ita’i mai Papua Niu Kini.

 

O isi a tatou au ta’ito’atasi e aofia ai Florence Wasko ma Valentine Paul Fuji na muamua lava mae’a a laua taumafaiga i le vaega ta’ito’atasi, ae o le isi to’afa e aofia ai Pisi, Charity Murrieta Segiao, Kevin Jeffery Ma’ukoloa ma Larry Magalasin sa tulaga lelei mai lava a latou taumafaiga i ulua’i aso e 4 o le ta’amilosaga.

 

Na taua e le faiaoga a le ‘au Tenisi i le Samoa News e fa’apea, sa finau lava le ‘au a Amerika Samoa i le maualuga e gata mai ai le latou mafai, ae ona ua pau lava o se mea ua latou ausia.

 

“Sa tutusa uma lava le malolosi ma le lelei o tagata ta’aalo sa tausinio i lenei lua vaiaso, sa i ai fo’i ni isi o ‘au lelei sa fa’ato’ilalo e le tatou ‘au, ae ina ua oo atu i le vaega muamua o le pau ma nofo (play-off), sa le manuia ai loa iina taumafaiga a le tatou ‘au,” o le saunoaga lea a le ali’i faiaoga.

 

Ina ua fesiligia e le Samoa News pe sa i ai se mafua’aga autu na ala ai ona le manuia taumafaiga a le tatou ‘au, e pei o le vevela o le tau poo le fa’aletonu fo’i o le malae, ae na tali le ali’i faiaoga, “ua pau lava o se mea ua mafai, ae pei ona ou fai atu, sa tu’u uma i ai le malosi ma le mafaufau o ali’i ma tama’ita’i ta’aalo i a latou ta’aloga, ina ia maua se pine mo Amerika Samoa.”

 

O ni isi o sui o le ‘au tenisi sa mataina le la taumafaiga, o le tama’ita’i o Soli faapea ai le ali’i o Magalasin, lea sa la fa’ato’ilalo ni isi iloga i le ta’aloga tenisi i le pasefika, e pei o le tama’ita’i o loo #3 na fa’ato’ilalo e Soli i ta’aloga amata (preliminary heat), ae o le ali’i #2 mai Fiti na fa’ato’ilalo e Magalasin.

 

Na taua e le ali’i taalo ia Magalasin i le Samoa News, sa tulaga lelei lava lana taumafaiga i le amataga o le ta’amilosaga, ae na te’i lava ua fa’aletonu le fa’aiuga.

 

“Ou te le iloa le mafua’aga sa fa’aletonu ai la’u taumafaiga, ae ua pau lava o se mea ua ou gafatia, ou te iloa o le a ou toe taumafai mai mo isi ta’aloga a le Pasefika i le 2019,” o le saunoaga lea a Magalasin.

 

Na taua e le ali’i faiaoga i le Samoa News, o le a toe tapena mai le ‘au Tenisi i le isi fa tausaga o loo lumana’i, ina ia sili atu le latou taumafaiga i lena tausaga nai lo le tausaga lenei.

 

“Ou te iloa ua siliga tali se pine mo Amerika Samoa e maua mai i le ‘au Tenisi i lenei tausaga, ae ou te ta’utino atu, o le a matou toe taumafai i le isi fa tausaga o loo lumana’i nei mo Ta’aloga a le Pasefika i Tonga, o le a sili atu la matou taumafaiga i lena tausaga nai lo lenei tausaga,” o le saunoaga fa’ai’u lea a le ali’i faiaoga.

 

O ta’aloga lona XIII a le Pasefika i Samoa i le 2007, na manumalo ai le ‘au tenisi a le atunu’u i le pine apamemea, ma o lea ua sosoo isi ta’aloga e lua i le 2011 i Niu Kaletonia ma le tausaga lenei e le o manuia taumafaiga a le ‘au Tenisi.

 

O le taeao nei lea ua fa’amoemoe e tuua ai e le ‘au Tenisi le togalauapi i Port Moresby mo le toe taliu atu i le atunu’u, ma ua fa’amoemoe o le aoauli o le aso Tofi e taunu’u ai i latou i laufanua o Amerika Samoa.