Ads by Google Ads by Google

Leai ni fa’alavelave matuia na tutupu i le Kerisimasi

E leai ni fa’alavelave matuia na tutupu i le aso o le Kerisimasi na sei mavae atu nei, po o ni fa’alavelave e ono ma’imau ai se soifua o se tasi, e pei ona fa’amaonia mai e se sui sinia o le Ofisa o Leoleo i le aso ananafi, se’i vagana ai lava nai vevesi laiti na tula’i mai i ni isi o vaega o le atunu’u, lea fo’i sa mafai ona tali atu i ai le ofisa o leoleo mo le fa’a to’afilemuina lea o le vevesi.

 

 E le i avanoa le Sui Komesina o Leoleo ma le Ta’ita’i Leoleo i le aso ananafi mo le tu’uina mai o se ripoti atoa e tusa ai o le aso malolo o le kerisimasi, peita’i na taua e se sui sinia o le matagaluega e le fa’ataga ona talanoa i tusitala i mataupu fa’apenei e fa’apea, sa to’a filemu le atunu’u atoa i ni fa’afitauli na tula’i mai ai.

 

O le tatalo masani lava lea a le matagaluega o leoleo i tausaga uma pe a tu lalata i taimi o aso fiafia, o le talosia lea o le soifua saogalemu o le atunuu, ina ia aua ne'i i ai ni fa'alavelave e ono tula'i mai ma lamatia ai le saogalemu o matua ma fanau, ao alo atu le atunu'u e fa'amanatu aso fiafia i le fa'aiuga o le tausaga.

 

Na vaaia le tumutumu o matafaga i tafaoga a aiga ma fanau i vaega eseese o le atunu’u. O ni isi sa faia BBQ e fa’amanatu ai le kerisimasi o lenei tausaga, o isi sa fa’atasi atu i ta’aloga ae o isi fo’i sa fiafia lava i totonu o aiga.

 

Mo le motu o Manu’a e pei ona taua mai e se sui o le Ofisa o Leoleo o lo o i ai, e leai ni vevesi na tula’i mai ai po o ni misa, sei vagana ai tafaoga ma fiafiaga a aiga, uo ma fanau na vaaia i le Luanu’u ia Ofu ma Olosega/Sili, aemaise ai o le Faletolu ia Ta’u, Faleasao ma Fitiuta.

 

“O iinei lava ia i Manu’a, e leai ma se fa’alavelave matuia na tula’i mai ai, e leai ni tagata ‘onana ma pisapisao solo i totonu o nu’u, e leai fo’i ni vevesi po o misa na ripotia mai, se’i vagana ai le tafafao fiafia o tagata ma fa’amanatu le kerisimasi o lenei tausaga”, o le saunoaga lea a se ali’i leoleo sa ia taliina mai le telefoni i le Ofisa o Leoleo i Ta’u.

 

Na taua e Malaeulu mai Ta’u e fa’apea, o tausaga uma lava pe a fa’amanatu aso fiafia i Manu’a, e leai ai lava ni fa’alavelave matuia po o ni misa e tutupu mai ai, ae na o le fiafia lava e maua i nuu ma aiga, o le agaga moni fo’i lea o le kerisimasi i totonu o Manu’a.

 

Na taua e Malaeulu le to’atele o ni isi o tagatanuu o Manu’a o lo o aumau i Tutuila nei ona o galuega ma aoaoga, sa malaga atu e fai aso fiafia ma aiga i Manu’a, ma le fa’amoemoe e  toe malaga mai i Tutuila nei i le vaiaso fou.

 

O le tolu ai lenei o kerisimasi sosoo i Amerika Samoa e le i toe tula’i mai lava se fa’alavelave matuia e a’afia ai se soifua o se tasi, sei vagana ai fa’alavelave e lua na tula’i mai i le Masefau i le po tonu o le kerisimasi o le 2011, lea na maliu ai se ali’i ina ua ta e se isi ali’i i se fagupia, ma le isi fa’alavelave na tula’i mai i Aunu’u ina ua mae’a le kerisimasi o le tausaga lava lea, na fasioti ai e se ali’i e 45 tausaga le matua lona lava uso ma’i sa tausi i lo latou aiga.

 

O le fa’aiuga o ia mataupu na fa’asala ai e le fa’amasinoga ni ali’i se to’alua i le toese i Tafuna, ina ua ta’usala i laua i le moliaga o le fasioti tagata i le tulaga lua.

 

E tasi le isi fa’alavelave na manu’a tigaina ai se ali’i i se agaese i le tausaga fou na se’i mavae atu nei, ina ua musu le ali’i na manu’a e ave le ‘flash drive’ o lo o i ai pese e fa’alogologo ai le ali’i ua molia, ma alu atu ai loa le ali’i sa molia ma se naifi ma fa’ao’olima ai i le ali’i na manu’a.

 

Ao aga’i atu ai i le fa’amanatuina o le aso o le tausaga fou i lenei tausaga, ua mae’a ona lapataia le mamalu o le atunu’u aemaise lava i latou o lo o tagofia le ava malosi, ina ia fa’aeteete i le tagofia o le ava ma ave le ta’avale.

 

E pei ona maitauina i luma o le fa’amasinoga i le tele o mataupu tau solitulafono o lo o faagasolo ai, o le tele lava o mataupu tau solitulafono, e mafua mai lava i le ‘ava malosi, ma i’u ina sese ai fa’aiuga fai a i latou o lo o a’afia i le solitulafono, ma i’u ina latou soli ai loa ma le tulafono.

 

I le vaiaso na te’a nei, na matua fautuaina malosi ai e le afioga i le ali’i fa’amasino ia Elvis P. Patea ni isi sa lau a latou fa’asalaga nofovaavaaia, ina ia tau mamao ese mai lo latou tagofia o le ava malosi i taimi o aso fiafia ua tatou i ai.

 

Na fautuaina e Patea ni ali’i se to’alua e fa’apea, e le avea le naunau e fa’amanatu aso fiafia ma auala e soli ai poloaiga a le fa’amasinoga, aua so o se tasi lava e gau pule i so o se poloaiga a le fa’amasinoga, o lona uiga o le nofosala i le toese pe afai ae fa’amaonia lona le usitaia o poloaiga a le fa’amasinoga.

 

Ua lapataia fo’i le mamalu o le atunu’u ina ia fa’aeteete i le tulaga fa’aletonu o lo o i ai tala o le tau i le fa’aiuga o le tausaga, ma ia tapenapena mo so o se auala e puipuia ai maota ma laoa pe afai ae tula’i mai ni foliga fa’aletonu o le tau i le fa’aiuga o lenei tausaga.