Ua fa’amaonia mai e le Ofisa o Tagata Matutua i Pago Pago (TAOA), o le a leai ni pepa taumafa (food voucher) e tufatufaina mo le masina fou o Me, 2014, ona o lea ua sauni le Ofisa mo le fa’atinoina o le suiga i le polokalame e pei ona i ai taumafa vela, ma ua mana’omia ai se fa’asaosao o se vaega tupe tele e fa’atino ai le fa’ataunu’uina o lenei suiga.

Na taua e e sui o le TAOA e fa’apea, o le fuafuaga ina ia taofia le tufatufaina atu o pepa taumafa mo le masina o Me, o se fuafuaga sa tuuina mai e le Ofisa o lo o faatupeina maia le polokalame mai le Feterale, ona o le manatu ia lava tapenaga mo le amataina o le suiga e pei ona fuafuaina i le polokalame fou.

Ina ua ulua’i fa’alauiloa e le TAOA le suiga lenei i le amataga o le tausaga nei, na taua ai e le afioga i le alii Fa’atonusili ia Ale Tifimalae e fa’apea, o le suiga ina ia tufatufa atu taumafa vela i tagata matutua, o se fautuaga sa tuuina mai e le ofisa a le feterale o lo o faatupeina polokalame mo tagata matutua, ina ua maitauina, toe lava o Amerika Samoa le teritori a le malo tele o lo o faaauau pea ona maua pepa taumafa, ae o isi teritori ma setete uma o lo o tufatufa ai taumafa vela, ona manatu ai loa lea o le Ofisa, ua tatau ona aloaia ma usitaia le fautuaga ina ne’i avea ma itu e faaletonu ai le vaega tupe o lo o tuuina mai e le malo tele mo lenei polokalame.

Ua poloaina tagata uma ua atoa le ta’i 60 tausaga le matutua ina ia faafesootai le Ofisa o le TAOA i Pago Pago mo ni isi faamatalaga e faatatau i lenei polokalame fou.

O le aso 2 Iuni 2014 lea ua faatulaga e tatau ona amata tufatufa atu ai taumafa vela mo tama ma tina matutua i nofoaga eseese o le a lautogia mo lenei faamoemoe.

E pei ona silafia, o le suiga lea ua faia e le TAOA i polokalame a tagata matutua, o se suiga sa fautuaina e le Ofisa o le Feterale o lo o faatupeina mai polokalame mo le TAOA i tausaga taitasi, ona o le manatu, e le gata ia i ai se nofoaga faapitoa e faatasitasi uma i ai tama ma tina matutua i le vaiaso, ae ia maua foi le avanoa latou te mafuta faatasi ai.