E leai se fa’asalaga fa’a falepuipui ua tu’uina atu e le fa’amasinoga maualuga, fa’asaga i le ali’i lea na maua i ai mariuana ina ua taunu’u mai i le teritori i le malaga a le Hawaiian Air i le masina o Me na te’a nei, sei vagana ai le poloaina o ia na te totogi le salatupe, o se tasi lea o tuutuuga o lana nofovaavaaia.

O le tele o taimi e tu’uina atu ai fa’asalaga a le fa’amasinoga fa’asaga i tagata e ta’usala i le umia fa’asolitulafono o ni vaega o fualaau fa’asaina, e aofia ai ma se tuutuuga mo se taimi e tuli i le toese i Tafuna.

O le moliaga o le umia fa’asolitulafono o vaega o le laau faasaina o le mariuana lea ua ta’usala ai le ali’i o Puleniutu Tafaoa, e mafai ona fa’asala ai se tasi i le toese mo le umi e le sili atu i le 5 tausaga, pe fa’asala fo’i i se fa’asalaga tupe e le sili atu i le $5,000, po o le fa’asala fo’i i fa’asalaga uma ia e lua.

Na taofia e leoleo Tafaoa ina ua taunuu mai le malaga a le Hawaiian Air mai Hawaii i le po o le aso 1 Me, 2014, ae maua ai ia te ia se vaega o le fualaau faasaina o le mariuana (liquid tetrahydrocannabino).

Sa maua ai fo’i i totonu o le ato a lona to’alua fatu mariuana e 580, ma taofia uma ai i laua e leoleo, mulimuli ane na toe tatala i tua le fafine sei vagana ai Tafaoa na molia i fualaau faasaina.

Na fa’atoese le ua molia e tusa ai o le solitulafono sa ia faia, ma ia tautino ai i le faamasinoga e le toe tupu lenei mea i le lumana’i, ma ua ia aoaoina foi se lesona taua mai le taimi na tula’i mai ai lenei fa’alavelave.

Na tautino le ua molia e faapea, na te le toe tagofiaina fualaau faasaina, e le manao foi e valavala ma lona aiga.

Sa ia faatoese foi i ona matua aemaise ai lona toalua ma le la fanau, ina ia faamagalo o ia e tusa ai o le solitulafono sa ia faia, lea ua mafua ai ona ta’uleagaina le igoa o le aiga.

Na faailoa e le ua molia i le fa’amasinoga e fa’apea, o lona tina, o se tina e loto alofa ma tausi faamaoni ia te ia, ae o lona tama, o se alii ua lauiloa i le atunuu i galuega kamuta.

Na faatoese le tina o le alii ua molia i le faamasinoga e tusa ai o le solitulafono a lana tama, ma ia talosagaina ai se isi avanoa mo ia.

Na taua e le tina e fa’apea, na tuua e lana tama le aiga ina ua faauu mai i le aoga maualuga i Amerika Samoa, ma la valavala ai mo le 11 tausaga seia aulia le po na toe fo’i mai ai i le aiga ma le atunu’u, ae tula’i mai ai loa le fa’alavelave e pei ona nofosala ai o ia i le tulafono.

O ni isi o itu lelei na faailoa e le tina i le faamasinoga mo lana tama, e le o se tagata e fa’alagolago i matua mo se manuia o lona aiga, ae o se alii e galue malosi ma finau mo le tausiga o lona toalua ma le fanau.

Na talia e le faamasinoga le fautuaga mai le ofisa faanofovaavaaia mo se faasalaga talafeagai mo lenei mataupu, peita’i na faailoa e le alii faamasino sili ia Michael Kruse ia Tafaoa e fa’apea, e ui e laititi se vaega o le laau faasaina o le mariuana sa maua ia te ia, o le itu o lo o pito sili ona mamafa i le manatu o le faamasinoga, o le anoanoa’i o fatu mariuana na sau ma ia i le atunuu.

Na talitonu le faamasinoga o mariuana na maua ia Tafaoa, o mea lava sa ia fuafua e faaaoga mo ia, ae o fatu mariuana e tele sa maua ia te ia, e le o malamalama lelei le faamasinoga pe sa fuafua e fa’aaoga mo ia po o ni isi foi tagata.

Ui o lea, e leai se faasalaga faafalepuipui na poloaina e le faamasinoga ia Tafaoa na te tuliina, sei vagana ai lona usitaia o tuutuuga o lana nofovaavaaia e 5 tausaga, e aofia ai ma lona totogiina o le salatupe e $2,000, ae fa’amalumalu le isi $3,000, fuafua lava i lona usitaia o tuutuuga uma a le fa’amasinoga, e pei o le aua nei ona toe tagofia fualaau faasaina.