I le mae’a ai ona fofoga e le fa’amasinoga maualuga o lana fa’asalaga fa’asaga i le ali’i talavou o Henry Satila Jr i le vaiaso nei, na saunoa ai le afioga i le ali’i fa’amasino lagolago ia Mamea Sala Jr e fa’apea, e naunau le fa’amasinoga ina ia mafai e tupulaga talavou o lo o a’afia i solitulafono ona latou a’oa’o se lesona mai le taimi o lo o taofia ai i latou i le toese, ina ia suia ai o latou olaga ma o ese mai ai i le olaga solitulafono o lo o fiafia le to’atele e fai.

“E tu’u avanoa le fa’amasinoga i tupulaga talavou e pei o oe, ina ia mafai ona e a’oa’oina se lesona mai le mea sese sa e faia, ae afai e te le fa’aaogaina lelei le avanoa ua tu’uina atu e le fa’amasinoga ia te ia, o lou iuga o lou nofonofo ai i le falepuipui fa’atasi ai ma tagata fasioti tagata ma le au toso teine,” o le saunoaga tu’u sa’o lea a Mamea i le ali’i o Satila Jr.

E tolu moliaga mama o le fa’ao’olima i le tulaga tolu na ta’usala ai e le fa’amasinoga maualuga ia Satila Jr, ona o se fa’alavelave na tula’i mai i totonu o le fale kalapu o le Bowling Alley, lea na ia fa’ao’olima ai i se tama’ita’i ma manu’a tigaina ai o ia, faapea ai ma lona taumafai e fa’ao’o manu’a i isi fo’i tama’ita’i e to’alua.

O le mataupu e pei ona ta’usala ai Satila Jr e le faamasinoga na tula’i mai i le po o le aso 14 Tesema 2013 i se latou tafaoga sa alu i le Bowling Alley, lea na ia togiina ai le ulu o le tama’ita’i na manu’a tuga i se ipu malamalama ma mana’omia ai fila e 26 e su’i ai le manu’a sa i lona muaulu, ina ua tula’i mai se tauga upu i le va o lea tama’ita’i ma lona aunty.

Na taua e le tama’ita’i na manu’a i luma o le fa’amasinoga a’o lumana’i le fofogaina o le fa’asalaga a Satila Jr, e ui i le matuia o le gaioia sa faia e Satila Jr ia te ia, ae ua ia maua le loto fa’amagalo mo ia.

Na taua e le tina e fa’apea, i le taeao na soso’o ma le po na tupu ai le fa’alavelave, sa fefe ai si ana tama e tasi le tausaga e vaai atu ia te ia, ona o se mea faapipi’i tele sa fusi ai lona ulu e mafua mai ona o le manu’a sa a’afia ai o ia, ma e o o mai i le taimi nei o lo o ia lagonaina pea le nenefu o lana vaai talu mai ona mae’a le fa’alavelave na manu’a ai.

Na fa’atoese Satila Jr, o lona tama faapea ai ma lona tuafafine i le tama’ita’i na a’afia, ina ia fa’amagalo se sese a le ua molia sa faia.

Na ta’utino le tama o le ali’i ua molia e fa’apea, afai e tuu atu e le fa’amasinoga se isi avanoa mo lona atali’i, o le a faaauau pea lana galuega o le a’oa’i ma fa’atonu o ia, ma saili se isi lumana’i lelei mo ia e pei o le lesitala i le aoga po o le su’e fo’i o sana galuega.

Ae na taua e le tuafafine a Satila Jr e fa’apea, o le ua molia, o se ali’i e filemu ma agamalu i totonu o le aiga, na te fa’amuamua lona aiga aemaise ai ona tuafafine i so o se taimi.

Na tutu fa’atasi loia e talosaga i le fa’amasinoga ina ia fa’asala le ua molia i se fa’asalaga fa’a falepuipui, ina ia mafai ai ona ia maua le avanoa e usita’i ai i ni poloaiga e tu’uina atu e le fa’amasinoga.

Na umi se taimi o iloilo e le afioga i le ali’i fa’amasino sili ia Lyle L. Richmond ma Mamea se fa’asalaga mo le ua molia, ae i le tuana’i ai o le silia i le 10 minute o iloilo se fa’asalaga, na manatu ai loa le fa’amasinoga o le a fa’asala Satila Jr i se fa’asalaga nofovaavaaia.

E tasi le tausaga na manatu le fa’amasinoga e faasala ai le ua molia i le toese, peitai ua faamalumalu lona tuliina o lea fa’asalaga, ae o le a nofovaavaaia o ia mo le 2 tausaga i lalo o poloaiga a le fa’amasinoga.

O ni isi o ia poloaiga e aofia ai lona tuliina o fa’aiuga o vaiaso sosoo e 5 i le toese i Tafuna, amata atu i le faaiuga o le vaiaso nei, mai le itula e 6:00 i le afiafi o le aso Faraile ae tatala i le itula e 6:00 i le afiafi o le aso Sa.

Ua faasa o ia ona ia toe tagofia le ava malosi, faasa ona toe alu i le Bowling Alley, faasa fo’i ona ia toe solia se tulafono a le malo, a ia avea o ia ma tagata nuu lelei e tausi i tulafono, totogi le salatupe e $1,000, saili sana galuega ma ia fa’atoese i le tama’ita’i na a’afia atoa ai ma lona aiga.