O le aso Lulu na te’a nei na faamausali ai e le alii kapeteni ma le auva’a o le Fuao mai Vatia lo latou tulaga siamupini o faigamea i le tai i le tuuga fautasi na taualuga i ai le polokalame o le siosiomaga a le malo, lea na amata mai i le masina o Setema na te’a nei.

O le toatele o le atunuu sa maimoaina le tuuga fautasi, aemaise lava i latou sa i ai i le vaega tonu sa tini atu i ai le tuuga, sa i ai lo latou manatu e le toe see i tua le Aeto mai Pago Pago ina ua oo atu i tua o le maketi i Fagatogo, ma vaaia ai le tau fai taumua tutusa atu o sa nei e lua.

Ae pe tusa toe selau iata taunuu i le pine e tini ai le tuuga, ae faafuase’i loa ona toe faaoso ape foe faatini a le afioga i le Tama’ita’i o le Ao ia Gaoteote Palaie Tofau sa kapeteniina le Fuao, ma vaaia ai loa le toe se’e fa’afuase’i atu i luma o le taumua o le Fuao ma aga’i atu ai lava i le tini, ae toe pau teisi atu i tua le Aeto i nofoa pe a ma le 5.

Na molimauina uma e le toatele o le atunuu sa i ai i le nofoaga na amata atu ai le tuuga i  luma o le ASCO Motors i Pago Pago, e le’i lelei le amataina o le tuuga, ona o le tele o va’a sa i luma uma o le pine a’o lumana’i le pa o le fana.

Ui o lea na taua e se sui o le komiti sa faatautaia lenei faamoemoe ia Marvis Vaiaga’e i le Samoa News e faapea, sa faigata ona toe taofi le tuuga, ina ua vaaia ua tau fai tulioso uma vaa sa pito i luma, ma manatu ai loa le komiti e taatia ai loa faapea le amataina o le tuuga.

Na fai si umi talu ona tini le tuuga a le Fuao ma le Aeto, ae faatoa sosolo atu le Fealofani Samoa III mai Fagasa i le tulaga tolu, sosoo atu ai ma le tuuga a le Faasaulala ma le Iseulaolemoana i le tulaga fa ma le lima, faatoa tini atu ai loa le Matasaua, Fetu o le Afiafi ma le Paepaeulupoo, ma taualuga ai loa le tuuga o lenei vaiaso.

Na faafetaia e le afioga ia Gaoteote  le autu o le faamoemoe o lenei vaiaso, e pei ona galulue faatasi o afioaga e faamama le siosiomaga ma totonu o nuu ma alalafaga.

I le faaiuga la o le tuuga o lenei vaiaso, ua aloaia ai loa le avea o le Fuao mai Vatia ma siamupini; tulaga lua le Aeto mai Pago Pago; lona tolu le Fealoafani Samoa III mai Fagasa; lona fa le Fa’asaulala mai Vailoatai; lona lima le Iseulaolemoana mai Fagatogo; lona ono le Matasaua mai Manu’a; tulaga fitu le Fetu o le Afiafi mai Fagaalu, ma le Paepaeulupoo mai Aua i le tulaga valu.

Na faafetaia e le tamaitai faatonusili o le Matagaluega o le Puipuiga o le Vaomatua ma le Gataifale ia Dr. Ruth Matagi-Tofiga au vaa uma sa tausinio mo lenei faamoemoe, ina ua latou ofoina atu lo latou taimi e faalauiloa ai lo latou lagolagoina o fuafuaga mo le faamamaina o le siosiomaga o le atunuu.

E $8,000 le faailoga tupe na maua e le Fuao; Aeto e $7,000; Fealofani Samoa e $6,000; Faasaulala e $5,000; Iseulaolemoana e $4,000; ma le ta’i $3,000 mo le Matasaua, Fetu O le Afiafi ma le Paepaeulupoo.