Ua fa’amanatuina nei le 15 tausaga talu ona fa’atuina le fale’aiga o le McDonalds i Amerika Samoa. I le fa’amanatuga o le 15 tausaga, ua faia ai se suiga i le si’itia lea o le aofa’i o le Sikolasipi mo fanau ua mae’a filifilia mo nei avanoa taua. O lea suiga ua faia e le CEO o le McDonalds, le afioga Tautolo Charley Tautolo.

“Mai le $1,200 i le tausaga a’oga e tasi o le sikolasipi mo le Kolisi Tu’ufa’atasi, o le a si’itia nei i le $2,000. O le sikolasipi mo iunivesite i fafo ua si’itia i le $15,000 i le tausaga a’oga e tasi. O se fa’ai’uga lea ua mae’a tamau i le saini a le CEO o lenei kamupani,” o se fa’asalalauga lea na fa’ailoa mai e Delores Tautolo Galea’i, sui o le Komiti Fa’afoe o sikolasipi a le McDonalds i le feiloaiga i le aso ananafi.

O le to’alima ua mae’a filifilia nei mo nei sikolasipi, e to’afa mai au fa’au’u o A’oga Maualuluga: Luava’asi’itia Esera mai Leone High, Ferila J. Metuli mai le Tafuna High, Leilani T. Vili mai le Nuuuli Vocational Technical High, Rabunzel Leo mai le Kanaan Fou High. O le to’atasi o nei sui ua filifili mai le fanau e a’o’oga i Iunivesite i fafo mo fa’ailoga maualuluga ua taua’aoina lea ia Lina Su’a ua mae’a fa’au’u mai le Kolisi Tu’ufa’atasi o Amerika Samoa ma o le a ulufale atu i le University of Hawaii i ana a’oa’oga Fa’atausi Tusi.

Na fa’atasia uma atu nei sui fa’apea ma le vasega o sui totino o le Komiti Fa’afoe o le Fale’aiga o le McDonalds ina ia taualoa le sainia o latou konekarate e fa’amau ai a latou sikolasipi mo le tausaga a’oga e afua ia Aukuso, 2015. Na faia lea fa’atasiga i le ofisa o le McDonalds i Fagatogo.

Na auai fo’i matua ma sa iloga lava ona fa’afiafiaina i latou ona o le fesoasoani tele. Sa taua’aoina konekarate ma sainia ona tula’i ai lea o le sui o Matua uma sa aofia, Sualauvi Su’a e molita’i fa’afetai i le pulega, aufaigaluega fa’apea le Komiti Fa’afoe o le McDonalds ona o le latou fesoasoani tupe ua fa’amama avega i fanau.

“O lo outou agalelei, ia alofagia e le Atua o manuia uma, ina ia fa’afualoa le taumafaiga a le McDonalds i lo tatou atunu’u ma ia saga maua ai le manuia mo le Kamupani, ona tagata faigaluega, ae maise lava o avanoa fa’apenei e fesoasoani ai i fanau a le atunu’u mo le fa’alauteleina o latou atamai. Tau ina ia toto se fua lelei i o latou mafaufau, a mae’a a’oa’oga nei, ona toe taliu mai lea e aoga i le atunu’u e fa’amae’a ai lenei tautua matavela ua fai si leva o tausaga, o faia pea e le McDonalds Amerika Samoa,” o se tautalaga lea a Su’a.

Sa i ai fo’i avanoa sa tu’uina i fanau taito’atasi mo a latou tautalaga, ma sa laugatasia lava i latou i le fa’afetai mo le McDonalds aua, “Ua outou fa’atinoina nisi o matou miti sa moemiti ia tu’umamaina i nai o matou matua ma i matou fo’i le totogi o matou pili a’oga. Fa’afetai i le agalelei! O le a avea lenei galuega tele ua tou faia, ma toe faamanatu ia i matou e toe fo’i mai e aoga i le McDonalds ma matou matua ma aiga, ae maise le Malo o Amerika Samoa.”

O le to’atele o i latou ua taua’aoina i ai lenei fesoasoani tupe mo le totogi o a’oa’oga, ua matele ina latou tau’avea a’oa’oga “Fa’atausima’i.”

“Ou te manatu e tau’avea lenei kosi fa’atausima’i, ina ia ou iloa tiute e tatau ona ou faia e tausia lelei ai nai o’u matua aua ua amata ona tino matutua ma ua mo’omia e i latou ita mo lea itu,” o se tala lea a Luava’asi’itia fa’apea fo’i ma le tama’ita’i o Leilani ma Ferila.

E ese mai lea sa latou fa’ailoa mai fo’i, “O lo’o tele le mana’omia o lea tautua i le atunu’u, aua ua fa’ailoa so’o mai ia i matou, e ao ina va’ai i galuega ua utiuti le aofa’iga o tagata o lo’o tautua ai, ae sili ona mo’omia e tagata uma, ae maise tama ma tina matutua o le atunu’u.”

Ona o lo’o fa’aauau lava fo’i ona totogia sikolasipi a isi fanau sa mua’i maua nei faamanuiaga i le tausaga ua te’a ma isi e fa ua tuana’i, o lea, pe afai e aotelega le tupe fa’aalu a le McDonalds i avanoa fa’asikolasipi mo fanau a’o’oga e $72,200 i le fa’ai’uga o le tausaga a’oga 2017.

Ina ia maua’a pea lau sikolasipi lenei mai le McDonalds ua fa’ailoa mai e ao ina e to’aga e fa’aauau ona e ausia le GPA 3.0 i fa’ai’uga o au tausaga a’oga uma i fafo po’o i inei.