O le aso 7 o Iuni na litaea ai mai le Ami ia CW5 Robert Totolua Yandall poo “Koko” lea e valaau ai e ona aiga ma ana uo i se sauniga la’ititi sa faia i le laumua o Toa o le Vateatea, Ft Bragg, North Carolina, o se fa’aaliga lea tusitusia mai lona aiga.

O ia o le alo e fa’asino ia Joseph Yandall o Leloaloa ma Saitaua Ripley Alo Leone. Sa soifua mai ia Iulai 6, 1953 ae sa tauto o ia i le Ami ia Aperila 6, 1972,

O le susugga i le ofisa sinia ia LTC Marcus L. Bates sa faamalumalu ai le sauniga o le litaea ma sa ia saunoa ai o le sao a Yandall o le a faapea ona lagonaina ma vaaia pea i ni tausaga se tele aua o ana tusitusiga o lea ua faaoga e le Ami e faavae ai galuega i le matata lea sa galue ai o ia faapea ai le to’atele o tagata  sa a’otauina e Yandall.

E silia ma le 20 sui o vaega sa galulue ma Yandall sa auai atu ile faatasiga e faaleo ma momoli a latou meaalofa e tusa o le sao a Yandall sa faia mo latou vaega ae maise ai fitafita sa faapea ona ia a’oa’oina. 

O se tasi o ia meaalofa o se faava’a tele o iai tusi sa tusia e Peresitene e to’alima o Amerika lea o lo’o soifua mai nei e faamalo atu ai ia Yandall e tusa o lona sao a’o la na tautua mo le malo o Amerika.

Sa faapea fo’i ona iai se tusi sa tusia e le Tofa ia Faleomavaega Eni Hunkin, e momoli atu ai ona saafiafiga a’o le agaga faafetai ia Yandall mo lana tautua matavela e le gata  o le malo o Amerika a’o lona sao mo Amerika Samoa. O MAJ (RET) Tuimavave Tauapai Laupola  sa auai atu e tuu aloaia ia le I’ugafono tuufaatasi a le Maota Fono o American Samoa e faafetaia ai le tautua a Yandall mo le malo o Amerika faapea tagata nuu o Amerika Samoa ae maise ai se alafua matagofie mo alo o le Atunuu. 

Sa faapea fo’i ona tuuina atu ai ma se tusi sa sainia e le afioga i le Lutena Kovana, Lemanu Peleti Mauga, mo le afioga i le Kovana, Lolo Matalasi Moliga ae maise ai tagatanuu uma o Amerika Samoa e faafetaia ai le tautua a Yandall mo nei tausaga e tele.

Na saunoa Yandall e faafetai aloa’ia le aofia i lena aso; sa ia lagona le faatauvaa ona o le alofa ma le agalelei o le Atua i faamanuiaga ua ia maua ua mafua ai lenei aso; e le gata i lea o le faafetai mo e uma sa latou galulue i so’o se tofiga a le Ami i nei tausaga e tele mo le latou sapaia a’o le lagolagosua ua manuia ai mea uma.

Sa ia faafetaia le Ekalesia Faapotopotga Kerisiano o Fayeteville/Ft Bragg mo mea uma ae maise ai lava le atina’eina o le ekalesia e fesoasoani i Fitafita Samoa o su’e faalumaga mai i le laumua o Toa o le Vateatea.  O Yandall, o se tasi lea o e sa amataina ma faatuina le EFKAS Fayeteville/ Ft Bragg.

Sa ulufale Yandall i toleniga amata a le Ami ile nofoaga i Ford Ord, Kalifonia ma Ft Lee i Virginia, o se fa’amatalaga lea tusitusia mai lona aiga, o lo’o taua ai foi le tele o tausaga o lana tautua i le Ami ma nofoaga sa si’itia i ai.  Ua le gata i lea sa tautua foi i le tau-a i Iraki Afakanisitana.

O nisi o pine sa maua ona o lea tautua: Legion of Merit, Bronze Star, Defense Meritourious Medal, Army Meritorious Service Medal; Army Commendation Medal; Army Achievement Medal; Master Parachutist Badge.