Ua fa’aopoopo mai fo’i lenei fa’alapotopotoga i le taumafaiga a le atunu’u e soloia gasea o le ma’i faigata o le Kanesa, lea ua matele ina maliliu ai nisi o tatou tagata, peita’i, o lea fa’apotopotoga, e ese teisi lava lona fa’avae mai isi taumafaiga uma, ona ua i ai le tamau o loo ola fa’atuatua ma fa’alagolago e te toe ola i lou fa’atuatua.

“O le aso ou te mata’u ai, ou te fa’atuatua ai ia te Oe!” O le tagi lea a Tavita i lona Atua, peita’i, ua avea lea mau ma mea e aga i ai togafitiga, vaifofo ma le fa’amalosi’au a le Live Cancer Foundation.

Ua fesiligia, pe mata na malolo nisi sa latou taumafai i ai, o le tali ua fa’ailoa mai, “Ioe.” O le tama’ita’i o Seira Live, ua fa’ailoa mai e ia, “O a’u na to’ai taunu’u mai i ai se fa’aaliga fa’apitoa a le Tina Pa’ia o Maria, i le afiafi tonu na gasetoto ai le masina i le tausaga ua te’a, Aperila 14, 2014. Na fa’ailo mai ai Maria i lena po ma sa maua i le ata na pu’eina e la’u fanau i telefoni.”

Ua fa’ailoa mai fo’i e Seira, “O a’u ua mae’a ona fa’ailoa mai lo’u igoa e fa’auia atu ai talosaga ma mana’oga fa’apitoa mo Tina Maria! O lo’u igoa o Merciful Esther Anamaria Tasila’ula’aaeafeo’utalatogiiutatogiitaifaio’utalaaemama’iai.”

O lana fa’amatalaga, “Ua na’o o a’u o se tasi ua filifilia e avatu le fe’au, ma taumafai e fofo gasegase ua tigaina ai tagata ma avatu le vaifofo fa’aletino fa’apea ae maise le fa’aleagaga.”

O Seira o se tasi e malosi i lona fa’atuatuaga ma le fe’au o lo’o molita’i mai e le Ekalesia Katoliko, ma e aga fo’i fe’au uma i le fe’au fa’apitoa mai ia Tina Maria.

Ua tulata i le isi gasetoto o le masina ia Aperila fo’i, “ua ou sauni fo’i mo le isi fe’au fou, e fa’aauau mai ai le vaega o le fe’au ua mae’a fa’ailoa mai.”

I le latou Fa’apotopotoga Fesoasoani mo i latou e mama’i Kanesa, ua ia fa’ailoa mai, e na’o le to’alima lava aiga ua aofia i lenei fa’amoemoe lelei. O le aiga o Seira Live le tasi, sa sili atu i le to’a 10 aiga sa amatalia mai o aofia ai, ae le gafatia e i latou ona tausia tulafono tamau o lou avea ma aiga i totonu o lea fa’apotopotoga.

“O Tulafono maoti lava, e fa’asa le ulaula, fa’asa le inu i avamalolosi ma ava ma ‘aua lava ne’i a’afia lou tagata ma lou aiga i le lotoleaga.” Ua aga atu nei i la’ua, Seira Live ma le faletua o Jessie Lualemaga e fa’ao’o lea fe’au taua i Samoa, ma sa tu’ua e i la’ua le teritori mo Samoa tutoatasi.

O lo’o fealua’i fo’i Seira ma tau’ave le ata sa ia fa’ailoa mai, sa pu’eina i le ata o le telefoni i le po o le gasetoto o le masina ia Aperila 14, 2014. O le fa’amautuga lea o le valoaga ua latalata le toe afio mai o Maria le tina pa’ia.