Pago Pago, AMERICAN SAMOA — O le aso Tofi ua te’a na faatautaia ai le sauniga o le fa'au'uga mo le fanau fa'ai'uaso e to'a ono a le Manumalo Baptist Academy, ma o se fa'ato'a toe fa'aa'e mai lea o se vasega faau'u mai le vasega 12 talu ona taofia a'o faia nisi suiga i lea laumua.

O i la'ua na fa'au'u ma togi maualuluga e to'alua. O togisilia o le Vasega Fa'ai'uaso na maua e Aomaluoaiga Masunu, o ia o le alo o Yolanda Masunu o Nuuuli. O ona togi GPA 3.75 ma ua sauni fo'i o ia e ulufale i le Kolisi o lana filifiliga i le tausaga a'oga fou ia Aukuso.

O le tulaga lua o John Leulu mai Nuuuli. O lona tina matua o loo fa'ananau i ai lona loto ma ana taumafaiga o Iaeli To'oala, peita'i o ona matua o Asoiva ma Alaso Togafau o Nuuuli lava. O le masina o Setema 2018 o le a tu'ua ai e John lona aiga, ae amatalia lana taumafaiga o se tasi o fitafita o le Fuava'a o le Vaega Au po'o le US Navy. O lana GPA e 3.71.

Aomaluoaiga Masunu 2018 Valedictorian Manumalo Academy Level 12 ma John Leulu 2018 Salutatorian Manumalo Academy Level 12. [ata: Leua Aiono Frost]

Na taitaia le sauniga o le fa’au’uga i le tatalo e Rev. Lemmy Seumanu, o le Faife'au Manumalo Baptist Church.

"Usita'i o le Ala e Taunu'u ai fa'amoemoega ma Taumafaiga” - o le sini a le ‘au fa’au’u. O le 'auga fo'i lea o le tautalaga a le fofoga fa'apitoa mo se toe tima'i i le ‘au fa’au’u. O fofoga malie lava o le vasega fa'au'u, sa latou usuina vi'iga o le Atua i le fa'au'uga.

A'o fa'ai'uii'u le saunoaga fa'afeiloa'i a le tama'ita'i o Tiana Trepanier, le Pule A'oga Manumalo Academy, sa ia fa'alauiloaina le fofoga fa'apitoa mo le vasega fa'au'u, le afioga le Sui Kovana Lemanu Palepoi Sialega Mauga, lea sa ia toe fa'amautuina atili le mau a le fanau, "Usita'i, o le ala e taunu'u ai fa'amoemoega ma Taumafaiga Uma!"

"O lea ua atoa lo outou 18 tausaga, ua le toe sainia e se tasi o nai o outou matua o outou pepa taua, ua talosaga lava e oe lou pepa fanau, talosaga fo'i e oe lou tusi folau, ua o'o lava i lou nofo ai i au a'oga i fafo, o le a e tu'ua malutia o lou tagata talavou i totonu o lou aiga, ae o le a e nofo na'o oe ma fai e oe au filifiliga ma fa'ai'uga i mea uma e aga atu i ai. E tasi lou fa'amoemoega, o lou usita'i lea i fa'atonuga ma le tepnaga sa tima'ia ai oe e nai ou matua ma a'oa'o oe i le olaga Kerisiano e mama mai le tele o mea e te leaga ai. Ia e tutumau i mea lelei ua a'oa'oina ai oe, ua avea oe ma talavou e fiafia mai i ai le Atua,” o se isi lea vaega o le tima'i a Lemanu.

"Filifili lelei au uo, ma ia e iloa lelei fo'i au uo, o latou vaivaiga, ia e iloa ona tete'e ae usita'i oe i lou fa'amoemoe na mafua ai ona e alu ese atu mai lou aiga, ia faia le mea na e alu atu e fa'ataunu'u, e maua pe afai e te usita'i i lou fa'anaunauta'iga lena."

Sa toe fa'amanatu e Lemanu ia i latou, "Aua ne'i galo, o oe o le Samoa, ia toto i lou fatu lena mea, e iloga fo'i tatou o Samoa i so'o se mea e te i ai ona o lau aga o le fa'aaloalo ma le amio lelei, amio pulea i luma o tagata."

"O tatou tagata e amio pulea ma fa'aaloalo, e onosa'i ma mafaufau tonu, e taua ia te oe le mafuaga na e tu'ua ai lou aiga ma lou atunu'u, o i tatou o tagata sailimalo. E fa'atuatua i tatou e le tu'ua i tatou e le Atua i so'o se mea tatou te i ai. A e usita'i i lou fa'amoemoe, ma e fa'atuatua o lo ua silafia e le Atua lou naunau e taunu'u ou fa'amoemoega, e le vale fo'i lou taui lelei mai le Atua!"

O le taua'aoina o latou tusi pasi sa tu'uina lea i le tama'ita'i Puamemea Ifopo, le pulea'oga o le Preschool o Manumalo Academy.

O le taua'aina o tusi pasi fa'apitoa mai le Faipule o Amerika Samoa i le Konekersi a le Malo tele, Afioga Aumua Amata, sa tula'i ai le susuga Howard Hoaward mo le tolaulauina, ae tutula'i Aumua ma le Fa'atonusili o A'oga a le Malo o Amerika Samoa Dr Ruth Matagi-Tofiga, la te taua'aoina i le fanau fa'au'u.

O le vasega fa'aiuaso 2018 mai le Manumalo Academy e aofia ai: Aomaluoaiga Masunu; John Leulu; Taeyon Bae; Connie Craig; Chrysolitetheresa Maiava; ma Kailelei Sesepasara. E to'alua lava sui o le National Honor Society i le fa'au'uga, ua tula'i mai ai Aomaluoaiga Masunu ma John Leui.

O le pese na soso'o ai na usuina lava e le vasega faaiuaso "Taimi o le Matou Olaga!" [Time of our lives] ma sa muamua fo'i ona latou taulotoina le solo fa'aperetania "Promise Yourself." O lea fo'i vi'iga sa latou usuina fa'atasi ma le vasega o fanau a'oga maualuluga uma i le Manumalo Academy.

Ina ua mae'a sa fa'alauiloa le vasega fa'aiuaso ma ua talia fo'i i latou ua pasia lelei a'oa'oga maualuluga ma ua taulimaina tusi pasi e fa'amau lea agava'a mo i latou uma e to'aono. Na talia i latou e Mrs Tish Peau, o se tasi o Suio le Komiti Fa'afoe o le Manumalo Baptist Church.

O le fa'afetai mai le Pulega ma le Aufaigaluega a le Manumalo Academy sa tula'i ai le susuga Papali'i Lauli'i Alofa ma ia fa'ailoa ai, "O lenei le ulua'i vasega 12 ua toe fa'au'uina talu ona taofia vasega maualuluga, ae se'i fai suiga na mana'omia mo le a'oga. Fa'afetai ua ausia lea fo'i la'asaga, ma e leai lava se galuega e leai ni ona fa'aletonu, ae o fa'aletonu na e lu'ia le fa'amoemoe ina ia mafai ona fa'aleleia ma taumafai atili ai mo se atoaga o le tautua."

Sa ia fa'afetaia le galulue fa'atasi mai ona fa'auluuluga o le Malo, e aofia ai le Kovana ma lona sui ae maise o le fa'atonusili o a'oga, ae silisili lava le fa'afetai i le Sui i le Konekeresi, aua ua iloga le fa'ateleina o fesoasoani mo le atunu'u i lenei vaitau. "Fa'afetai saili fa'afetai loto i le tatou malo ma le tulaga taumafai o i ai!"

Sa ia fa'afetaia fo'i matua mo le latou sapaia o mea uma, ma o lo latou sagisagi mai i a latou fanau, ua una'ia ai i latou uma o galulue, ina ia ausia le tele o sini fa'atula'i ia lelei ona a'oa'o le fanau, ma ia maua fo'i e i latou le atamai o sailia.

I le fanau fa'au'u, sa ia fa'ailoa atu i ai, "Sailia au uo i tagata amio lelei, ia faia lau sailiga ma ia e usiusta'i i au sini na fa'atutu ma lou fa'amoemoe mai le amataga o lau taumafaiga."

Ina ua mae'a lea sa tula'i le susuga le Faife'au Pr. Filifa'atali Mike Fuiava mo le toe tatalo fa'ai'u ma mae'a ai le sauniga mamalu i le Manumalo Temple i Malaeimi.

O ana toe upu, "Ia outou usita'i, alo ese mai fuala'au ma vaila'au o'ona e fa'aleagaina ai o outou olaga, aloalo ese i mea leaga uma, ae usita'i i la outou manulauti o le aso, fa'afetai, ia outou manuia."