Loka 6 masina i le gaoi pusa pia
O se alii e 20 tausaga le matua lea na ta’usala i lona gaoia o se pusa pia mai totonu o se faleoloa atoa ai ma lona faaoolima i le faatauoloa, ua poloaina e le Faamasinoga Maualuga e tulia sana 6 masina i le toese i Tafuna, o se tasi lea o tuutuuga o lana faanofovaavaaia e 5 tausaga.
Ua poloaina foi o ia na te totogia le salatupe e $1,000 aga’i i le Faamasinoga, faatasi ai ma le $515 i le pule o le faleoloa.
Na uluai tuuaia e le malo le alii o Dean Liu i moliaga mamafa e aofia ai le faomea i le tulaga muamua, talepe fale i le tulaga muamua, faaoolima i le tulaga tolu, tete’e atu i leoleo ao taumafai e taofia faapagota o ia, faapea ai ma moliaga mama o le gaoi, faaleaga meatotino ma le inupia ae le’i atoa le 21 tausaga Ae i lalo o se maliliega na sainia e Liu ma le malo, sa ia tali ioe ai i le moliaga o le talepe fale i le tulaga lua, gaoi, faaleaga meatotino ma le inupia ae le’i atoa le 21 tausaga le matua, ae solofua e le faamasinoga isi moliaga.
O le masina o Aperila na alu ai se faatauga pia a Dean ae musu le faatauoloa e tu’u i ai ni pia ona ua te’a le 10 i le po. Na tuli e le faatauoloa ia Dean i fafo ma le faleoloa, peitai e lei umi ae toe foi atu Dean ma sana uo, ma la talepeina le faitotoa pito i tua o le faleoloa ae gaoi se pusa pia, sosoo ai ma lona faaoolima i le faatauoloa.
Na fa’atoese le alii o Dean i luma o le fa’amasinoga ma ia talosagaina ai se avanoa mo ia sei toe foi e fesoasoani i lona tina i le faia o feau. Na faailoa e Liu i le faamasinoga e faapea, o le taimi nei, toe lava o lona tina lo la aiga, ua maliu lona tama, ma e leai se isi e faamoemoe i ai lona tina i feau, na o ia lava.
Na tula’i foi le tina o lenei alii ma aioi i le fa’amasinoga mo se avanoa e toe foi atu ai si ana tama i lo la aiga ma o le a ia mataituina ana gaioiga i so o se taimi ina ia aua nei toe aafia o ia i solitulafono.
Na fa’aalia e le loia a Dean, o Leslie Cardin, o se uluai taimi lenei ua solia ai e lenei alii se tulafono, ae na mafua ona ua fa’asese o ia e le ava malosi.
faatoa solitulafono ai o ia, ae o ia foi o se alii talavou o loo i ai se lumanai lelei mo ia i le lumanai, ae ua faaseseina o ia i le ava malosi.