Ads by Google Ads by Google

LOKA LE ALI’I NA SOLI TOFAGA USO LONA TO’ALUA

O le ula lea na tolo tolo ma tago tago i le itutinosa o le uso o si ona lava to’alua a’o momoe si fafine, o lona toalua ma le la fanau i le potu malolo o le latou fale, ua poloaina e le Faamasinoga Faaitumalo le lokaina o ia i le toese i Tafuna mo le umi e 12 aso, ina ua ta’usala o ia i le moliaga o lona tagofia lea o itutinosa o se tamaitai i le tulaga lua.

Na ta’usala e le alii faamasino o John Ward II le alii o Mapu Leota, ina ua ona faia lana faamasinoga iloilo i le vaiaso na te’a nei, ma tuuina atu ai e molimau a le malo faamatalaga e uiga i le mea sa tupu, e aofia ai ma le tina sa aafia i lenei mataupu, ma fofogaina ai loa lona faasalaga i le vaiaso nei.

A’o le’i tuuina mai le faasalaga a le faamasinoga faasaga i lenei mataupu, sa faailoa e le loia a Leota o Fiti Sunia i le faamasinoga nisi o faafitauli o loo tulai mai i le lotoifale o le aiga o le ua molia, peitai na saunoa le alii faamasino ia Ward II, e tatau lava i le aiga o le ua molia ona o latou tausisi i le tausiaina lea o le filemu i taimi uma, ina nei i ai se taimi e avea ai le sa aafia i lenei mataupu ma nisi o lona aiga, o nisi e tuuaia ma faia faasaga i ai ni moliaga mai le malo.

E 120 aso na manatu le faamasinoga e loka ai Leota i le falepuipui, peitai o le a faamalumalu le tuliina o aso ia i le toese, ae o le a faanofovaavaaia Leota mo masina e 24 i lalo o tuutuuga e ao ona usita’i i ai.

O nisi o ia tuutuuga e aofia ai lona tuliina o aso e 45 i le toese, peitai o le a faamalumalu foi, ae lava na o aso e 12 e loka ai o ia i Tafuna.

Ua poloaina Leota, e 6 faaiuga o vaiaso o le a loka ai o ia i le falepuipui, ma o le afiafi ananafi i le itula e 6;00 sa tuuina atu ai o ia i le falepuipui mo le amata tuliina o lana faasalaga, ona toe tatala lea o ia i tua i le itula e 6:00 i le afiafi o le aso Sa, o a taeao lea.

O isi tuutuuga o lana faanofovaavaaia e aofia ai le faasa lea ona ia toe tagofia le ava malosi, faasa ona toe nofo i le nofoaga na tulai mai ai le faalavelave, a ia nonofo ma lona aiga i Leloaloa. Ua poloaina foi o ia na te totogiina le salatupe e $100, auai i aoaoga e faatatau i le tagofia o le ava malosi, o le a faia foi ni suesuega i lona tino ina ia iloa ai na te le o toe tagofia le ava malosi.

O le agaga o le faamasinoga e loka Leota i faaiuga o vaiaso, ina ia maua ai pea le avanoa e alu ai e faigaluega i le aso Gafua e oo atu i le aso Faraile, aua le tausiga o lona aiga, e pei foi ona talosagaina e lana loia fautua ia Sunia.

O lenei mataupu na tofu atu i le faamasinoga ina ua faafesootai e le toalua o le tina na aafia le ofisa o leoleo, ona o se faalavelave na tulai mai i le masina o Mati o le tausaga nei i lo latou fale i Nuuuli, ina ua faateia lona to’alua a’o momoe i le tago tago atu o se tagata i lona itutinosa, peitai ina ua ala i luga sa ia vaaia ai Leota o loo faatu i lalo atu o ona vae o loo tago atu i lona itutinosa.

Na taua e le tina na aafia i leoleo, ina ua ia vaaia Leota o tago atu ia te ia, sa ia fafaguina loa i luga ma lona toalua, Sa ia faailoa foi i leoleo, e le o se taimi muamua lea ua faia ai e le toalkua a lona uso uiga mataga nei ia te ia.

Na taua e le toalua o le tina na aafia i leoleo, pe tusa o le itula e 2:30 i le vaveao lea o le aso Sa, 17 Mati, na te’i a’e ai a’o moe ina ua ia faalogoina ni tagata o loo pisa i fafo o le latou fale, sa tu i luga e vaai ma ia iloa atu ai le isi uso o lona to’alua o loo talanoa ma le isi ona tausoga, ma toe taoto ai loa e moe, peitai na toe tu i luga ina ua ia faalogoina se taavale o afe atu i le fale, ma ia vaaia ai Leota o loo talanoa ma le isi uso o lona toalua ma se tasi o latou tausoga.

Ae pe tusa ua tuanai se afa itula, na ia faalogoina ai lona toalua o loo ia iini lona fatafata, na ala i luga ma ia faalogoina ai lona toalua o palauvale ma tusi lona lima agai i le umukuka, ma ia vaaia ai le ua molia ua savali agai atu i le faitotoa, o loo asoa se solo lanu moana i lona ua.

Na alu atu le toalua o le tina na aafia ma fesili ia Leota pe aisea ua ia tago ai i le itutinosa a lona toalua, peitai na palauvale atu le ua molia ia te ia, ma mafua ai loa ona ia viliina le ofisa o leoleo.

Na taua foi e le toalua o le tina na aafia, e le o se taimi muamua lea ua faia ai e le ua molia le mea leaga lea i lona toalua, ma o loo popole foi lona loto ina ne’i ona faia i si ana fanau teine o loo tutupu a’e.