O le ali'i lea na ia tutu se afi e susunu ai se fala i totonu o le latou fale ma le fa'amoemoe e susunu atu ai ma le latou fale, a'o i ai lona to'alua ma le fanau, ua taofia i le falepuipui i Tafuna mo le 12 masina, o se tasi lea o tu'utu'uga o lana nofovaavaaia e 5 tausaga, ina ua ta'usala o ia i moliaga mamafa e lua o le susunu fale i le tulaga tolu, atoa ai ma le fa'aleaga meatotino i le tulaga tolu.

E ui na fa'atoese le ua molia e tusa ai o lana solitulafono sa fai, peita'i na finau le loia a le malo ina ia loka o ia mo le umi e 20 masina, ona o le matuia o le gaioiga sa ia faia, i lona taumafai lea e susunu le latou fale a'o i ai lona to'alua ma le fanau.

Na taua e le loia a le malo o Jessica Bargmann i le fa'amasinoga e fa'apea, o le gaioiga sa faia e lenei ali'i, na matua tupu ai lagona fefe i le loto o lona to'alua, ma ua aveese ai le toe talitonuina o ia e lona to'alua ma lana fanau, o ia e malupuipuia ai le aiga atoa.

Na talosaga le to'alua a le ua molia i le fa'amasinoga mo se avanoa e toe tatala atu ai lona to'alua i tua, e saili sana galuega e tausi ai le aiga, sa ia taua fo'i e fa'apea, e ui sa fefe i lona to'alua i le taimi na tula'i mai ai le fa'alavelave, ae na avea taimi na asia ai o ia a'o taofia i le toese ma itu ua toe suia ai ona lagona fefe, ae ua oo ia te ia lagona fa'amagalo.

Na taua e le ali'i loia fautua ia Michael White na tula'i mo le ua molia e fa'apea, e mana'omia ni a'oa'oga fa'afaufautua e aoga ma fa'au'u mai ai le ua molia, ina ia mafai ai ona fautuaina lona mafaufau i fa'aiuga talafeagai e tatau ona ia faia, pe a o o i le taimi e tula'i mai ai le loto ita ia te ia.

Na talia e ali'i fa'amasino le fautuaga a le malo, ina ia taofia le ua molia i le falepuipui mo ni nai masina, se'i mafai ai ona ia toe a'oa'oina se isi lesona taua mo lona olaga.

E 5 tausaga na manatu le fa'amasinoga e fa'asala ai le ua molia i le toese i Tafuna, peita'i o le a fa'amalumalu lona tuliina o lea fa'asalaga, ae nofova'ava'aia o ia mo le 5 tausaga i lalo o poloaiga a le fa'amasinoga e ao ona ia usita'i i ai.

O ni isi o ia poloaiga e aofia ai lona tuliina o masina e 20 i le toese i Tafuna, peita'i, ua manatu ali'i fa'amasino ua lava masina e 12 e taofia sa'o ai loa lenei ali'i talavou i le falepuipui, e fai ma lesona o lana solitulafono sa faia.

Ua fautuaina o ia e auai i ni aoaoga e fesoasoani ai i le ita, ma ia aua ne'i ona toe fa'afefeina lona to'alua ma lana fanau, po o le toe faia o nisi gaioiga e ono fefefe ai latou.

E $2,000 le salatupe lea ua poloaina e le fa'amasinoga le ua molia e totogi, i totonu o le tausaga e tasi o lana nofovaavaaia, ma ia saili fo'i sana galuega e galue ai mo le tausiga o lona aiga a'o tuli ai lana fa'asalaga.