O le ali’i leoleo lea na ia kikia foliga o le ali’i pagota na sola i tua mai le toese i Tafuna i le tausaga na te’a nei, ua taofia nei i le toese i Tafuna mo le 90 aso, o se tasi lea o tuutuuga o lana nofovaavaaia e 24 masina.

O le masina na te’a nei na ta’usala ai e se vaega iloilo iuga le ali’i leoleo ia Siavana Nuusila i moliaga mama e lua, o le fa’ao’olima i le tulaga tolu atoa ai ma le fa’atupu vevesi i nofoaga faitele, i le mae’a ai lea ona iloilo e ali’i ma tama’ita’i iloilo iuga o mau fa’amaonia na tu’uina atu e le malo i luma o le fa’amasinoga.

O le masina o Novema 2013 na tula’i mai ai le fa’alavelave e pei ona fa’asala ai e le fa’amasinoga fa’aitumalo i le taeao ananafi Nuusila, ina ua o atu leoleo e pu’e mai le ali’i pagota o Joe Togitogi na sola i tua ma le toese, ae alu atu ai le ali’i leoleo ma kiki foliga o Togitogi, i le taimi na taoto ai i lalo a o taumafai isi leoleo e loka ona lima.

Na faatoese Nuusila i le fa’amasinoga e tusa ai o lana solitulafono sa fai, sa ia fa’atoese fo’i ia Togitogi ina ia fa’amagalo se gaioiga sa ia faia na mafua ai ona a’afia o ia.

Na taua e Nuusila e fa’apea, mai tausaga e 15 talu ona avea o ia ma leoleo, e le o se taimi muamua lea ua sosola ese ai pagota mai le toese i Tafuna.

“Ina ua ou taunu’u i le vaega na tula’i mai ai le fa’alavelave, sa ou faia ai loa le gaioiga na ou manatu e sa’o, peita’i ua avea lea ma itu ua molia ai a’u i le tulafono”, o se vaega lea o le saunoaga a le ali’i leoleo.

Na taua e Nuusila e fa’apea, ua aoga le mea na tula’i mai ua ia a’oa’oina ai se isi lesona taua mo lona olaga, ma ua ia sauni fo’i e talia so o se fa’aiuga e tu’uina atu e le fa’amasinoga.

I le saunoaga a le afioga i le ali’i fa’amasino ia Elvis P. Patea, sa ia taua ai le tutusa lelei o mau fa’amaonia na taula’i i ai le vaavaai a ali’i ma tama’ita’i iloiloga iuga atoa ai ma le fa’amasinoga.

O se tasi o ia mau fa’amaonia, o le ese o gaioiga sa faia e isi leoleo i le taimi na latou taunu’u ai i le vaega tonu sa i ai le pagota na sola, faapea ai ma le ese o le gaioiga sa faia e Nu’usila ina ua ia taunu’u atu fo’i i le vaega na tupu ai le fa’alavelave.

I le silasila a le fa’amasinoga, e le gata e le talafeagai (unprofessional) le gaioiga sa faia e Nu’usila i le aso lea, ae na atili ai ona le talafeagai ina ua ia kiki foliga o Togitogi a o loka ona lima i ‘hand cuff’.

Saunoa Patea e fa’apea, o le gaioiga sa faia e Nu’usila, e le gata ua ta’u maualaloina ai galuega lelei o lo o fa’atino e isi leoleo, ae ua aveese ai fo’i ma le talitonuga o tagata lautele, o latou e malu i leoleo o le malo.

Ae o le itu e pito sili ona matuia ai le mea sa faia e le ali’i leoleo, ua avea ai ma itu o le a fa’amaonia atu ai i le atunuu, e moni tala o lo o feavea’i solo i mea o lo o tutupu i totonu o le falepuipui. E le i taua e Patea i lana saunoaga po o a ia mea.

E 24 masina lea ua nofovaavaaia ai Nu’usila i lalo o poloaiga mai le fa’amasinoga. O ni isi o ia poloaiga e aofia ai lona tuliina o aso e 90 i le toese i Tafuna, faapea ai ma lona auai i ni aoaoga e fesoasoani ai i le tulaga o le ita. Ua fa’asa fo’i ona ia toe solia se tulafono a le malo.