O le ogatotonu o le feau o le kerisimasi ma le tausaga fou, e pei ona tu’uina mai e le afioga i le Kovana Sili ia Lolo Matalasi Moliga i le vaiaso nei, ia avea le Kerisimasi o se taimi e alolofa ai le atunu’u i o latou aemaise ai uo ma e pele, ma ia tufa atu ai le feau o le fa’amoemoe i so o se tasi o lo o ia mana’omia lea fesoasoani.

Saunoa Lolo e fai ai ma sui o le faigamalo a Amerika Samoa, o le fa’amanatuina e le atunu’u o le kerisimasi i tausaga ta’itasi, o se auala lea e fa’amanatu ai pea le soifua manumalo o le Mesia, lea na ia aumaia le fa’aolataga i le lalolagi.

Na taua e le ali’i kovana e fa’apea, ua avea le feau o le fa’amoemoe na tu’uina mai e le Atua i le lalolagi, ma auala ua mausali ai le talitonuga o le lalolagi ma Samoa, e mausali le alofa o le Atua i le lalolagi.

“Ua ia tu’uina mai ai le meaalofa lea, ua toe tatala ai faitoto’a o le lagi e ala i le fa’amagaloina o a tatou agasala il e maliu ma le toe tu o lona Alo o Iesu Keriso”, o se vaega lea o le feau mai le alii kovana o le malo.

Saunoa fo’i le ali’i kovana e fa’apea, o le vaitau tonu lenei e mafai ai ona feagalelei a’i tagata uma, e ala i le fetufaa’i o meaalofa ina ia fa’ailoa ai le moni o le alofa naunau o matua i fanau, faapea ai uo ma e mamae.

Na fa’aaoga e le alii kovana le feau mo le kerisimasi o lenei tausaga, e momoli atu ai alofaaga i Toa o Samoa o lo o tautua i vaega au a le malo tele, fa’apea ai uo ma aiga Samoa uma o lo o aumau i soo se vaega o le lalolagi, ina ia latou maua se kerisimasi fiafia ma le manuia, e ala i le fa’atasi atu i ai o le Atua.

Saunoa Lolo i lana saunoaga e tatala aloaia ai le Polokalame o Pesepesega a le malo sa faia i le vaiaso nei, o le taua o le kerisimasi i tausaga taitasi pe a faamanatuina, o se avanoa lea e mafai ai ona soifua fefa’amagaloa’i tagata uma, ma ia maua le agaga o le alofa ma le faafetai.

Na taua e le alii kovana le tele naua o fa’amauiaga ua mafai ona maua e aiga taitasi, ona o le foa’i mai le Atua i lenei tausaga, e tatau fo’i la ona toe fa’afo’i le faafetai i le Atua, ina ua mafai ona sapaia e Samoa le tele o ana fa’amanuiaga i le mavae.