O suiga laiti ua vavala mai i le atina’e ma le tamaoaiga o Amerika Samoa i le taimi nei, o se ata vaaia lea o le tali a le Atua i talosaga a le atunu’u atoa, i le taimi na fa’atagisia ai sana fesoasoani i fa’afitauli na semanu e tofu atu ai le faigamalo a le atunu’u i se tulaga pagatia, e pei ona taua e le afioga i le ali’i kovana ia Lolo Matalasi Moliga, i lana saunoaga fa’ata’ita’i o le atunu’u i le taeao ananafi, ina ua tatala aloaia le ulua’i tauaofiaga o le nofoaiga lona 34 a le Fono Faitulafono.

Na tumutumu le Fale Samoa o le Fono Faitulafono i ta’ita’i o le malo, faipule i le konekeresi ia Aumua Amata, ta’ita’i fa’aleaganu’u aemaise ai le mamalu o le atunu’u na lolofi atu e molimauina le sauniga lotu na tatala aloaia ai le ulua’i tauaofiaga a le fono.

O le susuga a Rev. Tavita Mailoto o le Ekalesia EFKAS mai Nua & Se’etaga na ta’ita’ia le sauniga lotu, ma viiga o le Atua na lagiina lava e le aufaipese a le Ekalesia.

Na fa’amamafa e le ali’i faifeau le tusi a Mika ma ia fa’ataua ai fuaitau faapenei “ia fai le fa’amaoni, ia naunau i le alofa, ma ia feooa’i ma lou Atua ma le loto fa’amaualalo”.

E tele vaega na aofia i le saunoaga a le alii kovana, i suiga ua i ai le tamaoaiga ma le atina’e o le atunu’u i le taimi nei, atoa ai fo’i ma moemitiga mo le manuia o le faigamalo a Amerika Samoa i le lumana’i.

Na toe fa’atepa e le ali’i kovana le fono faitulafono i lana saunoaga i le aso 14 Ianuari 2013, lea sa ia taua ai e fa’apea, e ui sa lagona lona fiafia ina ua pale mai i le ta’ita’iina o le malo, peita’i sa i ai ona lagona popole sa i ai, i le tulaga fa’aletonu ma le pagatia sa i ai le tamaoaiga ma le lumana’i o le faigamalo i lena vaitau.

“E le gata sa tula’i mai fa’afitauli i le itu tau tupe a le malo, ae o isi fo’i fa’afitauli na ali ali mai e pei o le sauni o le faletupe o Hawaii e fa’amavae ese, peita’i sa tatou tutu fa’atasi e lafo i le Atua mafatiaga sa tatou feta’iai, lea la ua tali fa’aalia’i mai le Atua i talosaga a le atunu’u, ma aumai ai le tali fa’aaliali mo tatou”, o se vaega lea o le saunoaga a le ali’i kovana.

Na fa’afetaia e Lolo le atunu’u atoa e aofia ai ekalesia ma le aufaigaluega a le Atua, aemaise ai fo’i tama ma tina o lo o tu’i mai le mulipapaga, e tusa ai o talosaga molia i le Atua, ina ia alofagia le faigamalo a Amerika Samoa.

E le i gata i le fono faitulafono le fa’afetai a Lolo, ae sa ia fa’afetaia fo’i le afioga i le Fa’amasino Sili ma le vaega o fa’amasinoga, fa’apea ai le Lutena Kovana ma le Kapeneta, aemaise ai o fa’auluuluga o ofisa ma lala tumaoti a le malo, ma le atunu’u atoa, i le galulue fa’atasi lea mo le manuia o le atunu’u.

Saunoa le ali’i kovana e fa’apea, e ui sa amata faigata le 2013 ma fa’asolo mai i le 2014, ae o lea lava ua tali fa’aalia’i le Atua ma aumai ni nai suiga feololo e fesoasoani ai i le faigamalo ma le atunu’u.

Na fa’aaoga fo’i e le ali’i kovana le avanoa sa ia maua e fa’afetai fa’apitoa ai i le tofa a Faleomavaega Eni Hunkin e tusa ai o lana tautua mo Amerika Samoa, i le silia ai i le 20 tausaga i totonu o le fono faitulafono a le konekeresi a Amerika.

Saunoa Lolo e fa’apea, e le gata sa tele mea lelei na mafua mai i le tautua a Faleomavaega, ae sa molimauina fo’i suiga tetele na afua mai i lana auaunaga.

O ni isi o suiga laiti sa mafai ona molimauina i le tausaga na te’a nei e pei ona saunoa Lolo, e le gata ua fa’amatu’u mai e le feterale ni isi o fa’amanuiaga tau tupe mo Amerika Samoa, ae ua mafai ai foi ona vava lalata le galulue soosoo tauau ma le Ofisa o le Initeria, e ala i le malaga asiasi mai o le Sui Failautusi i le tausaga na te’a nei.

Na fa’ai’u le saunoaga a le ali’i kovana i lona talosagaina lea o le atunu’u atoa ina ia nonofo tatalo pea mo le manuia o le faigamalo a Tututuila ma Manu’a i le lumana’i.