O le Lotu a Tamaiti na se’i mavae atu nei a le fanau uma o le afio’aga o Leone i le Ekalesia Fa’apotopotoga Kerisiano i Amerika Samoa ua latou fai taulaga, tofu sao i mau tauloto, fai pesega ma vi’iga i lo latou Atua, ae tainane ua molimau i le Upu, mo le toe tausaga lenei e va’aia ai le malumalu tuai “Mauga Paia o Siona” a’o le’i toe fa’afouina lona taualuga, ina ia fa’amalosia atili, atoa ai ma nisi suiga lelei i ona fa’amalama ma le tino atoa.

“E le’i i ai se fuafuaga, e tu’u i lalo le malumalu, e le taitai ona matou pasia lea tulaga, ua na’o ni nai galuega e toe fa’amalosi lelei ai le pito i luga o le malumalu, ma ia saga toe fa’aleleia ona puipui sima, atoa ai ma fa’amalama uma lava,” o se fetalaiga lea a Fiu Johnny Saelua, o le ta’ita’ifono a le EFKAS i Leone.

“Ona o se lipoti maumaututu a le aumalaga mai UH Manoa sa latou su’esu’ea atili le fausaga o le malumalu ma sona malosi o i ai e fa’ataututu atu ai i ni mafui’e tetele ma galulolo, lea sa mafua ai ona fa’atino lenei galuega toe fa’amalosi le fausaga o le ‘Mauga Pa’ia o Siona’,” o sana toe fa’aopoopo mai lea.

O le Komiti Fa’afoe a le Ekalesia i lenei tausaga, ua tula’i mai ai fo’i le tofa Taeaoafua Dr. Meki Solomona i le tofiga Failautusi, ma ua fa’aalia fo’i lona taofi e tusa o le toe fa’afouga o le Malumalu, “Ioe le lagona i le fia fa’amalosia o le tino o le Malu o le Atua i le afio’aga, o se taulaga o le agaga mo alo uma o le afio’aga, aua e tusa pe ua motusia le mafuga ma matua i le olaga nei, ae o se toe fa’atepa lea ia i matou uma, o galuega fa’atino a matua ma tua’a o lo’o tutula’i pea e fai ma va’aiga i le olaga nei,” o se tala lea a Taeaoafua.

O le tatalo fa’apitoa fo’i mo fanau ua o’otia o latou loto ona o mafutaga tete’a i totonu o latou aiga, e ala i tete’aga o matua, pe ona o le malaga a le maliu ma le oti, ua amia ai e pele ia i latou i lea lava aso. Sa manatua ai fo’i le tama o le galuega i le EFKAS i Amanave i le tina ma le fanau loto fa’anoanoa, aua ua amia le tama ae tu’ua le galuega ma le aiga, ae ua toetoe lava tulaueleele i lenei Lotu a Tamaiti.

Na manatua le moliga’o o le olioli ma le fa’afetai a le fanau i lenei tausaga, aua o lo’o tumau le fiafia i totonu o mafutaga a nei fanau uma e to’atele ma ua saunia ai i latou ma le agaga fa’afetai, le vi’iga i le Atua i lea taeao matagofie, e fa’asino mo i latou le fanau.

I le polokalama fa’asolo na pepese fiafia le fanau ma le vasega o aiga ua fa’asolo o latou sao i le sauniga o le taeao ma le sauniga afiafi.