E lua tofiga tetele a le afioga i le ali’i kovana ia Lolo Matalasi Moliga na fa’alauiloa i le vaiaso nei mo le Matagaluega o le Puipuiga o le Saogalemu Lautele, ina ia mautinoa e manuia pea le auaunaga a le Matagaluega mo le tautuaina o le atunu’u.

O ia tofiga e aofia ai le tofia o le tofa a Tauese Va’a Sunia e avea ma Ta’ita’i Leoleo (Chief of Police), ae tofia le susuga a Vaimaga Maiava e avea ma Sui Komesina o Leoleo.

Talu mai le taimi na litaea ai le Sui Komesina o Leoleo sa i ai o Leseiau Laumoli i le masina o Aperila o le tausaga nei, o le ulua’i taimi lea fa’atoa tofia ai se Sui Komesina e sui tulaga ia te ia, le tofiga sa ia tauaveina mai mo le umi e 29 tausaga.

SUI KOMESINA O LEOLEO

Na taua e Lolo i lana poloaiga sa tu’uina atu i le aso 2 Tesema 2014 e fa’apea, o le tofiaina o Vaimaga e avea ma Sui Komesina o Leoleo, o le a gafa ai o ia ma le fa’atinoina o tiute uma e fitoitonu i le Sui Komesina, e pei ona fa’amanino mai i lalo o le tulafono.

O isi tiute tauave a le Sui Komesina o Leoleo e pei ona fa’atulaga mai i lalo o le tulafono e pei ona saunoa le ali’i kovana, e aofia ai lona tauaveina o tiute ma galuega e fa’atonu atu e le kovana, e aofia ai ma lona fa’atinoina o tiute a le Komesina o Leoleo, i so o se taimi e toesea ai le Komesina mai le ofisa po o le atunu’u.

Na taua fo’i e Lolo i lana poloaiga lona tofia o Vaimaga na te fa'atinoina tiute tauave uma a le komesina o leoleo o lo o fa'atulaga mai i lalo o le tulafono, atoa ai ma le la galulue soosoo tauau ma le komesina i so o se taimi, ina ia mautinoa e tulaga lelei le auaunaga a le matagaluega i le tautuaina o le atunu'u.

O le poloaiga a le ali’i kovana sa tufatufaina atu i lala uma e tolu o le faigamalo a Amerika Samoa, mo lo latou silafia o suiga ma tofiga ua faia i le Ofisa o Leoleo.

TA’ITA’I LEOLEO

O se poloaiga na sainia e le ali'i kovana i le aso 2 Tesema 2014, sa ia taua ai foi lona tofia aloaia o le tofa a Tauese, i le tulaga lea sa tauave e le susuga a Vaimaga, lea ua tofia e avea ma Sui Komesina o Leoleo.

Na taua e Lolo e fa'apea, o tiute tauave uma a le Ta'ita'i Leoleo, e tatau ona fa'atinoina ma le fa'amaoni, ina ia tusa ai ma fa'atonuga uma e tu'uina atu i ai e le Komesina o Leoleo atoa ai ma le Sui Komesina o Leoleo.

O le fa'amalosia o le tulafono atoa ai ma tiute tauave a le Komesina ma le Sui Komesina o Leoleo, e tatau ona galulue va'ava'alua fa'atasi ma le Ta'ita'i Leoleo, ina ia lelei la latou fesootaiga i soo se taimi e faatino ai a latou tiute i lalo o le tulafono.

O tofiga e pei ona fa'alauiloa e le ali'i kovana, fa'atoa mafai ona toe suia pe afai e toe tu'uina mai se isi ana poloaiga.