Ona o le masina o Novema ua fa’amamafa i ai tima’iga, gaoioiga ma taumafaiga ina ia fa’autagia e le mamalu lautele o Amerika Samoa, e tau taofiofi mai le maua o tagatanu’u i le Ma’i Suka, ua faia fo’i le vaega a le afioga le Kovana Sili ma le faigamalo, ua avatu fa’apoloa’iga, “Ia fa’autagia, taofi ma tineia le Ma’i Suka i o tatou tagata.”

Lona lua, ua amata mai i fanauiti e le’i taitai ona maua i nei ma’i, ua a’afia laiti lava i latou, ma e le toe te’a ese ai i latou mai lo latou ola ma a’afiaga o le ma’i suka i o latou tino.

I fa’amaumauga a le WHO a le UNO, ua fa’amauina ai Amerika Samoa e matele ina vave mamafa o tatou tama’ita’i, ma e matele ina mamafa e amata i o latou manava se’ia o’o i vae. O tina papalagi, e matele ina mamafa pito i luga o latou tino.

Ese mai lea, e tusa ma le 52.3%o i latou e ma’i suka i le teritori o tama, ae o le 42.4% o tama’ita’i e afua mai le 25 tausaga se’ia o’o i le 64 tausaga le matutua. Pe afai ae toe tu’u atu i ai ma le Ma’i Toto Maualuga e lualuagia ma le Ma’i Suka, o le isi la lena faitau aofa’i sili ona maualuga ai Amerika Samoa i le vasa pasefika.

Ua mae’a fa’atulaga gaoioiga a le Ofisa o le Ma’i Suka i le teritori i lenei masina, ma ua fa’atulaga le latou Kalena na amatalia i galuega tima’i ma siaki toto o tagata lautele i le amataga lava o le masina mai nofoaga e tumutumu i ai le atunu’u e aofia ai: TAOA, Falema’i i Tafuna, ma le talavai a Tina Ma’itaga.

Ua mae’a fa’atalatalanoa nei fa’afitauli ma galuega puipuia mai o se tasi i le maua i le Ma’i Suka i luga o le alaleo  KHJ ma le KSBA92.1. E le gata i lea, sa latou o’o ane i le EOB mo le sailiga o e uma o lo’o feoa’i pe o maua i lea gasegase, ae tima’ia e o’o atu mo talavai amata.

O le aso 22 Novema e amatalia ai le savaliga tele e fa’alalo ai le Ma’i Suka e fa’atini atu i le Malae i Suigaula ma faia ai fo’i fa’amalositino fa’aopoopo, ae o’o ai i le aso Sa Novema 23, faia le sauniga lotu i le malumalu Katoliko i Pago Pago. I le toe vaiaso e faia ai fo’i siakiga i le Laufou i Nuuuli fa’apea ma le Ace Hardware i Malaeimi, ma fa’alauiloa ai le laina o feso’ota’iga ina ia avanoa pea le fetufa’iga i le va o le Ofisa o le Ma’i Suka ma nisi e fia fesiligia ni foliga va’aia o lea gasegase ma mea fa’apena.

Amerika Samoa, o le ma’i suka e mafai ona e tineia, pe afai e te tausami i mea’ai tatau ma le paleni, ma ia tele sau fa’amalositino. Peita’i, a o’o ina fa’aletonu tele lou suka, e ao ina e tauaso ai, pe alu ai fo’i lou tino, ma e te vaivai ma e fia moe so’o. Nofouta i tima’iga, ma taumafai e alo ese mai le maua i lea fo’i gasegase tumau.