E to’afa Tama’ita’i Sa ua fa’amavae ma le a’oga Marist St. Fransis i Lepua, ina ua mae’a le latou tautua i le Ekalesia Katoliko Roma Pule’aga Samoa Pago Pago. Ua faia lea tulaga, ina ia usita’ia tofiga ua mae’a fa’atulaga e le Komiti Fa’afoe o A’oga a le Pule’aga Samoa Pago Pago, ma ua fa’agasolo ai fo’i le soifua tautua o nei Tama’ita’i Sa i nisi tofiga fou ua vala’auina mai ai i latou i Ausetalia, lea e fa’aautu i ai le vasega o Tama’ita’i Sa Selesianio.

E tusa ai ma se talanoaga ma Sr. Josephine, sa ia fa’aalia ai, “O ituaiga a’oa’oga sa matou ulufale mai ma i matou e fa’atusalia lea i a’oa’oga na fa’atulaga e John Bosco, lea e matele ina fa’aaogaina lava i so’o se atunu’u ua fa’atula’ia ai a’oga a le Ekalesia Katoliko. E aoga tele lea fa’atulagaga i a’oa’oga fo’i i totonu o le Iunaite Setete o Amerika ma latou teritori.”

“O le autu o lea fa’atulagaga o a’oa’oga, e fa’amuamua lava ona mata’u i le Atua ma ia e fa’aaloalo i lou uso a tagata, ia mafai e le tagata ona ola magafagafa i lona si’omaga ma ia faia lona sao a’o soifua e tula’i ma ta’ita’i lona aiga ma ia feoa’i ma lou Atua ma le loto fa’amaulalo ae maise le alofa.” O sana fa’apupulaga lea i lea fo’i ituaiga fa’atulagaga ua a’otauina ai le fanau a’oga i le Malisi Sagato Iosefo i Lepua.

“Po’o le a lava le tofi, po’o le a fo’i le taimi atofa mo le galuega e ao ina faia, e pau le mea e fai e le aufaigaluega e i ai i matou, e le fesili, ae tula’i ma le usita’i, e faia ma fa’ataunu’u ia lelei!” O se molimau ma le fiafia lea a le Tama’ita’i Sa ta’ita’i i le vaega, Sr. Margeret Bentley.

I le amataga o lenei tausaga a’oga, ua amatalia ai lea a’oga i le pule’aga fou ua suia ai Sr. Caroline Tevaga ma ua tu’uva’a ese atu fo’i nei Tama’ita’i Sa Selesinasio e to’afa sa galulue fa’atasi ma Faia’oga ma Matua o le PTA i Marist St. Francis, ae o latou loto fa’afetai e ao ina fa’ailoa mai fa’atasi ai ma fa’amanuiaga i le lumana’i taumafai o le fanau a’oga, ma soifua o matua uma sa latou va’ava’alua i le atina’e ma le fa’atautaiga o le a’oga i Lepua.

E tusa ai ma le molimau a se tasi o matua ua loa o mafuta pea ma nei Tama’ita’i Sa e ala i le tautua i le Ekalesia ma a’oga fo’i a le fanau, sa ia fa’apea ai, “O le tu’ua ai e nei Sisters pule a’oga ma faia’oga o i matou, o se mea e fa’anoanoa ai, o i latou o ni faia’oga lelei tele i le fanau, ma ua iloga le fiafia fa’atasi i ai o fanau ma matua i le latou galuega, o fua fo’i o a latou galuega, e va’aia lava i le fanau, ae afai ua o’o mai le taimi e suia ai le latou tautua, e le fa’apito le mana’o o Marist St Francis, e moni lava latou, e ao ina tula’i ma o e fa’atino lena tautua.”

O le aso Gafua Setema 3, 2012 na tu’ua ai e lenei vasega o Sisters le atunu’u, ae o a latou galuega e mulimuli atu lea ia i latou. O Sisters uma nei e to’afa o le Aiga Sa Selesinasio, na a’oa’oina fa’apitoa uma i latou i Melepone, Ausetalia mo lenei ituaiga o faiva. O Sr. Caroline Tevaga sa mua’i a’oa’oina o ia ma fa’ai’u lelei ana a’oa’oga fa’afaia’oga i le NUS Apia, fa’apena fo’i ma Sister Folola Sala ma ua fa’aauau uma la’ua a’oa’oga i Ausetalia. O Sister Sovita Paulona mae’a fo’i ana a’oa’oga i le NUS ma ua umia fo’i lona fa’ailoga Bachelor of Education ma sa avea uma i latou nei ma faia’oga i Samoa ma Ausetalia i nisi, a’o le’i auina mai e tautua i’inei.

Sa maua fo’i se avanoa o nei Tama’ita’i Sa ma le ekalesia i Lepua e fa’atasi mulimuli ai i le latou sauniga i le aso Sa ua te’a ma sa fa’amavae aloaia ai i latou ma le Ekalesia. Ua fa’apena fo’i ona lolofi ane ai ma aiga ae maise fanau a’oga i lea avanoa e molita’i o latou maeaalofa ma fa’ao’o a latou alofa’aga i nei Tama’ita’i Sa a’o le’i tu’ua le tatou nei Pule’aga.