“E taua tagata Uma!” - Toe Sa’afi mo “Sterling Fuga”

“O le ali’i e manatu nisi e fa’atauva’a, e amio fa’atamaitiiti, e le taualoa i mea e fai, e le taua sana tu’ualalo ma ona manatu, peita’i, ua fetalai lava Iesu. Fa’afetai ua e taofia lenei fe’au mai e popoto ma e mau’oa, ae ua e fa’aaogaina tama valevale e fa’aalia lou finagalo,” o se saunoaga lea a Moseniolo Viane Etuale i lana lauga fa’aumiumi na fa’ao’o mai ai fo’i ma sana molimau taua e tusa o le soifua o Sterling Fuga i totonu o lona nu’u, o lona aiga ae maise i lana tapua’iga, o se talavou Katoliko i Leone, Nuuuli, Pago Pago ma Fagatogo.

O Sterling o le alo e fa’asino ia Vaipuna Siaumau Fuga ma Talosa Selega Fuga, o se tasi sa tautua i le US Marine Corp, ma na mafua ai ona soifua a’e lenei atali’i i totonu o le lotoa a le Vaega Au i Oceanside, Kalefonia ia Novema 22, 1969. E to’atolu ona uso, ae to’alua ona tuafafine peita’i, e maliu o ia e na’o i la’ua ma lona uso matua o Anthony Fuga o fa’atasi ma lo la’ua tina i lo latou aiga i Leone.

I lona toe sauniga, sa vaaia le tumutumu atu i ai o ana uo mamae, o nisi e silafia lelei o ia mai lona nu’u ma lona aiga, ae maise o Failauga eseese o le afio’aga, ma Patele galulue sa fai ma asiasi i ai Sterling i a latou sauniga fai i aso ta’itasi.