MAGALEI: Matou te le 'ai afu
O le feau na finagalo le afioga i le ali’i senatoa ia Magalei Logovi’i e fia momoli ma fa’amanino i le atunu’u, “e le 'ai afu” le maota maualuga e pei ona tu’uaia ai e ni isi o le atunuu i latou, ona o le tulafono lea ua latou pasia e sii ai i le ta’i $10,000 alauni a senatoa ma faipule.
O lea saunoaga mai le ali’i senatoa mai le Itumalo o Tualauta sa tuuina atu i luma o le maota maualuga i le vaiaso nei, ina ua talanoaina ni isi o suiga i le paketi a le malo mo le tausaga tupe 2015, ina ua ia fesiligia le mafua’aga e manaomia ai fua le $65,000 e fa’atupe ai si’itaga o totogi a le kovana ma le lutena kovana, ao lea e lei pasia le tulafono e sii ai totogi.
Ae na fa’amanino e le peresetene o le Senate ia Gaoteote Palaie Tofau e fa’apea, o le tiute lava ia a le Fono o le saili ma fa’atulaga alaga tupe e fa’atupe ai siitaga i totogi a le kovana ma le lutena kovana.
“Ua malamalama fo’i le fesili”, o le toe tali atu lea a le afioga a Magalei i le saunoaga a le ali’i peresetene.
“Pau lava le mea e fia ta’u atu i le atunu’u, o tatou e le ai afu, o lea tatou te galulue e fa’atino tiute mo le manuia o le Fono”, o le isi lea saunoaga a le Magalei.
E le i nofo lelei i finagalo ni isi o senatoa fa’asea mai ni isi o le atunu’u, e tusa ai o le pili e sii ai alauni a senatoa ma faipule lea ua talanoaina i luma o le Fono.
O ni isi o senatoa na saunoa e fa’apea, e le tatau i le atunu’u ona latou soona lalafo fa’aupuga mamafa ma le matuia i tama o le atunu’u, ae o ni isi na taua e fa’apea, e aua le amanaiaina fua muimuiga a le atunu’u, ae fa’asaga pea lava le Fono e fa’atino a latou galuega.
E to’atasi le isi senatoa sa ia fa’atusa finagalo o le atunu’u “o le pola e motu i tua”.
O le pili a le senate e sii ai alauni a senatoa ma faipule, ua maea ona pasia e le maota maualuga ae o lo o faatali se faaiuga a le maota o sui.
E ui e le i lalafo i ai afioga i faipule i le tulafono lenei, peita’i ua fa’alauiloa e ni isi o faipule lo latou le lagolagoina o lenei tulafono.