O nisi o alo o Amerika Samoa o le a toe taliu mai e fesoasoani i le fanau a’oga i Elementary ma A’oga Maualuluga i le vaitau o tu’uaga umi o a’oga, ina ia fa’asoa mai lo latou tomai i fa’agatama o lo ua lauiloa ai latou i Amerika atoa ma le lalolagi.

O Alema Te’o e ta’uta’ua i le Ta’aloga Football, ae o Allen S. Allen o lo ua lauiloa i le Ta’aloga Volipolo. Matua, fai lou sao aoga i taumafaiga a lau fanau o lo’o a’o’oga i le taimi nei, fa’atumu sau pepa talosaga e auai lau fanau i le Troy & Theodora Polamalu Foudation Camp i le Summer Iuni, 2015 i’inei.

ALEMA TEO

O se tasi e lauiloa i le ta’aloga Football, sa ia talanoa ai i le fanau, ma fa’ailoa ia i latou: “O a’u o le tamaititi na a’oa’oina ma fa’atonutonu atu i le tatou malo! O mea uma lava o outou mauaina i le taimi nei, sa le tutusa ma mea sa ou a’oga ane ai. Peita’i na uma la’u a’oga, o’u faigaluega e maua ai lo’u pasese ou te o’o ai i Utah. O’o i Utah o’u alu saili le a’oga Kolisi ou te a’oga ai, savali sa’o lava i le faia’oga football fai i ai ou te fia ta’alo.”

“Ua i ai nei i le tulaga fou, ua avea ma se tasi e fa’atautaia le All PolyCamp i Utah, ua to’atele na’ua faia’oga o le NFL e o atu e saili mai ai latou tama ta’a’alo malosi. Aisea? Leaga e malolosi tino o tama Samoa. To’aga la’ia i le a’oga, ia lelei lau a’oga, e faigofie ona fa’alelei lau ta’alo, ona o tatou tino Samoa e matua ma’a’a lava!”

O lo ua fa’ailoa mai e i la’ua, o le taimi nei, e matua tele avanoa ua maua e le fanau ta’a’alo i Amerika Samoa, nai lo le tele o isi setete, pe afai e to’ai taunu’u mai lea aumalaga o faia’oga, foma’i ma le au faufautua ua tapena mai e le Troy & Theodora Polamalu Foundation ia Iuni, 2015.

“O le totogi fo’i o nei ituaiga camp pe afai e faia i Amerika, e $1,000. ma sili atu, pe afai fo’i e i ai se tama ta’alo NFL e auai e fa’atautaia e pei o Polamalu, o lona uiga e sili mamao i lena totogi, ae o lea ua fa’ao’o mai ia te outou e aunoa ma se tau, ia fa’aaoga lelei lea avanoa, e tima’ia ai outou mo tou filifiliga tatau mo lou lava lumana’i.” O se tala tima’i lea a Alema i le fanau a’oga i Samoana.

ALLEN S. ALLEN

O se tasi o alo o Amerika Samoa, Allen S. Allen, sa soifua a’e i le tatou atunu’u, soso’o ma le o atu o lona aiga i Hawaii, ina ua mae’a lana vasega fa i le aoga a felela. O i a o se tasi o tagata taaloa lauiloa i Amerika i le taaloga o le volipolo.

“O le matou vaitaimi e taito’atasi lava aiga sa i ai se ta’avale, pe o le leai lava fo’i i se nu’u atoa. E fa’asoasoa mai taimi e mumu ai eletise a aiga, e tape le isi nu’u ae ola isi nu’u, e le mumu le eletise i taimi uma.”

O se fita lena sa ola a’e ai i o tatou nu’u ma afio’aga iinei, peita’i, sa avea ma fa’amalosi’au nei mea ia te ia, ona o le manatu, ua maua se avanoa lelei, e ta’alo ai ma taumafai e fa’ailoa o ia o se alo o Samoa.

“O mea laiti na e faia e se tasi e si’itia ai lona nu’u, lona malo ma si ona aiga! A’o outou, ua tutusa pau lava mea ua tou maua iinei, ma le fanau talavou i fafo. Ua outou feoa’i fo’i ma telefoni fe’avea’i, ae o fafo, ua tele na’ua ai le sese o le olaga, o se mea e le o tupu tele iinei.”

O Allen Allen, o se tasi e lauiloa i le ta’aloga o le Volipolo. Na avea o ia ma tama ta’alo a Hawaii i lona vaitausaga o a’oga maualuga, toe fa’apena fo’i i lana a’oga i le Kolisi ma le Iunivesite, sa ta’alo o ia i le Olimipeka, o se matati’a maualuga fo’i lea ua o’o i ai se alo o Amerika Samoa.

Peita’i ua ia fa’ailoa mai, “E mafai ona sili atu mea e mafai ona outou faia mo Amerika Samoa nai lo a’u, aua sa tau leai ni mea i lo’u vaitaimi o la’ititi mai. Ia tele nisi mea silisili tou te faia mo tou aiga, ma lou lava tagata taumafai, nai lo i matou uma lava. O le ala lea o le a’apa mai o Troy ma Theodora Polamalu e fesoasoani mai ia te outou, e ala i lenei summer camp ua fa’atautaia mai e le Polamalu Foundation i Iuni, 2015. Fa’atumu e ou matua lau pepa talosaga mo sou avanoa e kolenia ai oe, a’oa’o i lau ta’aloga ma le atamai, e le vasega o sui taua o le a matou o mai fa’atasi i lena vaitaimi!”