Ads by Google Ads by Google

Malaga mai sui CDC fesoasoani puipuiga fa'ama'i o le ‘Zika’

Na taua e le ali’i foma’i ia Dr. Thane Hancock, o se sui o le Vaega e Puipuia Fa’ama’i Pipisi (CDC) a le fetarale i luma o le maota o sui i le vaiaso na te’a nei e fa’apea, na mafua ona malaga mai sui o le latou Vaega i Amerika Samoa nei, “o le fesoasoani lea i le puipuia o le soona pipisi o le fa’ama’i o le zika virus lea ua fa’amaonia le maua i totonu o le atunu’u”.

 

O le susuga Dr. Hancock, o ia lea o le ta’ita’i o le au malaga e to’a 7 foma’i ma tagata fa’apitoa i le su’esu’eina o le fa’ama’i o le ‘zika virus’ na malaga mai i le atunu’u i le vaiaso na te’a nei, mo le fesoasoani i le puipuiina o le pipisi atu o lenei gasegase.

 

“Afai o le timu le mafua’aga e ala ai ona tele le namu o loo feavea’iina siama o le fa’ama’i lenei, pau la tatou galuega e fai, ia aua lava ne’i toe maua i tafatafa o maota ma laoa ni vaega e mafai ona to’a ai le timu ma fananau ai le namu,”  o le saunoaga lea a Dr. Hancock i luma o le maota o sui.

 

Na faamanino e Dr. Hancock e fa’apea, o le to’atele o tagata i Amerika ua fa’amaonia le a’afia i le ‘zika virus’, o lo o aofia ai ma fafine ma’itaga e lata i le to’a 10, ma o le isi lea taumafaiga o lo o galulue malosi i ai le Ofisa o le CDC i totonu o setete ma teritori o Amerika, ina ia puipuia fafine ma’itaga mai le a’afia i ‘auga o lenei fa’ama’i.

 

O sui o le CDC sa malaga mai i le vaiaso na te’a nei, e tofu i latou ma le tomai i le fa’atinoina o togafitiga eseese e puipui ma tete’e atu ai i le gasegase lenei.

 

Na fa’amanino e Dr. Hancock i luma o le maota o sui e fa’apea, e ui o le fa’ama’i lenei e mafai ona pipisi atu i siama o lo o feavea’i e namu, e tele fo’i le talitonuga e mafai fo’i ona avea tulaga tau feusuaiga i le va o ulugali’i e mafai ai ona feavea’i le siama lenei, ma o le isi fo’i lea auala o lo o fa’amamafa i ai a latou puipuiga, ina ia mautinoa e puipuia fafine ma’itaga mai le a’afia.

 

Na fa’afetaia e le ta’ita’i o le komiti a le falema’i ma le soifua maloloina a le maota o sui, afioga Vesi Talalelei Fautaunu Jr i le aso Faraile na te’a nei le atunu’u atoa sa galulue i le fa’amamaina lea o le otaota i totonu o nu’u ma afioaga.

 

Saunoa atili le ali’i faipule mai Manu’a e fa’apea, o ripoti ua maua mai i le falema’i, o lo o taua ai le fa’afetai aloaia e le Faalapotopotoga o le Soifua Maloloina a le Lalolagi (WHO) le vave o le tali atu a Amerika Samoa e faia gaioiga uma e tete’e atu ai i le fa’ama’i o le ‘zika virus’.