O fuafuaga ma polokalame a le Komiti a le malo o loo gafa ma le fa’ataotoina o auala e fa’aleleia atili ai le atina’e tau turisi i Amerika Samoa, ua atagia mai ai le mamao o le silasila a le malo i le fa’atinoina o soo se auala e fa’aleleia atili ai le atina’e tau turisi i Amerika Samoa.

E pei ona silafia, mai le tele o atumotu o le Pasefika o loo manuia i le atina’e o turisi, o Samoa le isi atunu’u ua maoa’e le malosi o le atina’e turisi i le taimi nei, e le gata ua manuia ai le malo, ae oo lava foi i tagata lautele ma pisinisi tua.

Mo Amerika Samoa e pei ona saunoa Utu Able Malae, o le ta’ita’ifono lea o le Komiti a le malo o loo galulue i le faia o auala e fa’aleleia ai le atina’e turisi i le Fono a le Kapeneta i le vaiaso ua te’a e fa’apea, ua amata nei galuega mo le toe fa’aleleia o isi atina’e e va’ava’alua ma le atina’e turisi.

O ia atina’e e pei ona saunoa Utu i luma o le Kapeneta, e aofia ai le toe fausia o le Faletalimalo o le Rainmaker Hotel i Utulei, fa’aleleia atili o isi mataaga e pei o le Tramway i Utulei, atoa ai tulaga tau femalagaaiga.

“O loo i ai le fuafuaga e tatau ona toe fa’aopoopo ni isi potu pe ova atu ma le 150 i le tatou faletalimalo, ina ia mafai ai ona tali manaoga o le mana’omia o potu faletalimalo i le taimi e ulufale mai ai turisi i le atunu’u,” o le saunoaga lea a Utu.

Saunoa atili le afioga i le matua ia Utu e fa’apea, “Afai tatou te talanoa i le atina’eina o turisi, tatou te le o talanoa mo na o faletalimalo, ae mafai fo’i ona tatou vaavaai isi auala e faatupu atili ai le atina’e turisi, e pei o le fa’aleleia o mata’aga i Amerika Samoa, atoa ai ma le fa’aleleia o tulaga tau femalagaaiga e aofia ai va’alele.”

“O atina’e uma nei e mafai ona galulue fa’atasi mo le fa’amalosia o le atina’eina o le turisi i Amerika Samoa, aua afai e le lelei auala o femalagaaiga, e le mafai fo’i ona maua mai turisi i le teritori, a leai fo’i ni mata’aga e fiafia turisi e o mai ma o i ai e matamata, lona uiga fo’i e vaivai pea le atina’e tau turisi i le atunu’u,” o le isi lea saunoaga a Utu.

E ui la i le tele o fuafuaga ua fa’ataoto e le Komiti mo le fa’aleleia atili o le atina’e turisi i le lumana’i, o le fa’amatagofieina o le uafu tele a le atunu’u, na fa’aigoaina e Utu o le meatotino pito sili lea ona lelei ma malosi e tatau ona ave i ai le fa’amuamua.

Na fa’amanino atili e Utu le galulue o le Komiti e tau saili se kamupani latou te talosaga mo le toe fausiaina o le Faletalimalo o le Rainmaker Hotel i se taimi o i luma, pe afai e mae’a uma galuega o loo faia.

Saunoa le afioga i le ali’i Kovana ia Lolo Matalasi Moliga e fa’apea, e le o malolo le malo i le mafaufau lea i auala eseese e atina’e ai le malo i le itu tau tupe, e le gata e manuia ai le malo, ae manuia atu ai fo’i ma tagata uma.

“O loo galulue le malo e ala i le fa’aaogaina o outou uma o ta’ita’i ina ia saili ni auala e foia ai fa’afitauli o loo tutupu mai i le atunu’u, aemaise ai tulaga vaivai o lona tamaoaiga. E le mafai ona aga’i i luma le tamaoaiga o le malo ma le atunu’u, pe afai e le faia le tiute o le malo, ae mana’omia fo’i le vaega a le atunu’u lautele,” o le isi lea saunoaga a Lolo.

Na fa’ailoa e Lolo i lana Kapeneta fa’anaunauga o le malo o loo i ai, ina ia vave maua se kamupani tua latou te ofo mo le toe fausiaina o le Faletalimalo. Sa ia fa’ailoa fo’i i le Kapeneta, afai fo’i o i ai se tagata o loo lava sana tupe, e mafai fo’i ona ia tauofo i le fausiaina o le galuega, o se itu lelei fo’i lea mo le atina’eina o lana pisinisi faapea ai tagata faigaluega.

Sa ia fa’afetaia le Matagaluega o Galuega a le malo faapea ai ma le Ofisa o le Initeria, mo le tupe sa mafai ona fa’atupe ai le galuega mo le tuuina i lalo o le Faletalimalo tuai sa i ai.

“I lo’u talitonuga, e tatau ona matua atina’e e le malo vaega uma e fesoota’i ma le atina’e tau turisi, ina ia mautinoa e malosi itu uma o le galuega pe afai ae tino mai i le lumana’i,” o le saunoaga lea a le alii kovana.

Na taua e se tasi o Alii Mautofi i le Samoa News e faapea, o le isi vaega taua o loo misi i fuafuaga a le malo i gaioiga e atina’e ai turisi, o le toe fa’amalosia lea o pulega a Alii ma Faipule, ina ia mautinoa e taofia le toe faia e tagata lautele o uiga mataga e fa’aleaga ai galuega a le malo, e pei o fa’ailoilo o auala (road signs) lea o loo maitauina i vaega eseese o le atunuu le tusitusi ma fa’aleaga e tagata.

Saunoa le Alii Mautofi e fa’apea, afai e malosi pulega a Alii ma Faipule, fa’atasi ai ma le mataala o le Pulenu’u poo le Leoleo nu’u fo’i, e le tatau ona toe tutupu fa’aletonu fa’apenei.