a le atunu’u ...

Ua sauni le Pulega o le Fale Televise a le malo, le KVZK-TV e galulue fa’atasi ma le Komiti Fa’avaomalo o Ta’aloga a le Olimipeka a Amerika Samoa (ASNOC) fa’apea ai Asosi o Ta’aloga uma ua fa’amoemoe e tausinio a latou sui i Ta’aloga a le Pasefika i Papua Niu Kini i le masina fou, mo le talosagaina lea o le fesoasoani a le atunu’u e ala i se latou Leitiofoni, e fesoasoani ai i le fa’atupeina o le au malaga mo Papua.

E $290,000 le aofa’i o le tupe o lo o mana’omia e auina atu ai le au malaga atoa e to’a 140 mo Papua, lea e aofia ai ‘au ta’aalo e to’a 84.

I se fonotaga fa’apitoa sa ta’ita’ia e le Fa’atonusili o le KVZK-TV, tofa Fagafaga Daniel Langkilde ma sui o le ASNOC i le aso ananafi, na faamautuina ai loa fuafuaga uma mo lenei fa’amoemoe.

O le Leitiofoni ua faamoemoe e faia i le Aso To’ona’i, aso 20 Iuni i le itula e 6:00 i le taeao seia oo atu i le itula e 6:00 i le afiafi, i le Malae Ta’alo a le malo, le Veteran Memorial Stadium i Tafuna.

Saunoa Fagafaga e fa’apea, o le manatu e fa’atautaia se Leitiofoni e saili tupe ai le ‘au ta’aalo mo Papua, na afua mai ina ua maua se feso’otaiga ma le Peresetene o le ASNOC ia Victor Langkilde, atoa ai ma le afioga i le ali’i kovana ia Lolo Matalasi Moliga, ma fa’atula’i mai ai se fesili tele, pe fa’apefea ona fesoasoani le malo i le ‘au ta’aalo a le atunu’u.

O se ata fa’ataoto na fuafua e Fagafaga ma tu’uina atu i le ali’i kovana, ma fa’ailoa ai loa e Lolo lona lagolagoina o le faia o se Leitiofoni e fa’atautaia e le KVZK-TV, o se auala lelei fo’i lea e auala mai ai le fesoasoani a le malo.

O le taua o lenei fa’amoemoe e pei ona saunoa Fagafaga, e le gata e mafai ona fa’asalalau tu’usa’o i le atunu’u, e mafai fo’i ona feso’ota’i mai ai uo ma aiga o lo o alala i atunu’u eseese o le lalolagi, e ala i le fa’aaogaina o fesootaiga televavave o le “stream live”.

O ni polokalame sa fa’atautaia muamua e le KVZK-TV i tausaga ua mavae e saili tupe ai mo ni isi o manaoga, e pei o le Leitiofoni sa faia i le 2004 e fesoasonai ai i tagata na a’afia i le galulolo i Sri Lanka, lea na mafai ai ona ao le silia i le $200,000 mo tupe fa’amomoli ma alofaaga mo tagata na a’afia.

E o o fo’i i Tuuga Fautasi o le Sisiga Fu’a na se’i mavae atu nei, e ova i le 66,000 le aofa’i o le atunu’u mai fafo sa mafai ona latou maimoa i luga o le “stream live” i le taimi o tuuga fautasi, ma ua a’e ai se manatu, e mafai ona sili atu le to’atele o le atunu’u o lo o alala i fafo e mafai ona latou molimauina le Leitiofoni i luga o le “stream live” i le aso e fa’atautaia ai lenei fa’amoemoe.

“Matou te talosaga atu i le atunu’u atoa, matou te mana’omia lau fesoasoani tau tupe mo le auina atu o a tatou ‘au ta’aalo mo Papua. Talosaga atu fo’i, e mafai ona amata feso’ota’i mai i le Ofisa o le ASNOC i le taimi nei mo le tauaaoina mai o lau fesoasoani, ae o le aso tonu o le Leitiofoni o le a mafai ai loa ona fa’alauiloa i le atunu’u suafa o i latou uma sa mafai ona fesoasoani mai mo lenei fa’amoemoe,” o le saunoaga lea a le susuga Langkilde.

I le aso o le Leitiofoni, o le a mafai ai fo’i ona maimoa le atunu’u i fa’afiafiaga eseese o le a saunia e le KVZK-TV, atoa ai ma le fa’atalatalanoaina o ‘au ta’aalo uma ua fa’amoemoe e malaga i Papua.

O le a i ai fo’i sui o le Komiti i nofoaga eseese o le atunu’u mo le tu’u fa’atasia o le foa’i mai uo ma aiga faapea ai le atunu’u atoa, ina ia fa’a faigofie ai le tu’u fa’atasia o lenei fa’amoemoe.