Ua talosagaina e le Teutupe a le Fono Faitulafono ia Talalemotu Mauga ta’ita’i o le Fono, ina ia saili se auala vave e foia ai tulaga fa’aletonu ua maitauina i le itu tau tupe a le malo, ina ne’i tula’i mai ai ni a’afiaga matuia i le faigamalo ma i’u ina fa’amalolo ai tagata faigaluega a le malo.

I se tusitusiga a Mauga lata mai nei sa tu’uina atu i le Peresetene o le Senate ia Gaoteote Palaie Tofau, fa’apea ai ma le Fofoga Fetalai o le maota o sui ia Savali Talavou Ale, sa ia faailoa ai se otootoga i le tulaga o le tupe a matagaluega ma ofisa a le malo mo le kuata lua o le tausaga fa’aletupe lenei na mae’a i le aso 31 Mati, 2014.

O le ripoti a Mauga, o lo o ia fa’atusatusa ai ripoti mai le Ofisa o Tupe a le malo faapea ai ma le Ofisa o le Paketi a le malo e tusa ai tulaga i tupe maua ma tupe fa’aalu talu mai ulua’i masina e 6 o le tausaga fa’aletupe.

I le mae’a ai ona iloilo e Mauga o ripoti o le tupe mai matagaluega e lua a le malo e pei ona taua, sa ia fa’ailoa ai loa i ta’ita’i o le Fono le fa’ateia o ia i le eseese o fa’amatalaga o lo o taua i ripoti a matagaluega nei e lua, ae tasi lava le auala (computer system) o lo o teu ai a latou fa’amaumauga.

“E ui i le eseese o auala o lo o taua i fa’amaumauga a matagaluega ia e lua, o lo o tutusa uma i laua i le fa’aiuga e tasi, e nofo aitalafu le malo i le fa’aiuga o le tausaga tupe lenei i le aso 30 Setema 2014”, o se vaega lea o le tusi a Mauga.

I fa’amaumauga a le Ofisa o le Paketi a le malo o lo o taua i le ripoti a Mauga, o lo o taua ai tulaga nei; e $108,174,000 tupe maua na valoia e le malo e tatau ona maua mai i le tausaga tupe lenei; ae ina ua tuana’i le ulua’i 6 masina o le tausaga tupe, e na o le $43,363,248 sa mafai ona ao mai, a fa’atusatusa la i le aofaiga e $85,007,497 sa masani ona ao e le malo i le tausaga, lona uiga e $23,166,503 le aofa’i o le tupe e le maua e le malo.

I le ripoti a le Matagaluega o Tupe, e $105,133,000 tupe maua na valoia e le malo e tatau ona maua mai i le tausaga tupe lenei; ae ina ua tuana’i le ulua’i 6 masina o le tausaga tupe, e na o le $42,149,159 sa mafai ona ao mai, a fa’atusatusa la i le aofaiga e $91,111,394 sa masani ona ao e le malo i le tausaga, lona uiga e $14,021,606 le aofa’i o le tupe e le maua e le malo.

I fa’amaumauga a le Fono Faitulafono, e $94,411,000 tupe maua na valoia e le malo e tatau ona maua mai i le tausaga tupe lenei; ae ina ua tuana’i le ulua’i 6 masina o le tausaga tupe, e na o le $41,801,324 sa mafai ona ao mai, a fa’atusatusa la i le aofaiga e $77,452,647 sa masani ona ao e le malo i le tausaga, lona uiga e $16,953,353 le aofa’i o le tupe e le maua e le malo.

“I le va’ava’aia atu ai i fa’amaumauga e pei ona tu’uina atu i le ripoti, ua maitauina ai se tulaga matuia e ono tula’i mai, ma ua tatau ai i le Fono Faitulafono ona faia se auala e foia ai le fa’afitauli lenei...aua e ono mafai ona tula’i mai ai se a’afiaga tele i le malo e pei o le fa’amalolo lea o ana tagata faigaluega, pe afai e le mafai ona foia lenei fa’afitauli”, o se vaega lea o le saunoaga a Mauga.

Na toe fa’atepa e Mauga i ta’ita’i o le Fono, le iloiloga tu’ufa’atasi a le Fono sa faia mo le talanoaina o le Paketi a le malo i le aso 29 Aokuso 2014, lea na fesiligia ai e sui o le komiti le mafua’aga ua ala ai ona siitia le aofa’i o tupe lotoifale na valoia e le malo e mafai ona maua mai i le tausaga tupe lenei, i le aofa’i e $20,461,500.

“Sa sa’o lava atugaluga ma popolega o le komiti i le taimi lea, sa sa’o lava fo’i fa’afinauga a le Fono i le mataupu lenei a o tau amata mai le tausaga tupe lenei, peita’i, e foliga mai ua taai fa’a fala lagona o le Fono i le suamalie o upu ma molimau pepelo sa tuuina mai e le faigamalo e ala i a latou ripoti na tauaao mai”, o le isi lea vaega o le tusi a Mauga.

“O le fesili pito taua lea ua tula’i mai i le taimi nei, o le a se auala e mafai e le Fono ona fai ina ia foia ai le fa’afitauli lenei”, o a Mauga lea.

 Sa ia taua fo’i e fa’apea, “o se itu talafeagai le tatau lea ona faia o se fa’aiuga talafeagai ina ia mafai ai ona foia le ono tula’i mai o ni fa’afitauli tau tupe i le tamaoaiga o le malo.”

Ina ia foia ai lenei fa’afitauli, ua fautuaina e Mauga le tatau lea ona fuafua tatau lelei tulaga o tupe fa’aalu a le malo, ina ia talafeagai ma ana tupe maua o lo o ao mai i totonu, ina ia mafai ai ona toe fausia tulaga lelei i tupe maua a le malo e fa’atino ai manaoga o lo o tula’i mai, ma mafai ai ona maua ni tupe fa’aleoleo mo le malo.

O ni isi o fautuaga ua tuuina atu e Mauga i ta’ita’i o le Fono e tatau ona faia ina ia foia ai le ono tula’i mai o se fa’afitauli matuia i le itu tau tupe a le malo, o le faamalosia lea o le Ofice o le Paketi ina ia taofi isi fuafuaga i tulaga o tupe fa’aalu, ina ia mautinoa ai e leai se faafitauli e ono tula’i mai i le fa’aiuga o le tausaga tupe, a le o lena fo’i.

O isi fautuaga a Mauga e aofia ai le faaauau pea lea e le Matagaluega o Tagata Faigaluega a le malo, ona taofia le toe faa faigaluegaina o ni isi tagata faigaluega fou, ia taofia fo’i le faia o ni siitaga i totogi, atoa ai ma le taofia o le faia o ni fuafuaga e fuafua ai siitaga a tagata faigaluega.

E tatau fo’i ona taofi malaga i fafo e le o manaomia; taofi le toe faatauina o vaega e fa’atino ai galuega; fesuia’i tulaga o tagata faigaluega o lo o totogi i tupe lotoifale ina ia totogi i vaega tupe mai le feterale.