I le fiu ai o le Vaega Su’esu’e (CID) a le Matagaluega o le Puipuiga o le Saogalemu Lautele e tauanau le ripoti mai le Falema’i, fa’asaga i tamati aoga se to’alua lea o lo o tu’uaia sa faia i ai e se faiaoga Fa’afafine ni uiga mataga fa’afeusuaiga, ua latou talosagaina ai loa se poloaiga mai le Ofisa o le Loia Sili, e mafai ai ona latou aumaia le ripoti a le foma’i e fesoasoani i le latou su’esu’ega o lo o fa’agasolo fa’asaga i lenei mataupu.

E le i avanoa le afioga i le ali’i Komesina o Leoleo mo se fa’amatalaga e uiga i lenei mataupu, peita’i na fa’amaonia mai e se sui sinia o le Ofisa o Leoleo le mae’a lea ona tu’uina atu o se talosaga i le Loia Sili mo se poloaiga e fa’ataga ai i latou ona latou aamia le ripoti a le foma’i e tusa ai o le fa’aiuga o le su’esu’ega sa faia.

“E le o manatu mama le Matagaluega o Leoleo i le su’esu’eina o le mataupu lenei, ua mae’a fo’i ona matou fa’atinoina ni isi o la’asaga e mana’omia, ae le mafai lava ona atoatoa la matou galuega pe afai e le maua mai le ripoti a le foma’i sa faia le suega i ali’i aoga o lo o tu’uaia na a’afia i lenei mataupu, ae le mafai fo’i ona matou mauaina lea ripoti e aunoa ma se poloaiga mai le fa’amasinoga, tauala mai lea i se talosaga mai le Ofisa o le Loia Sili e mafai ai ona fa’amatu’u mai le ripoti, ona o lo o puipuia fo’i galuega a le Falema’i i lalo o le tulafono”, o le saunoaga lea a se sui sinia o le Ofisa o Leoleo.

O le masina na te’a nei na amata su’esu’eina ai e Leoleo le mataupu fa’asaga i se faiaoga mai se tasi o aoga maualuga i le itu i Sisifo o le atunu’u, ona o tu’uaiga i lona faia lea o ni uiga mataga fa’afeusuaiga i ni tamaiti aoga se to’alua.

Na fa’amaonia mai e se sui sinia o le Ofisa o Leoleo i le Samoa News, le mae’a ona faia o se su’ega i le falema’i (test) fa’asaga i ali’i aoga e to’alua o lo o tu’uaia na a’afia, pe sa a’afia i laua i ni faiga mataga fa’afeusuaiga, ma fa’amaonia ai le a’afia o i laua i nei a’afiga (sexual transmitted desease - STD).

Na taulimaina e le Samoa News ni telefoni mai ni isi o matua e aooga a latou alo i le aoga maualuga e galue ai le faiaoga o lo o a’afia, ma latou fesiligia ai se tulaga ua o o i ai lenei mataupu.

Na fa’amaonia mai e se faiaoga mai le aoga maualuga o lo o a’afia e fa’apea, sa i ai se mataupu e foliga tutusa ma le mataupu o lo o su’esu’eina ma fesiligia e Leoleo sa tu’uina atu i le Ofisa o le aoga, lea fo’i sa faia i ai se su’esu’ega a le aoga.