Ads by Google Ads by Google

Mana’omia Lolo auala fa’aleleia ai tautuaina soifua maloloina atunuu

Ua fa’ailoa e le afioga i le alii kovana ia Lolo Matalasi Moliga i sui o le Matagaluega o le Soifua Maloloina ma le Falema’i o le LBJ, lona fia vaai i ni fuafuaga e fa’aleleia ai le tausiaina o le soifua maloloina o le atunu’u lautele.

 

E le gata i fuafuaga e fa’aleleia ai le tausiaina o le soifua maloloina o tagata lautele, ae na taua fo’i e Lolo i lana tusi i sui o le Falema’i ma le Soifua Maloloina, le tatau lea ona i ai ni fuafuaga fa’ataoto a le Falema’i ma le Soifua Maloloina ina ia mautinoa ai lo la galulue fa’atasi, e le gata e fa’alautele auala eseese e penefiti ai le atunuu mai a laua auaunaga, ae o le fausiaina fo’i lea o auaunaga tau i le soifua maloloina, ina ia mautinoa e maua uma e gasegase auaunaga eseese o loo mafai ona maua i le atunuu mo i latou.

 

“O lea lava tatou te nofo aitalafu i tagata lautele o le atunuu i le tuuina atu atoatoa lea o le auaunaga tau soifua maloloina e tatau ona latou agava’a i ai,” o se vaega lea o le tusi a Lolo i Totino o Komiti Fa’afoe a le Falema’i ma le Soifua Maloloina, faapea ai Foma’i Sinia ma Fa’auluuluga o ia lala e lua a le malo.

 

“Ou te talitonu atoatoa e mafai ona foia lu’itau o loo tutupu mai i le tautua a le Falema’i ma le Soifua Maloloina i le laititi poo le leai fo’i lea o ni tupe e fa’atino ai lenei tautua, pe afai e fa’ailoa atu e Foma’i ma Teine Tausima’i le agaga o le le manatu fa’apito, ae ia fa’ailoa i le latou auaunaga le agaga o le tuuina atu atoatoa o le measili e tautua ma togafiti ai gasegase uma e pei o tama, tina, atalii ma afafine, poo se isi lava tagata e sulu atu mo se fesoasoani.”

 

O le tusi a le alii kovana e pei ona taua, na tusia ina ua mae’a sa latou fonotaga ma sui o Komiti Fa’afoe a le Soifua Maloloina ma le Falema’i i le amataga o le masina lenei, i le tau sailiina lea o ni auala e foia ai le fa’afitauli o loo feagai pea ma le falema’i o le LBJ, o le le lava lea o foma’i e tausia ma togafitia tagata gasegase o le atunuu.

 

Na taua e Lolo i lana tusi le matagofie o le taunuuga na oo i ai la latou fonotaga, e le gata o sui o vaega e lua a le malo o loo gafa ma le tausiaina o le soifua maloloina o le atunuu, ae sa aofia ai fo’i ma sui o lona ofisa.

 

Saunoa le alii kovana e faapea, e tele faasea na maua mai i le atunuu i le amataga o le masina lenei, i le fiu lea e faatalitali ni foma’i e togafitia i latou, atoa ai ma le tele o itula e fa’atalitali ai mo se foma’i.

 

“I le lua aso talu ai, sa maitauina ai le fiu o le to’atele o gasegase e nonofo ma faatalitali mo se foma’i e togafitia i latou, ona, sa na o le tasi le foma’i sa mafai ona tiute i le potu o le ER i lena taimi, e na o le susuga a Dr. Reese Tuato’o, o le mafua’aga lena o le to’atama’i o le to’atele o le atunu’u, o le fiu e nonofo ma fa’atalitali i le taimi e togafitia ai i latou,” o le saunoaga lea a le alii kovana i lana tusi.

 

I le foia ai o le fa’afitauli e pei ona fetaia’i ma le atunu’u, na fa’atonuina ai loa e Lolo ia le Fa’atonusili le tumau o le Matagaluega o le Soifua Maloloina ia Fara Utu, e tofia ni foma’i mai le Soifua Maloloina e galulue i le vaega o le ER a le LBJ, ina ia mafai ai ona foia le fa’afitauli sa tula’i mai.

 

O lea fa’aiuga fa’anatinati e pei ona taua e le alii kovana, na mafai ona faia i le latou galulue felagolagoma’i ma sui o le Soifua Maloloina, ma tuu atu ai loa le fautuaga i le auala vave e tatau ona faia e foia ai le fa’afitauli.

 

“E ui o lea ua maua le tali mo faafitauli i le taimi nei, ae ua faatonuina vaega e lua ina ia fa’ailoa mai ni isi fuafuaga vaai mamao, i ni auala e fa’aauaua ai pea ona tali manaoga o le atunu’u, ma taofia ai le toe tula’i mai o lagona popole ma le le fiafia o tagata lautele,” o le saunoaga lea a le alii kovana i lana tusi.

 

Saunoa atili le alii kovana e faapea, o le matafaioi a le Komiti Fa’afoe a vaega e lua o loo gafa ma le tausia o le soifua maloloina o tagata, o le saili lea o auala e foia ai le anoanoa’i o fa’afitauli ma lu’itau o loo fetaia’i ma le Falema’i atoa ai ma le Soifua Maloloina.

 

Saunoa Lolo e faapea, o ni isi o tiute e tele a le Komiti Fa’afoe e tatau ona fa’atinoina, e le gata ia fa’atula’i ta’iala ma tulafono e lima ta’ita’iina ai galuega fa’atino a le Falema’i, a ia fa’atula’i fo’i tulafono e fa’avae ai le fa’afoeina o le falema’i, ina ia mautinoa e mulimulita’i le Pulega a le Falema’i ma le Soifua Maloloina i tulafono ma ta’iala ua fa’atula’i, ma foia ai le toe tutupu mai o ni isi fa’afitauli i le lumana’i.