Ua talosagaina e le Ta’ita’ifono o le Komiti o le Soifua Maloloina/LBJ a le Maota o Sui, afioga Mauogali’i Leapai T. Anoa’i se ripoti mai le polokalame a le Medicare ma le Medicaid i le falema’i o le LBJ i Fagaalu, ina ia mafai ai ona nofo malamalama le komiti ma le Fono Faitulafono i le tulaga tonu o lo o i ai nei polokalame taua.

E le gata ua talosagaina e le afioga a Maugaoali’i ripoti e pei ona taua, ae ua ia talosagaina fo’i le tulaga atoa o lo o i ai le itu tau tupe a le falema’i a le LBJ, ina ia mafai ai ona malamalama le Fono i le tulaga tonu o lo o taoto ai gaioiga a le falema’i.

Na taua e Maugaoali’i i se vaega o lana tusi sa tuuina atu i le Teutupe a le Fono Faitulafono i le vaiaso na te’a nei, o le taua o faamaumauga ua ia talosagaina, o le a maua ai se silafia o le komiti i le tulaga o lo o i ai le itu tau tupe a le falema’i.

“A tatou talanoa i le falema’i ma lana auaunaga, lona uiga ua tatou talanoa i le soifua o Amerika Samoa, amata mai lava i pepe seia o o atu i tagata matutua, lona uiga e taua tele ripoti nei ina ia silafia ai e le Fono le tulaga tonu o lo o taoto ai lenei mataupu”, o se vaega lea o le saunoaga a Maugaoali’i i le Samoa News.

O atugaluga e pei ona taua e le alii faipule mai Fagatogo i lana tusi, ina ne’i avea ni faaletonu e ono tula’i mai i le taulimaina e le aufaigaluega o ripoti e tuuina atu i le ofisa o lo o faatautaia ma faatupeina lenei polokalame, ma auala e aafia ai le lumana’i o le polokalame mo le falema’i ma le atunu’u.

Saunoa Maugaoali’i e fa’apea, o le taua o le polokalame lenei o lo o mafai ai ona fesoasoani i ni isi o le atunu’u i le itu tau tupe, e fesoasoani ai i le totogiina o tautua o lo o mafai ona ofo atu e le falema’i mo i latou.

“O le toatele o le atunuu o lo o faamanuiaina i latou i le polokalame lenei, ae afai e ono tula’i mai i se faaletonu i le polokalame, lona uiga o le a aafia ai le faitau miliona o tala o lo o mafai ona sasa’a mai mo Amerika Samoa”, o se vaega lea o le saunoaga a Maugaoali’i.