O le tina ma’itaga lea o lo o taofia i le toese i Tafuna ina ua ta’usala o ia i le moliaga mamafa o le faaoolima i le tulaga lua, ona o le faalavelave lea na tupu i le Bowling Alley, ua tolopo le lauina o lana faasalaga, ona e tele isi faamaumauga fou lea faatoa silafia e le faamasinoga faasaga ia te ia.

Ina ua oo i le taimi o faafinauga a loia mo se faasalaga mo Etevise Tomasi, na finau ai le loia a le malo ia Julie Pasquale ina ia faasala o ia i le faasalaga pito i mamafa o lo o faatulaga mai e le tulafono, ona o ia o se tina talavou e mata’utia le faatupu faalavelave.

Na toe faatepa e Pasquale le silasila a le faamasinoga i le po na tulai mai ai le faalavelave lea ua ta’usala ai Tomasi, ina ua ia uu se ipu malamalama ma togi ai foliga o le tamaitai na aafia ma manu’a tigaina ai, ona ia toe tago lea i le isi ipu ma toe togi ai le tamaitai na aafi, ma toe lavea ai fo’i le isi itu o ona foliga.

O manu’a na aafia ai foliga o le tamaitai na aafia e pei ona taua e le itu a le malo, na manaomia ai filo e 17 e tapuni ai manu’a tetele e lima sa i lona isu ma lona alafau, ma e ui ua pepe ia manu’a ae o lo o tumau ai pea lava ma’ila e le mafai ona toe aveesea.

O le matuia o manu’a na aafia ai le tamaitai na manu’a, ua manaomia ai le alu atu o ia i Hawaii i se taimi o le masina lenei, mo le faia o nisi togafitiga faaopoopo mo le faaleleia atili o tulaga o ona foliga na aafia.

Na taua foi e Pasquale e faapea, o le fasi to’alua e Tomasi ma le isi tamaitai na molia faatasi i laua i lenei mataupu o Shary Mua o le tamaitai na aafia, e aunoa ma se mafuaaga, ua faamaonia mai ai le tulaga lenei, o Tomasi o se tagata faamisa toe faatupu vevesi.

I le tausaga e 2009 na ta’usala ai o ia i luma o le faamasinoga faaitumalo i le solitulafono o le faatupu vevesi i nofoaga faitele, ona o le faalavelave lea na ia togiina ai se isi tamaitai i se fagupia, peitai sa misi.

O le tausaga e 2010 na sosoo ai na toe molia ai fo’i o ia i le isi fo’i fa’alavelave, ina ua ia togia se isi tamaitai i se latou tafaoga sa faia i se fale talimalo, peitai o lea mataupu na toe solofua e le malo ina ua musu le tamaitai na aafia e molimau, ma le isi fo’i faalavelave na tulai mai i le 2011, lea fo’i na molia ai Tomasi i lona faia o ituaiga gaioiga faatupu vevesi nei i nisi o tagatanuu lautele.

Ina ua maea ona faailoa e Pasquale faamaumauga uma nei i le faamasinoga, sa ia taua ai loa le talitonu atoatoa o le malo, o Tomasi o se tina e mata’utia le faamisa, ma e le tatau ona toe i ai sona avanoa e mafuta ai ma tagatanuu lautele, ona o le puipuiga i le ono aafia ai o tagata ia te ia.

Na faauilavea le loia a Tomasi ia Joel Shiver ma ia finau i le faamasinoga, e leai ni faamaumauga faapea na tuuina atu e le malo i le latou itu e uiga ia Tomasi, ma e faigata foi ona latou finauina lenei mataupu, ae na faailoa e le alii faamasino sili ia Michael Kruse ia Shiver, e le o se tiute o le faamasinoga le alu e saili mai faamaumauga mo le itu a le ua molia.

A’o le’i tuuina atu faafinauga a loia i luma o le faamasinoga e uiga i lenei mataupu, na faatoese Tomasi i le faamasinoga e tusa ai o lana solitulafono, sa ia faatoese foi i le aiga o le tamaitai na aafia ina ia alolofa ma faamagalo o ia.

Na taua e Tomasi e faapea, o aso ia na taofia ai o ia i le toese i Tafuna, ua ia aoaoina mai ai se lesona taua mo lona olaga, o le falepuipui e le o se nofoaga lelelei lea mo ia. Sa ia talosagaina se avanoa e toe fo’i atu ai i tua e tausi lana fanau e toatolu faapea ai ona matua ma le aiga.

Na tautino le ua molia, ua ia lagona lona salamo moni e tusa ai o lana solitulafono sa faia, ma ua toe fia fo’i i tua i lona aiga e mafuta ma si ana fanau, ma toe faatino ona tiute faatina e pei o le tausi ma fafaga si ana fanau.

Na talosaga foi le tina a le ua molia i le faamasinoga, mo se avanoa e toe tatala atu ai Tomasi i tua e saili sana galuega e tausi ai lana fanau.

Na finau lana loia i le faamasinoga, mo se avanoa e tatala ai le ua molia i tua i lona aiga, e faatali ai le taimi e fanau ai o ia, ona o le vaiaso lona 38 lenei o lona ma’itaga o lo o tauave, ma ua manaomia le fo’i atu i tua i lona aiga.

Ae talu ai o tulaga e pei ona finau i ai le itu a le malo, ua poloaina ai loa e Kruse le toe tolopo o le mataupu a Tomasi seia aulia le aso 17 Ianuari 2014, ina ia maua ai le avanoa o le Ofisa Nofovaavaaia latou te tapenaina ai se isi ripoti ma’ea’ea e tusa ai o tulaga e pei ona laga e le malo.