Ua amata nei ona fa’alauiloa e le Pulega o Uafu ma Taulaga le avanoa mo se tasi e avea ma Pule, e fa’auluulu i ai le galuega mo le fausiaina o le va’a fou mo Manu’a, lea ua tu’uina atu le fausiaina i se kamupani i Amerika o le Nichols Brothers Boat Builder Inc.

O le itula e 2:00 i le aso 19 Mati, ua fa’amoemoe e tapuia ai le tu’uina atu o tusi talosaga mo se tasi e fia tusi talosaga i lenei poloketi.

Na taua e le Fa’atonusili o le Pulega o Uafu ma Taulaga ia Taimalelagi Dr. Claire Poumele ina ua fesiligia e le Samoa News e fa’apea, talu ai o lea ua amata le fausiaina o le va’a mo Manu’a i le taimi nei, ua mana’omia vave ai se tasi na te vaavaaia ma mata’ituina tulaga uma o le galuega, aemaise se tagata e i ai sona agava’a i ituaiga galuega fa’apea.

O le tagata o le a tofia i lenei galuega e pei ona saunoa Taimalelagi, e le gata o ia o le a fai ma vaaiga o le malo i le fa’atinoina o le galuega, ae tatau fo’i ona ia mautinoa o lo o fausia le va’a e tusa ai o ta’iala ma tulafono, o le a ia tu’uina mai fo’i se ripoti i le Ofisa o Pulega o Uafu i le mae’a ai o vaega ta’itasi o le galuega.

Sa taua fo’i e le tama’ita’i fa’atonusili e fa’apea, o lo o i ai fo’i se tagata ua tofia e fa’auluulu i ai galuega o lo o fa’atinoina e le Ofisa mo le Fale Fuimu i le Malae va’alele i Ofu, Manu’a, faapea ai ma le pa e si’omia le malae va’alelei i Fitiuta, lea o lo o fa’atupeina uma e le vaega a le FAA.

Na taua e Taimalelagi le mae’a lea ona tu’uina atu o le latou ripoti i le FAA, mo le galuega e $3.7 miliona i Ofu, atoa ai ma le galuega e $1.3 miliona i Fitiuta. Sa ia taua fo’i le i ai o se tasi sa fa’auluulu i ai le galuega a le Pulega o Uafu ma Taulaga, i le toe fa’afouina o le Vaega Tosova’a i Satala, lea fo’i sa fa’atupeina mai e le vaega a le feterale.

O le tele o taimi e sailia ai se tasi na te tauaveina lea tulaga, aemaise lava pe afai o se galuega e ova atu i le $100,000 lona tau, e tatau ona i ai se tusi fa’amaonia tau i galuega inisinia e aloaia ai le mafai e le tagata ua tusi talosaga, ona ia fa’atinoina pe tauaveina le galuega.

Mo se fa’ata’ita’iga o le va’a o le Segaula, lea sa mafai ai ona fesoasoani mai le sui o le U.S Coast Guard mai Seattle mo le fa’atinoina o lea manaoga, e ala i le fai lea ma asiasi ane i le nofoaga sa fa’atinoina ai le galuega, ma ina ua mae’a le galuega, sa ia fa’amaonia le lelei atoatoa o le galuega.

O le masina o Novema 2014 na fa’amatuu mai ai e le Ofisa a le Initeria se vaega tupe e $8.6 miliona mai le vaega tupe a le CIP, e fuafua ai le fausiaina o se va’a fou la’u pasese mo Manu’a.

O le masina o Ianuari 2015 na fa’alauiloa ai loa le kamupani fau va’a a le Nicholas Brothers Boat Builders Inc, o le galuega mo le fausiaina o le va’a o le a amata i se taimi o le tausaga nei, ma fa’asolo atu ai seia mae’a i le masina o Aperila 2016.

O le va’a lelei e mafai fo’i ona aloaia le malaga atu i Tonga ma Fiti i tulaga tau i le atina’e mo Amerika Samoa.