Ua talosagaina e le Komiti Fa’afoe o le Litaea a le malo le Komesina o le Matagaluega o le Puipuiga o le Saogalemu Lautele ia Save L. Tuitele, ina ia faia se su’esu’ega a leoleo fa’asaga i le mataupu e pei ona tu’uaia ai le Pulesili o le Ofisa o le Litaea ia Luatua Filisouaiga Ta’afua, i lona fa’aaoga le tatau o tupe a le Litaea a le malo, atoa ai ma le faia o isi fa’aiuga e le tusa ai ma ona tiute tauave.

E le gata fo’i i le talosagaina o se suesuega a leoleo fa’asaga i lenei mataupu, ae ua talosagaina fo’i e le Komiti Fa’afoe le ali’i Pulesili o se Kamupani Su’etusi mai Amerika “Paragon Wealth Management” ia David Young, mo se avanoa latou te fa’atautaia ai le su’eina o tusi ma tupe a le Litaea, ona o tulaga e pei ona tu’uaia ai le Pulesili a le Ofisa.

Na taua e le Komiti o le Litaea i le latou tusi ia Save e faapea, i le maea ai o ni a latou sailiiliga i tulaga o tupe ma gaioiga a Luatua, ua manatu ai loa le Komiti Fa’afoe faatasi ai ma se fautuaga mai le alii kovana sili ia Lolo Matalasi Moliga, e talosagaina o ia ina ia talia le fautuaga, mo le faia o se suesuega e tusa ai o tu’uaiga fa’asaga ia Luatua, i lona fa’aaoga e aunoa ma se fa’atanaga o le ‘Rubber Stamp’ a le Ta’ita’ifono o le Komiti Fa’afoe ia Fanene Morris Scanlan, e lolomi ai le siaki sa totogi atu mo lona pasese, atoa ai ma le siaki sa totogi i le pisinisi o le Hardcore Cleaning and Co, o se pisinisi e le o lesitalaina fa’aletulafono, lea sa latou fa’atinoina galuega i le maota o le Centennial Building i Utulei, ae emo ane le ata ua teu i totonu o le teugatupe a Luatua le siaki sa totogi aga’i i le pisinisi lea.

“I le avea ai o i matou ma tausi mea fa’amaoni i teugatupe a le Litaea, o le matou tiute le tatau lea ona mautinoa e ripotia gaioiga uma e le talafeagai sa faia, e ono aafia ai vaega o le teugatupe, aemaise ai lava taumafaiga e faia auala fa’aalatua, soona fa’aaoga le tatau tupe, ina ia mautinoa lelei o loo saogalemu tupe o le teugatupe o le litaea,” o se vaega lea o le tusi sa tuuina atu ia Save.

“Ona o lea tulaga, ua matou talosagaina ai le tatau lea ona amata le suesueina o lenei mataupu ia le silia ma le aso Gafua, Iulai 27, 2015.”

“Talu ai le ma’ale’ale o lenei mataupu, ua matou talosagaina ai ma le fa’aaloalo lau lagolago, ina ia fa’atumauina pea le maualuga ma le aloaia o le fa’atinoina o lenei talosaga, ina ia taofia ai le faia o ni faiga fa’alilolilo. O le a fa’ailoa atu ia te oe tulaga uma o le a talanoaina i le fonotaga a totino o le teugatupe a le litaea, ina ia mautinoa ai le malu puipuia pea o le teugatupe.”

Na taua e le Komiti Fa’afoe o le Litaea lo latou fa’anaunauga o loo i ai, ina ia vave mae’a lenei suesuega ma mafai ai ona avatu le talitonuga atoatoa i le Komiti ma totino uma o le teugatupe, e fa’aauau ai pea a latou tiute tauave mo le aga’i i luma.

Na fa’ai’u le tusi sa tuuina atu i le alii Komesina, i le fa’ailoa atu lea i ai e le Komiti Fa’afoe lo latou sauni e tuuina atu fa’amaumauga uma latou te mana’omia, e fesoasoani ai i le latou galuega pe a amataina.

I le tusi sa tuuina atu i le ali’i pule o le kamupani su’etusi o le Paragon Wealth Management (PWM) ia Young, o loo talosagaina ai e le Komiti Fa’afoe le manaomia o le latou fesoasoani i le su’eina o tusi a le Teugatupe o le Litaea a Amerika Samoa, ona o ni isi o tu’uaiga i le sese lea ona fa’aaoga tupe ua alia’e mai i le taimi nei.

O le kamupani su’etusi o le PWM, o se kamupani mai le aai o Provo i le setete o Utah i Amerika, ua tele tausaga o fai paaga i galuega tau su’etusi mo le silia i le 28 tausaga, e pei ona taua i ni faamaumauga sa maua mai i luga o le website a lea kamupani.

O sui o le Komiti Fa’afoe o loo saini i le tusi e aofia ai Fanene le Taitaifono, Sonny L. Thompson, Aloma E. Langford ma Ueli Tonumaipe’a, ma o le kopi o lenei tusi o loo tuuina atu i le alii kovana ia Lolo, Lutena Kovana ia Lemanu Peleti Mauga, Loia Sili ia Talauega E. Ale faapea ai sui e toalua o le Ofisa o le Kovana ia Fiu Saelua ma Iulogologo J. Pereira.