E to’atele ni isi o le aufai fa’atoaga ua fa’aalia lo latou lagolagoina o le faia o se tulafono, e fa’asa ai tama’i maketi o lo o fa’atau ai fua o fa’aeleeleaga i tafatafa o le auala, ae poloaina le fa’aaoga e tagata fai fa’atoaga uma a le atunu’u o le maketi fou i Fagatogo, ina ia mautinoa e lauga tasia uma ai le aufai fa’atoaga i fa’amanuiaga mai tagata fa’atau, atoa ai ma le mafai lea ona totogi atu o se sao a le aufai fa’atoaga i le malo, e ala i le totogiina atu o tupe mo le fa’aaogaina o laulau i le maketi.

O le fonotaga a le kovana ma le aufai fa’atoaga lea sa faia i le vaiaso na te’a nei i le potu fono a le Ofisa o Fa’atoaga i Tafuna, na afua mai ai lenei manatu mai ni isi o le aufai fa’atoaga, ina ua talanoaina le mataupu e fa’atatau i fesoasoani tau tupe e mafai ona maua e le aufai fa’atoaga mai le malo.

Na taua e le susuga ia Uili Liu o Vaitogi e fa’apea, afai e fau e le malo se tulafono e fa’asa ai ona toe fa’aaoga e le aufai fa’atoaga tama’i maketi i luma o maota ma laoa, e le gata o le a tele fua o fa’aeleeleaga e mafai ona maua i le maketi, ae o le a feololo ai fo’i ma se vaega tupe e mafai e le malo ona ao mai le fa’aaogaina e le aufai fa’atoaga o laulau e fa’atau ai fua o fa’aeleeleaga.

“Atonu e le mafai e le malo ona fausia se tulafono faapena, ae i lo’u talitonuga, e le mafai ona iloa tino le tulaga malosi ma le lelei o lo o i ai fua o fa’aeleeleaga i le atunu’u, sei vagana ua ave uma i se nofoaga e tasi ma maimoa i ai tagata uma, ona filifili lava lea o le tagata fa’atau i le mea e sili ma lelei mo ia, toe talafeagai ma lana tupe o lo o fa’aalu, ae o le fa’atau solo i tafatafa o le alatele, i lo’u taofi e le talafeagai”, o le saunoaga lea a Uili.

Na  taua e le susuga a Onosa’i Latu e fa’apea, o le aoga o le i ai o se tulafono faapea, e faigofie ai ona saili e tagata fa’atau taumafa o lo o manana’o i ai, ae o le fa’afitauli o lo o maitauina i le taimi nei, ua o o lava i fualaau ‘aina e pei o kapisi, maukegi, kukama e o o lava fo’i i  i’a o le sami ua fa’atau solo i lalo o laau i tafatafa o le auala, ae o mea nei sa tatau ona faatau i le maketi, e le gata e manuia ai le aufai fa’atoaga ae manuia ai fo’i ma le malo”, o le saunoaga lea a Latu.

Ina ua fesiligia e le Samoa News le fa’atonusili o le Ofisa o Fa’atoaga ia Lealao M. Purcell e fa’atatau i ni isi o finagalo mai le aufai fa’atoaga, sa ia taua ai lona lagolagoina o lenei fuafuaga, ae o se fuafuaga fo’i ua leva ona vaavaai i ai i le tausaga na te’a nei, peita’i o lo o fa’atuai ona o ni isi o vaega e tatau ona fa’amae’a ma fa’amautu lelei ona fa’atoa fuafua lea o le tusiaina o se tulafono.

Saunoa Lealao e fa’apea, e tasi lava le nofoaga e tatau ona faatau ai fua o faatoaga a le aufai faatoaga, “ua na o le maketi a le malo i Fagatogo”.

“E le gata o le aoga lena na fausia ai e le malo le maketi, ae o se auala fo’i e puipuia mai ai fua o fa’aeleeleaga mai le pefu o le auala ae avatu toe fa’aaoga e tagata e fai ai taumafa”, o le isi lea saunoaga a Lealao.