Ads by Google Ads by Google

Mana’omia tausisi Faatonusili tulafono fa’aaogaina tupe

Ua toe fautuaina e le afioga i le ali’i kovana ia Lolo Matalasi Moliga afioga i Fa’atonusili ma Fa’auluuluga o Matagaluega ma Ofisa uma a le malo, ina ia mautinoa latou te tausisia tulafono i tulaga o tupe fa’aalu.

 

Na taua e le ali’i kovana i lana poloaiga sa tu’uina mai i le aso 12 Fepuari e fa’apea, i le ripoti lata mai a le Ofisa o Tupe atoa ai ma le Ofisa o le Paketi a le malo mo le Kuata muamua, o lo o manino mai ai le mulimulita’i o ofisa i ta’iala ma faiga ua mae’a ona fa’ataoto mai e le tulafono.

 

“E pei ona ma fa’alauiloa atu i le ulua’i taimi na tula’i mai ai le tatou faigamalo, o le a tatou tutu fa’atasi e faia auala uma ina ia mautinoa e tula’i mai le itu tau tupe a le malo i se tulaga lelei ma manuia mo le atunu’u”, o se vaega lea o le tusi a le ali’i kovana.

 

Sa ia taua fo’i le tatau lea i fa’atonusili uma ona latou silafia, e le tatau ona latou o ese mai ai i ta’iala ua fa’ataoto e fa’atonutonu ai le fa’aaogaina o tupe.

 

Sa ia toe fa’amanatu fo’i i fa’atonusili, le faatonuga e fa’atonutonu ai le fa’aaogaina o tupe, o lo o tumau pea ona aloaia i le taimi nei, talu mai le aso 4 Ianuari 2013 lea na tu’uina atu ai lana ulua’i poloaiga.

 

“O lau matafaioi o le fa’atonusili o le ofisa, e tatau ona mautinoa ua fa’aagaga le 10% o lau paketi sa pasia, ina ia mautinoa ai le tausisia e lou ofisa o le tulafono, lea e le tatau ai ona ova tupe fa’aaoga mai tupe sa pasia atu i lau paketi”, o le isi lea fautuaga a le ali’i kovana i lana kapeneta.

 

I le fetaia’i ai o le malo ma fa’afitauli laiti i le itu tau tupe, e mafua mai i le fa’afitauli e pei ona tula’i mai i le malo tele ma tulaga i va’a oloa, ua fautuaina ai e le ali’i kovana ia fa’atonusili, ina ia silasila toto’a pea i tulaga o tupe fa’aalu mo ofisa ta’itasi, ina ia mautinoa e sologa lelei pea e aunoa ma se fa’aletonu e tula’i mai ai.

 

“O lou tiute o se fa’atonusili, ia fa’atonutonu le tulaga o tupe fa’aalu, ae le o le tu’uina atu o lea matafaioi e fa’atino e le Ofisa o le Tupe fa’apea ai ma le Ofisa o le Paketi a le malo”, o le isi lea saunoaga a le ali’i kovana.

 

“E tatau i matagaluega ma ofisa uma ona latou tausisi e usitaia ma fa’amalosia ta’iala uma o lo o taua i lalo o le poloaiga mo tupe fa’aalu, ina ia mautinoa ai e leai se fa’aletonu e tula’i mai i le itu tau tupe a le malo, ao tatou i ai i lenei taimi fa’aletonu o tupe maua a le malo”, o le vaega lea o le saunoaga fa’ai’ua le ali’i kovana.