Na atagia i le tusi mai Ta’ita’i Komiti o le Paketi a le Fono Faitulafono lea ua tu’uina atu i le Fa’atonusili o le Ofisa o le Paketi a le malo, e le mana’omia e le fono faamaumauga o le paketi mo le tausaga tupe 2015 e avatu i ni faamaumauga faaona po nei (digital fomat), ae fia silasila le fono i tusi o le paketi ua avatu mo la latou iloiloga.

I se tusi a le afioga i le alii senatoa ia Laolagi Fonoti Savali Vaeao ma le sui fofoga fetalai ia Talia Faafetai Iaulualo, na tuuina atu ia Catherine D. Saelua i le aso 29 Iulai 2014, o lo o la talosagaina ai le tatau lea ona tauaao atu e le faigamalo tusi paketi e pei ona masani ai i le fono.

“Talu ai e le taliaina e le toatele o sui o le fono le ituaiga auala lea o lo o aumai ai faamaumauga o le paketi, ua matou talosagaina ai le tuuina mai o tusi paketi mo le silasila a le fono”, o se vaega lea o le tusi a Laolagi ma Talia sa tuuina atu ia Saelua.

Na faamanatu e Laolagi ma Talia ia Saelua i le la tusi e fa’apea, i le Paketi o le tausaga tupe lenei 2014, e le gata na pasia e le fono le $3,000 e lolomi ai isi tusi o le paketi, ae sa faapea foi ona pasia ma le $30,000 e faatupe ai le lolomiina o le tusi paketi lapo’a, faapea ai ma isi manaoga e mulimuli mai ai.

Ae ui lava i lea vaega tupe na pasia, na toe faaalu e le fono sana vaega tupe e lolomi ai kopi o le paketi mo ni isi o sui o le fono sa latou manaomia ia faamaumauga mo le 2014, ma faaalu ai e le fono sana vaega tupe sa le i tatau ona fa’aalu i lea manaoga.

E o o foi i le paketi fuafuaina mo le tausaga tupe fou 2015 e pei ona taua i le tusi, o lo o taua ai le vaega tupe e $5,500 ua talosagaina mo tusi paketi laiti, faapea ai ma le isi $30,000 e lolomi ai tusi paketi lapopo’a atoa ai ma isi manaoga mo lea lava galuega.

“E taua tele i le Fono tusi paketi lapopo’a sa masani ona tu’uina mai, e le gata e aoga o galuega ae o ni faamaumauga aoga foi e fai ma tua i ai le fono mo ana galuega faatino i le tausaga atoa”, o se vaega lea o le tusi.

Ona o lea manaoga, ua faailoa atu ai e le fono ia Saelua le tolopo lea o iloiloga o le paketi mo lenei tausaga tupe fou 2015, sei vagana ua maua atu tusi paketi tetele e pei ona talosagaina e le fono, ma o lo o i ai fo le faanaunauga o le fono, talosia ia toe a’e galuega a le fono i le aso 11 Aokuso, ua mae’a ona fa’atino lenei talosaga aoga.

O le kopi o lenei tusi ua tuuina atu i le alii kovana ia Lolo Matalasi Moliga, lutena kovana ia Lemanu Peleti Mauga, faapea ai taitai o le fono ia Gaoteote Palaie Tofau ma Savali Talavou Ale.