Ua avea le tula’i mai pea o fa’aletonu i tulaga o taumafa o lo o tufatufa atu i nofoaga o lo o fa’amautu i ai tagata matutua ma auala ua fa’aalia ai loa e le to’atele o i latou so latou manatu, ua tatau ona faia se fa’aiuga a le Ofisa o Tagata Matutua (TAOA) ina ia suia le fale’aiga o lo o kukaina taumafa mo nofoaga e aofia ai Pago Pago ma Atu’u.

Ae ina ua fesiligia e le Samoa News le Fa’atonusili o le TAOA ia Ale Tifimalae i sona finagalo e tusa ai o manatu o tagata matutua, na saunoa ai le tofa i le to’oto’o e fa’apea, e le mafai e le TAOA ona suia fale’aiga ua uma ona lautogia mo le kukaina o taumafa mo le polokalame.

“O le matafaioi lena a le Ofisa e Pulea Oloa a le malo, o i latou fo’i ia na filifilia fale’aiga ua lautogia mo le kukaina o taumafa vela mo le polokalame”, o le saunoaga lea a Ale.

E le i malolo le pisi o le laina telefoni a le Samoa News i lenei vaiaso i le tele o telefoni fa’asea mai ni isi o tagata matutua, e fa’atatau i le fa’aletonu lea o meaai sa tufatufa atu ia i latou i le nofoaga i Pago Pago ma Atu’u, e le gata o le aso Lua ina ua fa’atoa tatala aloaia le polokalame lea e tufatufa ai taumafa vela a le TAOA, ae fa’apea fo’i i le aso Tofi na te’a nei, o le aso lona lua lea o le polokalame.

O le to’atele o tagata matutua na valaau mai i le Samoa News, sa latou taua e fa’apea, o taumafa sa tufatufaina mo i latou i aso e lua ua tuana’i atu, o taumafa ia e talafeagai mo tamaiti laiti.

“E pei lava ogi ipu meaai a kamaiki ipu meaai ia ga kufa mai, e fai o le laiki ae le lava fo’i, ua kakau oga fai se fuafuaga a le Fa’akogu i le kulaga legei”, o le fa’asea lea se tasi o tama matua na telefoni mai i le Samoa News i le aso ananafi.

Ae na taua e se tasi o tama matua e fa’apea, afai ua manatu le TAOA e tatala le polokalame o taumafa vela mo tagata matutua i le atunu’u, e tatau la ona fai ia lelei ma ia mautinoa o meaai nei e maua ai le malosi o tama ma tina matutua.

“Aua ge’i magaku se isi ua ai u u kagaka makukua i meaai, e leai, pau le agaga, afai ua fa’akigo le polokalame, fai ia lelei ma fuafua mai fo’i o kagaka makukua gei e fai mai i ai a oukou amioga”, o lana saunoaga lava i luga o le telefoni.

E to’atolu isi tina na valaau mai i le Samoa News na latou taua e fa’apea, ua tatau ona fai se fa’aiuga vave a le ali’i fa’atonusili o le TAOA, ina ia sui ai fale’aiga o lo o kukaina taumafa mo nofoaga i Pago Pago ma Atu’u, ona ua lua aso sosoo o lo o vaaia pea le le lelei o le faiga o meaai, e le gata e laiti ae sa i ai fo’i ni nai fa’aletonu e pei o le mata o fualaau ‘aina o lo o avatu mo tagata matutua.

I se ripoti na tauaao e le Samoa News mai nofoaga eseese o lo o tufatufa ai taumafa vela mo tagata matutua, na taua ai le to’atele o tagata matutua e le i autova’a atu i le aso Tofi na te’a nei mo le pikiina o a latou meaai, e le o iloa fo’i pe mafua aisea lea tulaga.

Ae na taua e se tasi o tina e fa’apea, “afai ua tau le o atu tagata matutua e piki a latou taumafa, e tatau la ona fesili le TAOA pe aisea ua mafua ai lea tulaga, o le isi tulaga, o le tele o taumafa lea sa fa’amoemoe e tufa i tagata matutua na toe fa’afo’i ina ua to’atele e le i o atu, o ai o le a manauia i nei taumafa e tele a o lea ua uma ona totogi tupe i kamupani latou te kukaina ai taumafa mo tagata matutua”.

I le talitonuga o le tina lea, afai ua manatu e fai le polokalame, e tatau ona fautuaina e le TAOA fale’aiga uma o lo o gafa ma le kukaina o taumafa ina ia fai ia lelei meaai ma ia mautinoa fo’i e lava ma lapopo’a ipu meaai.

Ina ua fesiligia le tofa Ale i sona finagalo e tusa ai o finagalo fa’aalia o tagata matutua, sa ia ioeina ai fa’asea e pei ona saunoa i ai tama ma tina.

“O ananafi sa faia ai fo’i la matou fonotaga ma sui o fale’aiga o lo o kukaina taumafa mo le polokalame, ma ua mae’a ona avatu i ai la matou fautuaga ina ia fai fa’alelei taumafa mo tagata matutua, e le gata ia lapopo’a ipu meaai a ia fai fo’i ia lelei”, o le saunoaga lea a le ali’i fa’atonu.

Ae ina ua fesiligia le Fa’atonu o le Polokalame a Tagata Matutua ia Tafia Taimalelagi i sona finagalo e uiga i fa’asea mai tina ma tama matutua, na taua ai e Taimalelagi lona taliaina o fa’asea atoa ai ma faitioga mai tagata matutua e tusa ai o tulaga fa’aletonu o taumafa sa tufatufaina i le aso Tofi na te’a nei.

“O ripoti sa tu’uina mai e le aufaigaluega ia te a’u i le aso Tofi na te’a nei, na taua ai le fa’aletonu o ipu meaai sa tufa Pago Pago, e fai lava si laiti o ipu meaai sa tufatufa atu i nai tagata matutua, e le fa’apei o ipu meaai sa tufatufa i isi nofoaga o le polokalame”, o le saunoaga lea a Tafia.

“O le isi ripoti lea na maua mai i nofoaga taitasi e 14 o lo o tufatufa ai taumafa, na matua pau maualalo le aofa’i o tagata matutua na o o atu e piki a latou taumafa i le aso Tofi na te’a nei, atonu o le fa’aletonu o taumafa sa tufa i le aso Lua lea ua mafua ai ona toa laiti tagata matutua na aga’i atu e piki a latou taumafa i le aso lona lua o le polokalame”, o le saunoaga lea a Taimalelagi.

Ina ua fesiligia i fa’asea mai tagata matutua, na saunoa ai Taimalelagi, “e taua uma lava fa’asea o lo o maua mai i tagata matutua, e le tatau i le ofisa ona fa’atauagavale i ai, ae tatau ona fa’ataua lagona ma finagalo o tama ma tina matutua, aua o i latou tonu ia o lo o mafua ai le polokalame”, o le isi lea saunoaga a Taimalelagi.

Sa ia taua fo’i e fa’apea, sa i ai lava le manatu o le TAOA sa tatau ona lelei ni taumafa e amata ai le polokalame i le aso Lua na te’a nei, ae foliga mai ua mafua lea fa’aletonu ona sa tuai ona piki fale’aiga latou te kukaina taumafa mo le polokalame, o lea na fa’atoa piki ae ua toe o ni nai aso amata aloaia le polokalame.

E ui i fa’asea mai tagata matutua, na fa’afetaia e Taimalelagi le aufaigaluega a le TAOA i lo latou fa’amalolosi ao taumafai mai lenei polokalame.

O le taumafataga mo le vaiaso fou e pei ona fa’amaonia mai e le ali’i Fa’atonu o le sapasui ma le i’a.