Ads by Google Ads by Google

MANUIA NI ISI O FAIFAIVA I I’A O LO O FA’ATAU I MAKETI I FAFO

Ua molimauina e ni isi o le aufai faiva tulaga manuia ua mafai ona maua i le taimi nei, e afua mai i le i’a lea o lo o la’u e le kamupani a le Samoa Tuna Processors Inc (STP), o se lala lea o le kamupani a le Tri Marine International lea ua latou toe faagaioiina le nofoaga tuai sa i ai le kamupani a le COS Samoa Packing ua tapuni e faatau i maketi i fafo.

O le faaiuga o le tausaga na te’a nei na amata tatala ai le tautua fou lea a le STP mo le la’uina o le aano o le i’a ma faatau atu i maketi i Hawaii ma Kalefonia, mo le faamoemoe e gaosi ai le taumafa o le ‘sashimi’ i faleaiga i fafo.

O ni isi o le aufai faiva na mafai ona talanoa ma le Samoa News e uiga i lenei mataupu, sa latou taua ai le faamanuiaina o i latou i tupe o lo o mafai ona maua mai i lenei polokalame fou, ma ua fesoasoani malosi ai i le faaleleia o a latou pisinisi o vaa fagota.

Na taua e le susuga ia Mapu Ieti e faapea, o le tulaga lelei o le polokalame fou lenei a le kamupani o le STP, ua unaia ai ni isi o le aufai faiva e fagogota ma la’u atu i’a e faatau i le kamupani.

“Ua i ai lava se suiga feololo i tulaga tau tupe ua mafai ona maua mai i i’a o lo o faatau atu, ma o lea suiga e sili atu nai lo le mea muamua sa i ai, e i’u lava ina toe ma’imau i’a i totonu o le pusaaisa, ona e leai se mea e mafai ona la’u e faatau ai,” o le molimau lea a Ieti na lagolagoina foi e le susuga ia Tele’a Amituana’i, o se tasi o alii faifaiva.

“O le taua o le polokalame lea, e le na o le tasi se ituaiga i’a e mafai ona faatau atu i ai, lona uiga, o a lava i’a e maua mai i le faiva, e le toe popole poo fea o le a ave e tau faatau ai aua o lea ua mautu le kamupani e ave aga’i i ai,” o le saunoaga lea a le susuga ia Ieti.

O le polokalame lenei e pei ona viia e ni isi o le aufai faiva a le atunuu, na afua mai i se finagalo o le kovana sili ia Togiola Tulafono ina ua maea ona feutana’i ma sui o le STP i le tausaga na te’a nei, mo se auala e mafai ona fesoasoani ai i le au fagogota a le atunuu, talu mai le taimi na tapunia ai le kamupani o le COS Samoa Packing, lea sa mafai ona la’u i ai i’a e faatau ai.

Na taua e le afioga i le kovana i se tasi o ana saunoaga e faapea, o le vaalele lea o lo o malaga mai i vaiaso uma e aumai le meli i Amerika Samoa, e toeititi lava leai se uta e toe foi ma le va’alele lea, peitai afai e mafai ona faaofi ai ma ni uta o le aano o le i’a e la’u i fafo e faatau ai, o se auala lelei lea mo le atunuu ma lona tamaoaiga.

O lea moemitiga na faataunuuina loa ina ua tatala le polokalame fou lea a le STP i le tausaga na te’a nei, e le gata ua maua ai se fesoasoani tau tupe mo le aufai faiva, ae ua tatala ai foi ma avanoa faigaluega mo ni isi o le atunuu i le faamamaina lea o le aano o le i’a o lo o la’u i fafo.

Saunoa Ieti, e le gata la ua maua le polokalame e la’u i ai i’a a le au faifaiva i le STP, ae o isi i’a e totoe ai e mafai ona la’u i fale’aiga o lo o manaomia le i’a i le atunuu, ma ua le toe i ai se i’a e ma’imau aua o lea ua tatala faitoto’a e tele mo le au faifaiva a le atunuu.