E toalua ni ali’i o lo o taofia i le falemai i Fagaalu ona o ni manu’aga tuga o lo o a’afia ai o la tino, e mafua mai i ni faalavelave se lua na tulai mai i le faaiuga o le vaiaso na te’a nei, i le afio’aga o Pava’ia’i ma Leone.O le tasi, na faaaoga e se tagata se agaese e fa’ao’o ai manu’a i lona tino, ae o leisi na a’afia ina ua oso ai i luga se ta’avale, e pei ona faamaonia mai e le loia a le malo o Blake Hanley, i le Samoa News i le taeao ananafi.O le fa’alavelave na tulai mai i Leone, na afua mai ona o se va o ni alii se toalua, ma ua tuuaia ai e le malo ia David Golk, i lona fa’aaoga o se aga’ese e fa’ao’o ai manu’a i le ali’i na a’afia i lenei mataupu, ma ua tuuaia o ia e le malo i le moliaga o le fa’atupu vevesi i nofoaga faitele mo le taimi nei.Na ta’ua i faamaumauga a le malo le manu’a o le ‘a’ao ma le pito i tua o le ulu o le ali’i na a’afia i lenei faalavelave, ma mana’omia ai se ta’otoga mo ona man’ua.O le isi faalavelave na tulai mai i Pava’ia’i, na mafua mai, ona o se fanua.Na ta’ua e le malo le so’aina e Sopi Senio o le o lo o a’afia i lenei mata’upu, i lana ta’avale. Ma ua tu’ua’ia ai nei Senio i le fa’atupu vevesi i nofoaga faitele.Na te’ena e Golk ma Senio o la moli’aga, ina ua tutulai i luma o le Faamasinoga Faaitumalo i le Aso Gafua na tea nei, ma ua toe faatulaga ai loa le isi a laua iloiloga i le Aso Faraile o le vaiaso nei, lea ua faamoemoe le malo e tatau ona o’o atu i ai, ua maea a latou suesuega o lo o faagasolo i lenei mataupu, ma tuuina atu loa moliaga faaopoopo ua faamoemoe e faia faasaga ia i laua nei.Na taua e le alii loia a Blake le fuafua o le malo e faila moliaga mamafa o le fa’ao’olima fa’asaga ia i laua nei, peitai faatoa mautinoa lea tulaga pe a maea suesuega o lo o faia. O lo o taofia pea Blake i le toese i Tafuna.Afai e mafai ona totogi e Golk ma Senio tupe ua faatulaga e tatala ai i laua i tua, ua poloaina i laua ina ia aua nei o la toe taumafai e fa’afeso’otai i latou o lo o aafia i lenei mataupu, aemaise ai lava i laua na aafia ma o laua aiga.Ua fa’asa ona o la toe solia se tulafono a le malo, pe taumafai foi e tu’ua le atunuu, ae ia tuuina atu a laua pepa malaga e taofi e le malo, sei maea a la mataupu ona faatoa mafai lea ona toe tuuina ia te i laua.Na taua e le Sui Komesina o le Matagaluega o Leoleo ia Leseiau Laumoli le fa’aauauina pea o suesuega a leoleo e uiga i lenei mataupu ma le faamoemoe, e tatau ona oo atui le faaiuga o le vaiaso ua maea.Saunoa Laumoli, e na o le pau ia o faalavelave na a’afia ai nisi i ni manua na tulai mai i le faaiuga o le vaiaso na tea nei.