Ona o le Koluse Mumu e mo’omia taimi uma e tautua ofo atu so’o se tasi ua mae’a fa’atumuina pepa talosaga mo nei avanoa matagofie, o lea ua filifili ai se tasi e avea ma se sui e avea ma se fa’ata’ita’iga lelei ia i latou uma ua aofia i le tautua mo le mamalu lautele.

I le taimi nei ua fa’ailoa mai e toeititi atoa le 40+ o suafa o i latou ua mae’a fa’amauina e fa’atinoa ni galuega e tautua ai i le Koluse Mumu, peita’i, ua fa’ailoa mai, e le lau maua taimi e fa’atino ai ni o latou tiute, aua o le to’atele e faigaluega. Peita’i ua fa’ailoa mai e na’o le 12 i latou ua tele taimi ua faigaluega ai, a’o isi e le’i maua ni avanoa mo tiute i lea fo’i auaunaga.

Ua fa’ailoa mai la e le susuga ia Val Tuilefano i le Kolusu Mumu, “O Ene Etuati, o se tasi o tagatanu’u mai Tuvalu, peita’i, ua alaala tumau iinei, ma ua ofo mai lana auaunaga e fia fa’atino mo le Koluse Mumu. O se tasi ua matua iloga lona agava’a mo galuega fa’atino a le matou auaunaga.”

Ina ua fesiligia Ene Etuati i lona gaua’i e fa’atino tiute mo le Koluse Mumu, sa ia fa’ailoa mai, “O a’u sa tele se taimi na ou tautua ai foi i le Koluse Mumu a’o i ai i Tuvalu. E o’o lava i ta’aloga e fa’atautaia e le Koluse Mumu, o auaunaga mo tagata matutua ua mama’i ma isi tiute olo’o fa’afoea e le Koluse Mumu mo Tuvalu, ua ou iloa patino ai gaoioiga e tautua ai le lautele.”

“O le taimi e usu mai ai Ene e faigaluega e o’o i le taimi e manava ai, e matua taua ia te ia, e fa’atino ai galuega e fia fa’amae’a i aso ta’itasi. Ua iloa fo’i ona tautua ma le fiafia ma fa’aosofia lagona lelei ia i latou ua matou galulue fa’atasi i inei,” o se toe fa’aopoopo mai lea a Tuilefano.

Ina ua fesiligia i lana tautua, pe aisea ua talafeagai ai lea tautua ma lona olaga faigaluega, ae fa’ailoa mai e Ene, “O lo’o i ai lo’u tiute fa’atino mo la’u Ekalesia, o le a’oa’o lea o le gagana Tuvalu ma le Gagana Samoa i le fanauiti ia mautu lo latou iloa o nei gagana e lua i totonu o le matou ekalesia. Peita’i, o na tiute uma e faia lea i aso Sa, ae maua ai le avanoa lelei mo tautua i le Koluse Mumu i aso ta’itasi o le vaiaso. O le tele fo’i o tiute fa’atino mo le Ekalesia e faia lava i afiafi pe a manava. O le tautua ofo ua ou talitonu, e sili ona fa’ailoa ai le moni o lou talitonuga, e i ai sou aoga mo isi e fa’ao’o i ai lea tautua!”

O le tausaga 2014 ma le 2015 ua mae’a fa’aavanoa fo’i e le Koluse Mumu ni avanoa e fa’afaigaluega ai ni fanau i a’oga maualuluga o le atunu’u e fia ofo mai le latou tautua mo galuega faatino. Mo le tu’uaga atoa, e tusa ma le 400 itula e mafai ona ofo mai ai tautua a nei fanau mo le Koluse Mumu o Amerika Samoa.