O le ali’i mai Manu’a lea na tu’uaiga i lona gaioiga o se sipika sa i totonu o le potu o ali’i Saila o le MV Sili, ua tu’uaia nei e le malo i le moliaga mamafa o lona umia fa’asolitulafono o vaega o le laau fa’asaina o le mariuana, ina ua saili atu lana ato fa’a fafa ae maua i ai le sipika ma se afifi mariuana.

E $25,000 le tupe lea ua fa’atulaga e le fa’amasinoga e totogi ona fa’atoa mafai lea ona tatala le ali’i o Joshua Filoiali’i i tua mai le toese, e fa’atali ai taualumaga o lana mataupu lea ua fa’agasolo i luma o le fa’amasinoga i le taimi nei.

O le mataupu lenei na tofu atu i le Ofisa o Leoleo i Fagatogo i le aoauli o le aso 4 Ianuari 2015, ina ua logo e le kapeteni a le MV Sili le ofisa o leoleo mo se fesoasoani, ina ua latou maua se afifi mariuana i totonu o le ato sa umia e Filoiali’i.

Na taua i fa’amaumauga a le fa’amasinoga e fa’apea, i le malaga a le MV Sili mai Manu’a mo Tutuila nei i le aso e pei ona taua, na osofa’i ai e se tagata le potu a ali’i Saila i totonu o le va’a, ae gaoi se sipika sa i ai i totonu.

Na avea le masalomia o Filoiali’i i le gaoiina o le sipika ma itu na saili ai loa e Saila o le va’a lana ato sa fa’a fafa, ma maua i ai le sipika fa’ape ai ma se mea sa afifi i se pepa foil, lea na mulimuli ane iloa, o vaega o lau mamago o le laau fa’asaina o le mariuana.

Ina ua fesiligia e leoleo ia Filoiali’i e tusa ai o mariuana sa maua ia te ia, na ia taua ai e fa’apea, o mariuana sa maua ia te ia, na ia gaoia mai i se tagata e igoa ia PILO o Manu’a.

Sa ia taua fo’i i leoleo e fa’apea, na mafua ona maua e Saila o le va’a mariuana sa i totonu o lana ato, ona o le sipika sa ia gaoia lea na su’e ma maua i totonu o lana ato, ma maua atu ai loa ma ana mariuana.

E ese mai i le afifi mariuana sa i totonu o le ato, sa maua ai fo’i ma se afa sikaleti mariuana, lea fo’i na taua e Filoiali’i i leoleo e fa’apea, o le sikaleti sa tago taai ae na galo ai i totonu o le isi tama’i ato o lana ato sa fa’a fafa.

Na faia e leoleo se su’ega i lau mamago, ma fa’amaonia ai le maua o le vailaau o le THC o lo o maua i totonu o le mariuana.

Afai ae mafai ona tatala Filoiali’i i tua mai le toese i Tafuna, ua poloaina o ia e aua ne’i ona toe umia ni vaega o le laau faasaina o le mariuana, ua fa’asa fo’i ona ia taumafai e tuua le atunu’u, sei vagana o se poloaiga a le fa’amasinoga.

O le moliaga mamafa o le umia fa’asolitulafono o mariuana lea ua tu’uaia ai Filoiali’i e le malo, o se solitulafono o le vaega D, lea e mafai ona fa’asala ai se tasi i le toese mo le umi e le sili atu i le 5 tausaga, pe fa’asala fo’i i le salatupe e $5,000, po o le fa’asala fo’i i fa’asalaga uma ia e lua.

Ua poloaina fo’i Filoiali’i e le fa’amasinoga e aua ne’i ona toe solia se tulafono a le malo, a ia avea o ia ma tagatanu’u lelei e usita’i ma tausisi i tulafono uma a le malo.