Na fa’amatala e loia a le feterale o lo o gafa ma le finauina o se fa’asalaga fa’asaga ia John Kruse ma lona faletua o Elaine Kruse i luma o le fa’amasinoga feterale, e mafua mai i lo la fa’aaoga sese o tupe mai le polokalame o le ‘1602’ e fa’amalie ai o la manaoga, o le gaioiga sa faia e le ulugali’i, o se gaioiga e mataga toe maasiasi.

E ui o lea ua taoto se talosaga na fa’aulu e loia a John Kruse ma lona faletuaina ia fa’anofova’ava’aia i laua e aunoa ma le tu’uia atu o se fa’asalaga fa’afalepuipui, peita’i na finau le malo ina ia fa’anofova’ava’aia le ulugali’i mo le ta’i 3 tausaga i lalo o tu’utu’uga, la te tuliina le umi e 24 masina i le falepuipui.

Mai le aofaiga e $864,095.04 na taua e le malo sa fa’amanuiaina ai le ulugali’i i le polokalame a le feterale o le ‘1602’, e toeitiiti lava atoa le $400,000 na fa’aaoga e le ulugali’i i manaoga e le feso’ota’i ma le polokalame o le ‘1602’.

FA’AFINAUGA A LE FETERALE

Na taua e le itu a le malo i le latou fa’afinauga e fa’apea, na gaoi e le ulugali’i tupe sa fa’amoemoe e fausia ai fale mo tagata e maualalo le latou tupe maua, e le gata la ua la aveesea le aia mai tagata totogi lafoga latou fa’aaoga tatau ai tupe lautele, ae ua la aveesea fo’i le aia mai tagata lima vaivai a Amerika Samoa latou te nonofo ai i fale latou te gafatia ona totogi.

O lo o finau le malo na fa’aaoga e le ulugali’i tupe a le feterale e totogi ai la credit cards, fa’atau ai oloa mo isi a la pisinisi, atoa ai ma le fa’atino ai o ni isi o a la manaoga i Hawaii.

O lo o taua fo’i e le feterale e fa’apea, o le aiga o Kruse, o se tasi o aiga e lauiloa i Amerika Samoa. O John Kruse o se totino o le Kapeneta, ona o ia o le Fa’atonusili o le Ofisa e Pulea Oloa ma Meatotino a le malo, ae o lona uncle o Michael Kruse o lo o avea ma fa’amasino sili a Amerika Samoa.

E ui o lea e fai mai le feterale o Michael Kruse o le uncle o John Kruse, ae fia fa’ailoa atu e le Samoa News, o John Kruse o le uso laititi lea o Michael Kruse le fa’amasino sili.

O le pisinisi o lo o fa’afoe e le ulugali’i i Amerika Samoa e aofia ai le RegionPac Sales & Marketing, lea e aumaia oloa e aofia ai ma le ava malosi i totonu o le teritori.

O tuutuuga o le polokalame a le ‘1602’ e pei ona taua e le malo, sa mana’omia ai le i ai o se konekarate latou te fausia le galuega a le ulugali’i, peita’i o le mea ua tupu, ua fa’atula’i lava e le ulugali’i le laua kamupani faufale o le ‘RegionPac Construction & Engineering’ ma le fa’amoemoe, ia la toe maua uma tupe e alu i le totogiina o le konekarate na te fa’atinoina le galuega.

Na amata e le ulugali’i le la galuega i le 2011 i le tupe e silia laititi ma le $593,000, peita’i o le mea mataga sa laua faia e pei ona taua e le malo, e le gata ua la fa’aaoga tupe a le feterale e fa’amalie ai manaoga mo le la pisinisi, ae sa la fa’aaoga fo’i e fa’amalie ai manaoga fa’aleaiga, ma i’u ina le mae’a ai le la galuega.

E le gata na pu’e e le FBI ata o le fale e le’i mae’a, ae sa faia fo’i se su’esu’ega i auala na fa’aaoga ai e le ulugali’i tupe ma iloa ai, e tusa ma le $399,936.48 le vaega tupe sa la fa’aaoga i manaoga e le feso’ota’i ma le polokalame o le ‘1602’.

Mo se fa’ata’ita’iga e pei ona taua e le malo, o le vaega tupe e silia i le $100,000 sa tala ese mai i le teugatupe a le ulugali’i, sa fa’aalu lea i managa e le feso’ota’i ma le polokalame a le feterale.

O isi tupe na fa’aaoga e le ulugali’i mo laua lava e pei ona taua e le malo, o le $67,987.50 sa totogi i le King Car Food, o se kamupani i Taiwan o lo o oka mai ai ava malosi mo le la pisinisi i le teritori.

Sa taua fo’i le totogi atu e le ulugali’i o le $27,654.57 i le kamupani a le Newbevco, Inc, o se kamupani ava malosi; $14,800.50 sa totogi a’i i le J. Hellman Produce Inc; $22,338.92 sa totogi i le John Swire & Sons, o se kamupani vaa i Hong Kong, ma le $9,874.11 sa totogi i se kamupani oloa siiatoa i Amerika Samoa nei.

O isi vaega na fa’aaoga e le ulugali’i tupe a le feterale e totogi ai, o le la nonogatupe i le faletupe o le ANZ Amerika Samoa Bank i le aofa’iga e $62,670.31, ma le $15,731.41 sa totogi i le kamupani a le Wells Fargo i Hawaii, ae o isi tupe sa totogi ai le la credit cards, totogi ai pasese i le kamupani va’alele a le Polenisia, fa’atau ai taumafa, ma totogi ai faletalimalo i Samoa.

Sa fa’ailoa fo’i e le itu a le malo i le latou fa’afinauga isi auala na fa’aaoga ai e le ulugali’i tupe feterale, e penefiti ai laua lava.

Mo se fa’ata’ita’iga, sa toe tu’uina atu e le ulugali’i ni fa’amaumauga tau fa’asese i le Faletupe o Atina’e, e toe talosagaina ai le vaega tupe e $236,899.60 e totogi ai le fausiaina o le fale. I le taimi lava fo’i lea e tasi, sa tu’uina atu e le ulugali’i pepa mo le talosagaina o le tupe e silia i le $236,000 e totogi mo le kamupani a le RegionPac, lea na toe ta’utino Elaine mulimuli ane, o pepa sa tu’uina atu mo lea talosaga e le moni.

Ina ua fesiilgia e FBI le ulugali’i i le tausaga na te’a nei e tusa ai o le mataupu lenei, na ta’utino ai John Kruse e fa’apea, sa la fa’aaoga ma lona to’alua tupe e tali atu ai i manaoga laiti sa tula’i mai i le aiga ma le la pisinisi.

fa’aliliu Ausage Fausia