Ads by Google Ads by Google

Mataina pe’a na fa’aali i le Tisa’s Tattoo Fest

Na tulaga mataina pe’a na mafai ona faaali i le tauvaga lona 8 a le Tisa’s Tattoo Fest, lea na faai’uina i le Aso Sa na te’a nei, Oketopa 28, 2012, a’o molimauina e le to’atele o le atunuu, uo ma aiga, aemaise ai o tagata tafafao maimoa mai fafo sa maua le avanoa latou te molimauina ai lenei faamoemoe.

O le tauvaga sa faagasolo mo le tolu aso, ma molimauina ai pe’a eseese sa mafai ona ta e tufuga ta pe’a o lo o faaaogaina ‘au Samoa, aemaise ai o alii ta pe’a o lo o faaaogaina masini faaonaponei.

E to’a 6 alii ta pe’a e faaaogaina masini na auai i le tauvaga ae to’atolu tufuga ta tatau Samoa.

O tufuga ta tatau Samoa na aofia ai Su’a Faumui Tupou Su’a, o lona uso o Su’a Vaofusi Pogisa Su’a mai Gagaifo Lefaga, ma Tupuola Wilson Fitiau o Amerika Samoa nei.

O le tauvaga sa mafai ona faaali ai ituaiga pe’a eseese e pei o le pe’a e ta i le lima, poo le taulima, o le pe’a e ta i le vae, poo le tauvae, ma pe’a e ta i vaega o le tino e pei o le tauau, papatua ma le tapuvae.

Na toeitiiti lava o alii ta pe’a uma na auai i le tauvaga na o latou mauaina faailoga eseese i pe’a sa latou taina i tino o tagata.

I le faaiuga o le tauvaga i pe’a ma mamanu uma sa faaaogaina mo aso e tolu, na manumalo ai le tauvae sa ta e le afioga Tupuola i le aao o le alii o Matt.

O alii ta pe’a e faaaoga ai masini, na manumalo ai le alii mai Tonga o Pahe i se masini fou na mafai ona tauaao atu i ai mo ia, ina ua manumalo pe’a e lua sa ia taina i isi vaega o le tauvaga.

Na faafetaia e le faletua ia Tisa i latou uma na mafai ona auai i lenei tauvaga, lea ua mafai ai ona faaali le tomai i le taina o pe’a.

Na faapitoa lana faafetai i le susuga Su’a ma le aumalaga mai Samoa, ona o i latou ia sa faapitoa i ai lenei faamoemoe, e le gata sa o latou taina ni isi o pe’a e faaaoga ai mamanu a Samoa, ae na maua foi le avanoa latou te faasoa ai le amataina mai o le galuega i le taina lea o le pe’a.

Na faaiu le tauvaga i faaaliga o laei eseese lea na mafai ona faalauiloa e tamaitai, ma taualuga ai loa i faafiafiaga faa Samoa e faai’u ai le tauvaga o lenei tausaga