O le mae’a ai o le ta’amilosaga si’isi’i u’amea mamafa a le Pasefika lea na talimalo ai le atunu’u o Niu Kaletonia i le vaiaso na te’a nei, ua fa’alauiloa aloaia mai loa e le Pulega o Ta’aloga Si’isi’i U’amea mamafa a le Pasefika, le aofia ai o le tama’ita’i o Orepa Rosery Talo o Amerika Samoa i ali’i ma tama’ita’i si’isi’i o le a tausinio i le ta’amilosaga lona lua o le “2nd Youth Olympic”, lea e faia i le aai o Nanjing i Saina i le masina o Aokuso 2014.

O le manumalo ai o le tama’ita’i o Talo i le pine auro i le aupaga na tausinio ai, ua maua ai lona avanoa e tausinio ai i le ta’amilosaga a le Olimipeka mo tupulaga talavou.

O Amerika Samoa e lima ai atunu’u o le Pasefika ua maua avanoa e tausinio ai i le ‘Youth Olympic Games’ i Saina.

E le gata o se tala fiafia lea mo Amerika Samoa, ae ua atili ai le fa’afiafiaina o aiga aemaise le atunu’u sa tapua’i, ina ua manumalo le au si’isi’i sa tausinio i ta’aloga a le Pasefika i pine e 7, e pei ona taua mai i se ripoti mai se sui o le au malaga i le aso ananafi, ma ua fa’amoemoe o se taimi o le aso e toai taunu’u mai ai i fanua le au malaga, lea e aofia ai sui e to’alima o le au si’isi’i u’amea mamafa fa’apea ai faiaoga ma Ofisa sa malaga.

Mai pine e 7 sa maua i le Niu Kaletonia, e tasi le pine auro, 2 pine siliva ae 4 pine apamemea.

O le ta’amilosaga a le Pasefika sa vaevaeina i vaega e tolu, lea e aofia ai ‘Junior Championship’; ‘Senior Championship’, ma le ‘Youth Olympic Qualification’.

E tolu tauvaga eseese na tausino ai le tama’ita’i o Talo, ma ia maua ai pine e lua mo Amerika Samoa, e aofia ai le pine auro ma le pine siliva.

Na tauva fa’atasi Talo ma isi tama’ita’i e to’alua o le au sa malaga, lea e aofia ai Jennade Ferlin Ausage ma Naomi Kay Taumalua.

Ta’amilosaga a le ‘Oceania Junior Championship’

I le ta’amilosaga o le “Oceania Junior Championship” i le aupaga o le ‘75 kg’ lea na tauva ai na o Ausage ma Taumalua, na maua ai e Ausage le tulaga 5 i le aofa’i o lana si’i e ‘125 kgs’, ae tulaga 6 ai Taumalua i le aofa’i o lana si’i e 124 kg’, mai tama’ita’i e to’a 7 sa tausinio.

Ae o le aupaga e ‘75+ kg’ lea na tausinio ai na o Talo, na ia manumalo ai i le pine siliva, i le aofa’i o lana si’i e ‘168 kg’, ae o le pine auro na manumalo ai le tama’ita’i mai Papua Niu Kini i le aofa’i o lana si’i e ‘180 kg’.

I le vaega o ali’i, na manumalo ai le ali’i o Malaki Antonio Sitagata Jr i le pine apamemea, i le mamafa o lana si’i e ‘220 kg’.

Ta’amilosaga a le ‘Oceania Senior Championship’

E le i manuia taumafaiga a Talo, Ausage ma Taumalua i le ta’amilosaga a le ‘Oceania Senior Champioship’.

I le aupaga o le ‘75 kg’, na tulaga 8 Ausage i le mamafa o lana si’i e ‘125 kg’ ae tulaga 9 Taumalua i le mamafa o lana si’i e ‘124 kg’, ae sola ai le tama’ita’i mai Samoa o Mary Opeloge ma le pine auro i le mamafa o lana si’i e ‘240 kg’, mai tama’ita’i e to’a 10 sa latou tauva.

I le aupaga o le ‘75+ kg’ lea na tausinio ai na o Talo, e le i manuia lana taumafaiga i se pine, ae na ia maua le tulaga 7 i le mamafa o lana si’i e ‘168 kg’, ae sola ai le tama’ita’i mai Samoa o Ele Opeloge ma le pine auro i le mama o lana si’i e ‘271 kg’, mai tama’ita’i e to’a 9 sa latou tauva.

I le vaega o ali’i lea na tausinio ai le sui o Amerika Samoa ia Elliott Hasu Kim, e le i manuia lana taumafaiga i se pine, ina ua ia maua le tulaga 8 i le mamafa o lana si’i e ‘213 kg’, i le aupaga o le ‘85 kg’ sa tauinio ai.

Ta’amilosaga a le ‘Youth Olympic Qualification’

O le ta’amilosaga lea na manumalo ai Talo i le pine auro i le aupaga o le ‘69 kg’, ae tulaga 4 ai le tama’ita’i o Ausage.

Ae i le vaega o ali’i, na manumalo ai le ali’i o Sitagata i le pine siliva mo Amerika Samoa, i le mamafa o lana si’i e ‘220 kg’, ae sola ai le alii Samoa mai Niu Sila ma le pine auro i le mamafa o lana si’i e ‘310 kg’.

O isi pine apamemea mo Amerika Samoa e aofia ai pine e 2 ua fa’amanuiaina ai le tama’ita’i o Taumalua ma le isi pine apamemea e tasi mo le tama’ita’i o Ausage.

O le tama’ita’i o Talo o le alo tama’ita’i lea a le susuga i le ali’i faifeau ia Rev. Talo o le Ekalesia Katoliko o Lauli’i.