E atagia mai i le tau faaiuga o suesuega a le Komiti Suesue a le Senate, le SIC lea o loo faagasolo i le faaaogaina o le nonogatupe e $20 miliona a le malo, e foliga mai e i ai tama leaga ia o le a faatutu i ai suesuega a le komiti, ma ua fautuaina ai le faia o ni suesuega tau i le faia o slitulafono faasaga i nisi o loo aafia i lenei mataupu.

O molimau ua i luma o le komiti suesue a le Senate, le SIC ua vavala mai ai masalosaloga, e i ai mea sa faatau faaalatua mai i le tupe sa tuu atu e faatau mai ai le vaa toso vaa ma lagisi, lea sa faatupe mai i le nonogatupe e $20 miliona a le malo.

O mea sa taua e nisi o molimau na aumai faatasi i le taimi na toso mai ai le vaa toso vaa, o lagisi ma taavale o se laptop, camera, TV, DVD ma nisi o masini e faaaoga i faleaiga, ma o mea nei o loo masalomia sa faatau mai i tupe a le malo.

Na taua e le Faatonusili o Pulega o Uafu ma Taulaga ia Matagi Ray McMoore i luma o le SIC e faapea, ina ua ia maua tala e uiga i mea sa aumai e aofia ai ma se taavale, sa ia tusi ai loa se tusi i le komesina o Leoleo, ma ia talosagaina ai sa latou suesuega e uiga i mea na aumai.

Na taua e le sui taitaifono o le komiti faafoe o le Vaega Tosovaa ia Carlos Sanchez i lana molimau i luma o le SIC e faapea, sa faatau mai foi e le komiti na malaga e saili se vaa se mea faigaluega e faaaoga i totonu o faleaiga i le tau e $7,000, peitai e oo mai i le taimi nei e le iloa poo fea ua ave i ai lea mea.

O atugaluga o le SIC e pei ona o latou fesiligia ai mea nei, e foliga mai e i ai tagata o le malo o loo iloa ma malamalama lelei i mea sa tutupu, peitai e le o talanoa mai i latou e faailoa mea moni sa tutupu.

Saunoa le alii Senatoa ia Mauga Tasi Asuega, e maofa lona loto pe a vaavaai atu i le tulaga maoae sa i ai le faaaogaina e le komiti faapitoa sa tofia e le kovana o le tupe sa tuuina atu e faatau mai ai le vaa ma lagisi mo le uafu.

“Ou te le malamalama pe faapefea ona tulai mai le mea lenei, e tele atu le tupe na alu i le toe lipeaina o le vaa toso vaa ma lagisi nai lo tupe na faatau mai ai,” o le saunoaga lea Mauga.

I molimau ua i luma o le SIC, e $50,000 le tau o le lagisi e tasi, ae $500,000 na faatalu e toe lipea ai, ae mo le vaa toso vaa, e $500,000 le tau na faatau mai ai, ae $1.6 miliona le tupe na alu e toe lipea ai.

O lea ua taunuu mai le vaa toso vaa ma lagisi, peitai o loo faaauau pea le mataupu i le va o le malo ma le kamupani na lipeaina le vaa ma lagisi, le kamupani a le Marisco, ona o loo finau mai le kamupani, e i ai tupe e lei maea ona totogi atu e le malo mo le toe lipeaina o le vaa ma lagisi.

O le itu faanoanoa e pei ona taua e le SIC, ua gau tupe i le faatauina mai o lagisi e lua, peitai e le o aoga i se galuega a le malo, o loo tutu pea lava i le uafu o vaa faila i le taimi nei.

Fai mai ni molimau ua maua e le komiti, o lagisi na aumai e le aoga i luga o le sami, ae o lagisi na fausia faapitoa e faaaoga i luga o le vai.

O loo faaauau pea suesuega a le komiti e uiga i isi mea o loo masalomia na faatau mai i tupe a le malo, peitai e le o manino poo fea ua ave i ai i le taimi nei.

O le isi tulaga lea ua maitauina i le taimi nei, e le i ai ma ni faamaumauga o faatauga sa faia ua tuuina atu e le pulega o Uafu ma Taulaga i le SIC mo a latou iloiloga. Sa faailoa e le faatonusili o lea ofisa ia Matagi Ray McMoore, o faamaumauga uma e uiga i le mataupu lenei, aemaise lava i faamaumauga i le va o le malo ma le kamupani a le Marisco, ua tuuina atu uma i le Ofisa o le Loia Sili.

O nisi o vaega ua agai i ai suesuega a le SIC, o le faaaoga seseina lea o tupe a le malo e faatau mai ai mea totino a le tagata lava ia, e aunoa ma se silafia e le malo, ma o nisi o mea totino nei e aofia ai taavale, o mea faigaluega e faaaoga i le faleaiga, aemaise ai o meatotino e pei o mea pueata, laptop ma isi.

E le o malolo le SIC i le suesueina o lenei mataupu, ae atagia mai e i ai isi faamaumauga e ono mafai ona aliali i le mataupu lenei, e aofia ai ma le lisiina atu o le masini na faatau i tupe a le malo i se kamupani i Hawaii, ae faaaoga e se tagata faigaluega a le malo tupe sa maua mai ai mo ia lava.