Ads by Google Ads by Google

Maua tino maliu tama 58 tausaga na malemo i le sami

O se tama e 58 tausaga le matua mai Pava’ia’i na malemo i le afiafi o le Aso To’ona’i na te’a nei i Avau, ae na faatoa maua lona tino maliu i le taeao ananafi ina ua toe faaauau galuega fesoasoani a le Vaega o le Puipuiga o le Saogalemu a le Matagaluega o Leoleo, le Marine Patrol.

 

O lenei faalavelave na tulai mai i le taimi a’o feagai ai le aiga o le tama ua maliu ma se tafaoga.

 

Na faamaonia mai e le alii kapeteni o Tulele Laolagi, o ia foi lea na taitaia le sailiga o le tama ua maliu, na maua lona tino maliu i le itula e 9.32 i le taeao ananafi.

 

Sa saunoa Laolagi e faapea, o le itula e 5:00 i le afiafi o le Aso Toona’i na amata ai a latou sailiga mo le tino o lenei tama, lea na galulue ai alii tofutofu (divers) pe tusa e to’aiva mai lana vaega, o leoleo se toa 10 mo le sailia o le tino o le tama na leiloa, ae na faamuta i le 8:00 i le po ina ua siliga taliieseu se fesoasoani, ma toe faaauau ai i le 8:00 i le taeao na sosoo.

 

E ese mai i sui o le Marine Patrol ma leoleo, sa faapea foi ona i ai ma ni alii maulu faapitoa (free divers) se toalua ia Mamani Seti ma Talosaga Ioapo, lea na ofo atu le la fesoasoani i le sailiga o le tama na leiloa.

 

“Pe tusa o le 9:32 i le taeoa nei (taeao ananafi) na maua ai loa e tama maulu le tino maliu o le na tafea ma ua auina nei i le falema’i i Fagaalu,” o le saunoaga lea a Laolagi, atoa ai ma lona taua o le faaaogaina o pasika sami faapitoa a leoleo e tolu (jet skis) faatasi ai ma isi mea faigaluega mo le su’eina o le tino o le ua maliu, faatasi ai ma se fesoasoani mai o le vaa a le susuga ia Lealaifuaneva Reid.

 

A’o galulue alii maulu mo le sailia o le tino o le tama ua maliu, sa vaaia le nonofo tapuai o ni isi o lona aiga i le isi itu o le alatele, ae o isi i le fale faatali pasi o lo o sosoo latalata ane i lea nofoaga, ma faatalitali i se taunuga o sailiga a leoleo o lo o faia.

 

Na taua e se sui o le aiga o le tama ua maliu i le Samoa News e faapea, o se latou tafaoga i le sami na tulai mai ai le faalavelave, ina ua vaaia le aga’i atu o le ua maliu i le pito i tai o le sami, ma taia ai o ia i se galu ma tulai mai ai loa le faalavelave.

 

Saunoa Capt. Laolagi e faapea, o lo o faaauau pea suesuega a le ofisa o leoleo i le mafuaaga o le maliu o lenei tama, ma o le taimi nei, e le o mafai ona faalauiloa lona suafa sei vagana ua faamaonia mai e le Ofisa o Leoleo ni isi o faamatalaga uma e faatatau ia te ia atoa ai ma le faalavelave na tulai mai.

 

Saunoa le Sui Komesina o Leoleo ia Leseiau Laumoli ina ua fesiligia e le Samoa News e faapea, o se ulua’i faalavelave lenei ua tulai mai i lenei tausaga ua maimau ai se soifua o tasi.

 

O ni nai tausaga e lei mamao atu na maliu ai foi se alii talavou i le sami i Auto ina ua tafea o ia i le aave o le au. E 3 aso o sailia e leoleo lona tino peitai e le’i manuia, ma e oo mai lava i le taimi nei e le’i maua lava lona tino maliu.

 

faaliliu Ausage Fausia