Talu mai le tausaga e 2004 lea na fa’atoa fa’avae ai le kamupani a le Nana’s Inc, Corporation i Amerika Samoa, ua maitauina ai le maualuga o le tulaga ua oo i ai lana auaunaga, e le gata i le fa’atinoina o galuega e tautua ai le atunu’u i soo se matata, ae o lona fesoasoani fo’i lea i aiga e ala i le ofoina atu lea o avanoa faigaluega mo le to’atele o tagata o le atunu’u.

I se fa’atalatalanoaga ma le tama’ita’i pulesili o le kamupani, le tausi ia Fiapaipai Fruean, na taua ai e Fruean le anoanoa’i o galuega ua mafai ona fa’atinoina  e lana kamupani i le sefulutasi lenei o tausaga talu ona fa’avae le kamupani.

“Talu ona amata mai le tautua a lenei kamupani, e anoanoa’i auaunaga eseese o loo matou ofoina atu i le atunu’u, ma ua mafai fo’i i le taimi nei ona matou fa’a faigaluegaina tagata e to’a 74 i totonu o vaega eseese o loo tautua ai le Nana i le malo ma le atunu’u,” o le saunoaga lea a Fruean.