Ads by Google Ads by Google

Molia feterale se fafine lona faila sese lafoga mai Amerika Samoa

E 58 tausaga o se fafine mai Amerika Samoa ua molia nei e le malo feterale i Anchorage i Alaska, i lona faia o fa’amaumauga pepelo ma le tau fa’asese i le failaina lea o lafoga a tagata o lo o nonofo i Amerika Samoa, ae fa’aaoga i ai pepa faila lafoga a le Ofisa o Lafoga a le malo tele o Amerika.

 

E tusa ai ma fa’amaumauga mai le faamasinoga feterale na fa’amatu’u mai i le masina na te’a nei e fa’atatau i lenei mataupu, e 28 moliaga ua faia fa’asaga ia Anetipa, e aofia ai moliaga e pei o le faia o faamaumauga le sa’o, tau fa’asese atoa ai ma le faia o tusitusiga e le moni fa’asaga i le malo o Amerika.

 

O lo o tu’uaia e le malo feterale ia Anetipa i lona faila lea o lafoga i se auala tau fa’asese, ma maua ai le aofaiga e $202,859.

 

O le aso 2 Tesema 2014 e pei ona taua i fa’amaumauga a le feterale na pu’e fa’apagota ai Anetipa i Uosigitone, ma toe auina atu ai loa o ia i Anchorage i Alaska e fa’ataunu’u ai taualumaga o lana fa’amasinoga, ma o le aso Tofi o le vaiaso na te’a nei na tula’i ai o ia i luma o le fa’amasinoga fa’aitumalo a le feterale.

 

I le teena ai e Anetipa o moliaga uma fa’asaga ia te ia, ua fa’atulaga ai loa le aso 9 Fepuari 2015 e fa’ataunu’u ai lana fa’amasinoga autu.

 

E tusa ai ma fa’amaumauga a le fa’amasinoga feterale o lo o taua ai e fa’apea, o le masina o Iulai 2011 na tuua ai e Anetipa ia Amerika Samoa ae malaga atu i Alaska, ma ia maua ai loa se laisene faipisinisi mo le failaina o lafoga i le masina o Fepuari o le tausaga na sosoo ai i le aai o Anchorage.

 

O lo o tu’uaia e le malo feterale ia Anetipa i lona fa’aaoga lea o faamaumauga o lo o i luga o pepa o lafoga (Form W-2AS) a tagata o lo o nonofo i Amerika Samoa, e faila ai lafoga mo i latou e nonofo i Amerika.

 

O lo o taua i fa’amaumauga le fa’aaoga e Anetipa o pepa faila lafoga a le fetarale ‘Form 1040’, e faila ai lafoga a tagata o lo o nonofo ma faigaluega i Amerika Samoa, e ui e le agava’a i latou nei i fa’amanuiaga tau tupe mo lafoga toe fa’afo’i o lo o ofo atu e le Ofisa o Lafoga a le malo tele (IRS) i tagata faigaluega o lo o nonofo i Amerika.

 

O lo o taua fo’i i fa’amaumauga a le feterale le iloa lelei lea e Anetipa o lana gaioiga sa faia i le taimi na ia faila ai lafoga, e leai ma se tasi o i latou nei sa ia faila a latou lafoga na maua ni o latou totogi i fafo atu o Amerika Samoa.

 

O ni isi o tulaga o lo o taua i fa’amaumauga a le fa’amasinoga, o le sui lea e Anetipa o tuatusi o lo o i luga o le pepa faila lafoga ‘W-2 Forms’, ina ia fa’ailoa mai ai tuatusi i totonu o le setete o Texas ma Alaska, ae ua aveese Pago Pago i Amerika Samoa sa tusia ai.

 

Ina ua mae’a ona faia e Anetipa suiga i luga o pepa faila lafoga e pei ona taua, sa ia tago loa ma faila pepa tau fa’asese nei ma le fa’amoemoe e maua mai ai tupe mo lafoga toe fa’afo’i.

 

O se tasi o itu matuia e pei ona taua i fa’amaumauga a le fa’amasinoga feterale i lenei mataupu, o pepa faila lafoga pepelo lea sa fa’atumu ma faila e Anetipa, ua atagia atu ai i  fa’amaumauga a le IRS o totogi o tagata nei sa maua uma i totonu o Amerika ae le o Amerika Samoa, ma mafua ai loa ona totogi atu e le ofisa o lafoga a le fetarale tupe mo nei tagata.

 

E le gata fo’i i lea, o faamaumauga sese i le aofa’i o tupe sa faila e Anetipa i le Ofisa o Lafoga a le malo tele mo lafoga toe fa’afo’i, na mafua ai ona sese fa’amaumauga sa tu’uina atu e le IRS mo lafoga toe fa’afo’i.

 

O moliaga e 28 o lo o tu’uaia ai e le feterale ia Anetipa, e afua mai i tagata e to’a 28 mai Amerika Samoa sa ia faila sese a latou lafoga, ma mafua ai ona maua mai le vaega tupe e pei ona taua i fa’amaumauga a le fa’amasinoga.

 

O le tausaga e 2012 e pei ona taua i fa’amaumauga a le fa’amasinoga na fa’atino uma ai gaioiga fa’a solitulafono e pei ona tu’uaia ai Anetipa, ma o le siaki pito maualuga sa mafai ona maua mai ai e $10,840, i lalo o le igoa o ‘S & M.S’, ae o le isi siaki e sosoo ane ai e $10,407 sa i lalo o le igoa o ‘M. & F. A’.

 

O isi siaki e pei ona taua i fa’amaumauga a le fa’amasinoga e amata atu lava i le $2,000 e o o atu i le $9,000 le maualuga.

 

Na taua e le Ofisa o le Loia Sili a le malo o Amerika i se pepa o fa’amatalaga e fa’apea, o tu’uaiga ua faia fa’asaga ia Anetipa, ua na o ni tu’uaiga, fa’atoa nofosala o ia pe afai e fa’amaonia nei tu’uaiga uma.

 

Na taua fo’i le i ai o le ‘aia tatau o Anetipa e fa’ataunu’u ai sana fa’amasinoga autu, o le tiute fo’i o le malo o le taumafai lea e fa’amaonia nei tu’uaiga uma fa’asaga ia te ia e aunoa ma se masalosaloga tatau.

 

O le moliaga o le faia o fa’amaumauga tau fa’asese, e mafai ona fa’asala ai se tasi i le falepuipui mo le umi e le mafai ona sili atu i le 5 tausaga.

 

Ina ua fesiligia e le Samoa News le loia a le malo ia Thomas Bradley, po o i ai se fuafuaga a le malo feterale, latou te sailia i latou sa latou maua siaki mai le IRB e tusa ai o lafoga toe fa’afo’i, na saunoa Bradley, e le o mafai ona fa’alauiloa fa’alaua’itele fa’amaumauga ia i le taimi nei.

 

I le tele o tausaga ua tuana’i atu, sa fautuaina malosi ai lava e le faigamalo a Togiola ma Faoa le atunu’u, e soia le taumafai e faila a latou lafoga i fafo, ona e le tusa ma le tulafono.

 

Sa i ai fo’i se taimi na fautuaina ai e le alii kovana ua mavae atu ma le Pule muamua o le Ofisa o Lafoga ua malolo litaea ia Melvin Joseph le atunuu, e le agavaa tagata faila lafoga i Amerika Samoa nei ona faila a latou lafoga i Amerika, e mafua lea tulaga, e le agava’a Amerika Samoa ma isi teritori i le fa’amanuiaga tau tupe ‘Earned Income Tax Credit’ o lo o agava’a ai tagata o lo o faigaluega i Amerika.

 

fa’aliliu Ausage Fausia